وتكەن اپتادا “UNNITY Corporation” جشس قۇرىلتايشىسى، “APPORT” ءموبيلدى قوسىمشاسىن ويلاپ تاپقان IT مامانى قۋانىش جاقسىباەۆ التى جارىم جىلعا باس بوستاندىعىنان ايىرىلدى. ول تاۋار مەن قىزمەت تۇرلەرىن جارنامالاۋدىڭ جاڭا قوسىمشاسىن ىسكە قوسىپ، كاسىپكەرلەردىڭ بيزنەسىن جارنامالاۋعا ۇلكەن كومەك جاساعان. الايدا، ول جۇمىسى مەملەكەتتىك ورگاندار تاراپىنان كەدەرگىلەرگە تاپ بولىپ، وعان قارجىلىق پيراميدا ۇيىمداستىردى دەپ ايىپ تاعىلعان بولاتىن.  

وتاندىق IT تەحنولوگيالىق ونىمدەردى ازىرلەۋمەن اينالىساتىن  “UNNITY Corporation” كومپانياسى اقتوبە قالاسىندا تىركەلگەن. كومپانيا ءوز ونىمدەرىنە قارجى تابا الماعان سوڭ، حالىقارالىق تاجىريبەنى نەگىزگە الا وتىرىپ، جوبانى كراۋدفاندينگ جۇيەسى بويىنشا قارجىلاندىرعان. ناتيجەسىندە، كومپانياعا 3-4 ايدىڭ ىشىندە 40 مىڭعا جۋىق ادام سەرىكتەس بولىپ، اۋقىمى 21 مەملەكەتتى قامتىعان جۇمىستار ىستەلىپتى. ياعني، كومپانيا ويلاپ تاپقان “APPORT” قوسىمشاسى ارقىلى  40 مىڭعا جۋىق كاسىپكەر بيزنەسىن جارنامالاعان. ونداعى التى ايلىق جارناما قۇنى 35 مىڭ، ءبىر جىلدىق جارناما قۇنى 70 مىڭ تەڭگەنى قۇرايتىن كورىنەدى.

الايدا، جاقسىباەۆقا تاعىلعان ايىپقا جوبا سالىمشىلارى كەلىسپەيدى. ولاردىڭ ايتۋىنشا، جاقسىباەۆتىڭ ارەكەتىنەن ەشكىم دە زارداپ شەكپەگەن. تەرگەۋشىلەر جابىرلەنگەن ادامداردى قولدان جاساپ وتىر دەپ ەسەپتەيدى.

ال، كۇنى كەشە جۇزدەگەن ادامدى جۇمىسپەن قامتىپ، جىلىنا ون ميلليون تەڭگە سالىق تولەپ وتىرعان تۇركىستاندىق كاسىپكەر جولداس يساحوۆقا قارسى زاڭسىز قىسىم جاسالعانى تۋرالى اقپارات تارادى. وعان جالعان كاسىپكەرلىكپەن اينالىسقان كومپانيامەن ءىرى كولەمدە الىس-بەرىس جاساپ، سالىقتان جالتاردى دەگەن نەگىزسىز ايىپ تاعىلعان كورىنەدى. ءبىر قىزىعى، قۇزىرلى ورگانداردىڭ بۇل ايىپقا ەش دالەلى بولماعان. الايدا، 2015-تە تاعىلعان وسى ايىپ كومپانيانىڭ قارجىسىن بۇعاۋلاپ، جۇمىسىن تۇرالاتىپ تۇرعان كورىنەدى.

ەستەرىڭىزدە بولسا، بىلتىر الماتىلىق كاسىپكەر باقىت نيازوۆ تا كاسىبىنە تالعات مۇساباەۆتىڭ قىسىم جاساپ وتىرعانى تۋرالى باق بەتتەرىندە جاريالاعان بولاتىن.

ءتۇيىن.

قازاقستاندا قانشاما ءبىلىمدى جاستار ءوز يدەيالارىن جۇزەگە اسىرا الماي شەت ەلگە كەتىپ جاتىر. ال، كەرىسىنشە شەت ەلدەن العان ءبىلىمىن قازاقستاننىڭ IT سالاسىن دامىتۋعا ارنايمىن دەپ كەلگەن جاقسىباەۆتىڭ ءىستى بولىپ، التى جارىم جىلعا سوتتالۋى - جاستاردىڭ كەلەشەككە دەگەن كۇمانىن ارتتىراتىن سياقتى.

وسىلايشا جاڭا تەحنولوگيانى مەڭگەرگەن جاستار مەن ەل دامۋىنا وزىنشە ۇلەس قوسىپ جاتقان كاسىپكەرلەر قۇزىرلى ورگاندار تاراپىنان  قىسىم كورىپ جاتىر. بۇل -  پرەزيدەنتتىڭ كاسىپكەرلەردى قولداۋ ءھام “تسيفرلى قازاقستان” سەكىلدى جوبالارىنا جاسالعان قيانات ەمەس پە؟

نۇربيكە بەكسۇلتانقىزى

Abai.kz