سيريادان 47 ادامدى قايتارىپ الدىق. كىم نە دەسە و دەسىن، مەن بۇل قادامدى قولدايمىن. ماعان وپەراتسيانىڭ اتاۋى ەرەكشە ۇنادى. جۋسان. قانداي تاماشا جانە ماعىنالى. قازاق ءۇشىن جۋساننىڭ قادىرى مول. كەزىندە سول سيرياعا ءامىرى ءجۇرىپ، بيلىك ەتكەن بابامىز بەيبارىس تا جۋساننىڭ ءيىسىن اڭساپ وتكەن دەسەدى. جۋساندى ساعىنعانى قىپشاق دالاسىن، قازاق جەرىن اڭساعانى عوي.

ال بۇگىن سول جۋساننان جالعان جيھادتى ارتىق كورگەندەردى كەرى قايتاردىق. جاڭىلىپ، اداسقاندارعا قايتا مۇمكىندىك سىيلادىق. ارينە، قاتە قادام جاسامايتىن ادام جوق. ساناسى ۋلانىپ، جات اعىمنىڭ جەتەگىندە كەتكەندەرگە قولدى ءبىر سىلتەسەك تە بولار ەدى. بىراق وندا ءبىزدىڭ قازاقتىعىمىز قايدا قالادى؟! قازاقتان بەزىپ، تۇماندى تاعدىردا اداسقان جانداردى كەرى قايتارىپ، قازاقى ورتاعا قايتا قوسساق - ۇلى جەڭىس سول بولماق. ول تەك قانا سيرياعا كەتىپ، ساندالعاندارعا عانا قاتىستى ەمەس. تىلىنەن بەزىپ، ۇلتىنان اينىپ، تاريحىنان قاشقاندارعا دا قاتىستى دۇنيە.