ورتا سالماقتا WBC, WBA (Super), IBF جانە IBO تۇجىرىمدارى بويىنشا بۇرىنعى الەم چەمپيونى گەننادي گولوۆكين (38-1-1, 34 كو) بوكس الەمىندە وزىندىك ورنىن تاپقان بوكسشى سانالادى.

كاسىپقوي ارەنادا گولوۆكين ناشار بوكسشى بولعان جوق. جالپى 40 جەكپە-جەك وتكىزىپ، 38 مارتە جەڭىسكە جەتتى. ونىڭ 34-ءىن نوكاۋتپەن ۇتتى. بۇدان بولەك ءبىر رەت تەڭ ءتۇسىپ، ءبىر مارتە جەڭىلدى. سوڭعى ەكى ناتيجە دە ساۋل الۆارەسكە قارسى كەزدەسۋلەردە تىركەلدى. كاسىپقوي بوكستا وسىنداي تولاعاي تابىسقا جەتكەن وتانداسىمىز قازىرشە ەل ماقتانىشى دەگەن اتقا ابدەن لايىق بولىپ تۇر.

جاقىندا گولوۆكيننىڭ اتىنا بايلانىستى مۇحيتتىڭ ارعى بەتىنەن تاعى ءبىر قۋانىشتى حابار كەلدى. انىعىراق ايتقاندا، سپورت كيىمدەرى مەن تاۋارلارىن ساتاتىن الەمدىك Nike دۇكەندەر جەلىسى GGG برەندىمەن جەيدەلەر ساتۋدى باستاعان.

Nike - الەمدەگى ەڭ اتاقتى سپورت برەندى. Forbes جۋرنالىنىڭ زەرتتەۋىنشە، Nike كومپانياسىنىڭ قۇنى 2016 جىلى 27 ميلليارد دوللاردى قۇراعان. وسىلايشا ءوزىنىڭ باستى باسەكەلەسى Adidas برەندىنەن 4 ەسە (7 ميلليارد) وزىپ كەتكەن. وسىنداي الىپ كومپانيا ەندى قازاقتىڭ ويۋ-ورنەگىمەن كومكەرىلگەن جەيدەلەر شىعارىپ وتىر.

Nike-ءتىڭ رەسمي سايتىندا «No Draw»، «BooGGGey Man» جانە «GGG» جازۋلارى بار 8 ءتۇرلى جەيدە ساتىلىمعا شىعارىلعان. باعاسى $28.97 (10 مىڭ تگ) باستالىپ، $65 (25 مىڭ تگ) دەيىن بارادى. بارلىق جەيدەدەگى «GGG» جازۋى قازاقتىڭ ۇلتتىق ويۋ-ورنەگىمەن ورنەكتەلگەنىن ەرەكشە ايتا كەتۋ كەرەك.

نەگىزگى گەننادي گولوۆكين Nike كومپانياسى مەن ايگىلى باسكەتبولشى مايكل دجورداننىڭ بىرلەسكەن ساۋدا ماركاسى Jordan برەندىمەن كەلىسىمشارتقا سوناۋ 2016 جىلى قول قويعان. گەننادي سول كەزدىڭ وزىندە اندرە ۋورد پەن كىشى روي دجونستان كەيىنگى برەندتى رەسمي تانىستىراتىن ءۇشىنشى بوكسشى اتانعان.

گولوۆكين وتكەن جىلى قىركۇيەكتە مەكسيكالىق ساۋل الۆارەستەن جەڭىلىپ، ورتا سالماق دارەجەسىندە الەم بوكس تاريحىنداعى اتاقتى بوكسشىلار قاتارىنا قوسىلۋ مۇمكىندىگىن تومەندەتىپ العان ەدى. بىراق WBC, WBA (Super), IBF جانە IBO تۇجىرىمدارىنىڭ باسىن ءبىر جەرگە قوسا بىلگەن گەنا الەمدىك دەڭگەيدە ءوز برەندىن قالىپتاستىرا الدى. ونىڭ ايقىن دالەلى ءبىز ءسوز ەتىپ وتىرعان Nike جەيدەلەرى.

قۋانىش قاپپاس

Abai.kz