قوعامدىق، ساياسي جانە پاتريوتتىق كۇشتەر قۇرىلتايىنىڭ اتقارۋشى كوميتەتى كونستيتۋتسيالىق رەفورما جاساۋ تۋرالى جوبا دايىنداعان.
بىشكەكتە 15 قاڭتاردا وتكەن كەزدەسۋدە قوعامدىق قۇرىلتاي وكىلى ازىمبەك بەكنازاروۆ ورىس ءتىلىنىڭ رەسمي مارتەبەسىنە قاتىستى بىلاي دەدى:
"ورىس ءتىلى كەرەك. بىراق حالىقارالىق ماڭىزى بار ءتىل رەتىندە عانا قاجەت. بۇل ءتىل بالاباقشادا اعىلشىن ءتىلى سەكىلدى شەت ءتىلى رەتىندە وقىتىلۋى ءتيىس. مەملەكەتتىك ءتىل - قىرعىز ءتىلى بولىپ قالۋى قاجەت. ءىس قىرعىز تىلىندە عانا جۇرگىزىلۋى كەرەك. وسىنداي شارا قابىلداماساق، قىرعىز ءتىلى جويىلادى".
باستاماشىل توپ كونستيتۋتسيالىق رەفورما تۋرالى زاڭ جوباسىندا رەفەرەندۋمدى بيىل 24 قاراشادا وتكىزۋدى ۇسىنىپ وتىر.
قىرعىزستان كونستيتۋتسياسىندا ورىس ءتىلى رەسمي ءتىل مارتەبەسىنە يە. قالالاردا ءىس قاعازدارى مەن قىزمەت كورسەتۋ ورىس تىلىندە جۇرگىزىلەتىنىنە قوعامنىڭ بەلگىلى ءبىر توبى ريزا ەمەس.
Abai.kz
