قىرعىزستاننىڭ ۇلتتىق قاۋىپسىزدىك مەملەكەتتىك كوميتەتىنىڭ (ۇقمك) مالىمەتى بويىنشا، يساكوۆقا بۇل ىسكە قاتىستى "اۋىر سالدار قالدىرعان كوررۋپتسيا" ايىبى تاعىلعان.
مالىمەتكە سايكەس، 2016 جىلى قىرعىزستان ۇكىمەتى مەن تۇركيانىڭ ۇيلەستىرۋ جانە ىنتىماقتاسۋ جونىندەگى اگەنتتىگى اراسىندا مۋزەيلەردى قايتا جوندەۋدەن وتكىزۋ جونىندەگى كەلىسىمگە قول قويىلعانى ايتىلادى. بىراق تۇرىك تاراپى جوعارى لاۋازىمدى تۇلعالار "ارالاسىپ جاتىر" دەپ جۇمىستى اتقارۋدان باس تارتقان. "ارالاستى" دەگەن شەنەۋنىكتەر ىشىندە سول كەزدە قىرعىزستاننىڭ پرەزيدەنت اپپاراتىن باسقارعان ساپار يساكوۆتىڭ دا اتى-ءجونى بولعان.
وسى اپتادا ارنايى قىزمەت "بىشكەك قالاسىنداعى جەس-ءتى مودەرنيزاتسيالاۋ" ءىسى بويىنشا تەرگەۋدى اياقتاعانىن مالىمدەگەن. بۇل ءىس بويىنشا مەملەكەتكە 111,2 ملن دوللار شىعىن كەلگەنى ايتىلادى.
2018 جىلدىڭ 5 ماۋسىمىندا يساكوۆ "بىشكەك قالاسىنداعى جەس-ءتى مودەرنيزاتسيالاۋ" بويىنشا كوررۋپتسياعا قاتىسى بار دەگەن كۇدىكپەن ۇستالعان. وعان "پرەزيدەنت اپپاراتى جەتەكشىسىنىڭ ورىنباسارى بولىپ تۇرعاندا، شەتەلدىك كومپانيانىڭ مۇددەسىن قورعادى" دەگەن ايىپ تاعىلعان.
يساكوۆ بولسا وزىنە تاعىلعان ايىپتاردى مويىنداماي، ساياسي استارى بار دەپ بىلەدى.
Abai.kz
