«ەكسيمبانك قازاقستان» اق-نى ماجبۇرلەپ تاراتۋ تۋرالى سوت شەشىمى زاڭدى كۇشىنە ەندى. بۇل تۋرالى قر ۇلتتىق بانكىنىڭ ءباسپاسوز قىزمەتى مالىمدەدى.

«16 قاڭتاردا الماتى قالالىق سوتى الماتى قالاسىنىڭ مامانداندىرىلعان اۋدانارالىق ەكونوميكالىق سوتىنىڭ «ەكسيمبانك قازاقستان» اق-نى ماجبۇرلەپ تاراتۋ تۋرالى 2018 جىلعى 28 قاراشاداعى شەشىمىنە «قازاقتەلەكوم» اق-نىڭ شاعىمىن قاناعاتتاندىرۋسىز قالدىردى. وسىلايشا، ماەس-تىڭ «ەكسيمبانك قازاقستان» اق-نى ماجبۇرلەپ تاراتۋ تۋرالى 2018 جىلعى 28 قاراشاداعى شەشىمى 2019 جىلعى 16 قاڭتاردا زاڭدى كۇشىنە ەندى»، - دەلىنگەن حابارلامادا.

ۇلتتىق بانكتىڭ مالىمەتىنشە، جەكە تۇلعالار مەن جەكە كاسىپكەرلەرگە «ەكسيمبانك قازاقستان» اق-داعى سالىمدارعا، اعىمداعى شوتتارعا جانە تولەم كارتالارىنا ورنالاستىرىلعان اقشا وتەلەدى. وتەماقى «قازاقستاننىڭ دەپوزيتتەرگە كەپىلدىك بەرۋ قورى» اق-نىڭ (قدكق) قاراجاتىنان جيناقتالعان سىياقىنى ەسكەرە وتىرىپ، بىراق دەپوزيتتەر بويىنشا كەپىلدىكتىڭ ەڭ كوپ سوماسىنان اسپايتىنداي سالىمنىڭ، بانك شوتىنداعى نەمەسە تولەم كارتاسىنداعى اقشا قالدىعىنىڭ سوماسى شەگىندە تولەنەتىن بولادى (تەڭگە دەپوزيتتەرى- 10 ملن تەڭگە، شەتەل ۆاليۋتاسىنداعى دەپوزيتتەر - 5 ملن تەڭگە، ءبىر سالىمشىنىڭ ءبىر ۋاقىتتا تەڭگە جانە شەتەل ۆاليۋتاسىنداعى دەپوزيتتەرى بويىنشا - 15 ملن تەڭگە).

ايتا كەتەر جايت، شەتەل ۆاليۋتاسىنداعى دەپوزيتتەر بويىنشا وتەماقى تەڭگەمەن تولەنەدى. وتەماقى سوماسىن ەسەپتەۋدە 2019 جىلعى 16 قاڭتارداعى نارىقتىق ايىرباستاۋ باعامى قولدانىلادى. زاڭعا سايكەس كەپىلدىك قورىنان دەپوزيتتەر بويىنشا كەپىلدى وتەماقى «قازپوشتا» ارقىلى تولەنەتىن بولادى.

«ەكسيمبانك قازاقستان» اق-نىڭ سالىمشىلارىنان ءوتىنىش قابىلداۋ جانە وتەماقى تولەۋ التى اي ىشىندە - 2019 جىلعى 4 اقپاننان باستاپ 4 تامىز ارالىعىندا جۇرگىزىلەدى.

ايتا كەتەرلىگى، 2019 جىلعى 4 تامىزعا دەيىن «قازپوچتا» اق-قا جۇگىنبەگەن سالىمشىلار اگەنتتىك كەلىسىمنىڭ قولدانىلۋى اياقتالعاننان كەيىن قدكق-قا تىكەلەي ءتيىستى ءوتىنىش بەرە وتىرىپ، وتەماقى الۋعا قۇقىلى.

سونداي-اق، وتەماقى الۋ ءتارتىبى تۋرالى، سونداي-اق وتىنىشتەر قابىلداناتىن «قازپوشتا» بولىمشەلەرىنىڭ مەكەنجايى تۋرالى اقپارات قوسىمشا جاريالاناتىن بولادى.

دەرككوز: قازاقپارات

Abai.kz