قازاقستان مۇسىلماندارى ءدىني باسقارماسى جانىنداعى «زەكەت» كورپوراتيۆتىك قايىرىمدىلىق قورى ساداقا، زەكەت بەرۋ جۇيەسىن وڭتايلاندىرۋ ماقساتىندا قوردىڭ ءموبيلدى قوسىمشاسىن ىسكە قوستى، - دەپ حابارلايدى اباي-اقپارات قمدب ءباسپاسوز قىزمەتىنە سىلتەمە جاساپ.

قوسىمشادا «زەكەتتى ەسەپتەۋ»، «زەكەت كىتابى»، «قور تۋرالى»، «ءبىزدىڭ ءىس-شارالار»، «ونلاين ساداقا جاساۋ»، «مۇقتاج جاندار بازاسى» سىندى باستى مازىرلەر ارقىلى قاجەتتى كەڭەستەر، اقپاراتتار مەن مالىمەتتەر الۋعا بولادى.

«ءموبيلدى قوسىمشانى ىسكە قوسۋداعى نەگىزگى ماقساتىمىز – قايىرىمدىلىق كومەك كورسەتۋگە، زەكەت بەرۋگە نيەت بىلدىرگەن ازاماتتارعا قولايلى مۇمكىندىك جاساۋ. قوسىمشاعا كومەككە اسا ءزارۋ جانداردىڭ ورتاق بازاسىن ەنگىزدىك. وندا ناۋقاستىڭ اتى-ءجونى، تۇرعىلىقتى مەكەن-جايى، مەديتسينالىق انىقتامالار، ت.ب. قاجەتتى قۇجاتتار جۇكتەلگەن. «ونلاين ساداقا جاساۋ» ءمازىرى ارقىلى اتالعان كىسىگە كومەك بەرە الاسىز. قوردىڭ باستى ۇستانىمى – ەلىمىزدە شاريعات (حانافي ءمازھابى نەگىزىندە) بويىنشا ساداقا-زەكەت بەرۋ ءداستۇرىن قالىپتاستىرۋ، قارجىلىق مولدىرلىكتى، بارىنە بىردەي اقشالاي اشىقتىقتى قامتاماسىز ەتۋ»، – دەيدى «زەكەت» قورىنىڭ ديرەكتورى تالعات وماروۆ.

تالعات سەيىتكارىمۇلىنىڭ ايتۋىنشا، ءموبيلدى قوسىمشانىڭ ءبىر ەرەكشەلىگى: اۆتوماتتى ەسەپتەگىش (كالكۋلياتور) قۇرالى زەكەت بەرۋ كورسەتكىشىنە جەتكەن مال-مۇلىكتىڭ، ياعني جيناقتالعان قارجىنىڭ زەكەتىن بىردەن انىقتايدى. ءموبيلدى قوسىمشانى «Play Mapكەت» جۇيەسى ارقىلى «قمدب زەكەت» ءسوزىن جازىپ، جۇكتەپ الۋعا بولادى.            

ايتا كەتەيىك، 2011 جىلى اشىلعان قمدب «زەكەت» قورى – جەكە جانە زاڭدى تۇلعالاردىڭ زەكەتتەرى مەن ساداقالارىن قابىلداپ، ونى شاريعات ۇكىمدەرىنە ساي ۇلەستىرەتىن كوممەرتسيالىق ەمەس ۇيىم. قوردىڭ قۇرىلتايشىسى – قازاقستان مۇسىلماندارى ءدىني باسقارماسى. ماقساتى – كومەككە اسا ءزارۋ جەكە تۇلعالاردى الەۋمەتتىك قولداۋ، يسلامنىڭ لايىقتى تۇردە ناسيحاتتالۋىنا قارجىلاي قولداۋ كورسەتۋ، ت.ب.

حالقىمىزدا: «قايىرىمدىلىق جاساساڭ – قايىرىن ءوزىڭ كورەسىڭ»، – دەگەن ناقىل بار. «زەكەت» كورپوراتيۆتىك قايىرىمدىلىق قورى 2018 جىلى رەسپۋبليكا بويىنشا 25 مىڭ جانۇياعا قايىرىمدىلىق كومەك كورسەتتى.

سونداي-اق، 5 مىڭعا جۋىق الەۋمەتتىك از قامتىلعان بالالاردى مەكتەپكە قاجەتتى قۇرال-جابدىقتارمەن، كيىم-كەشەكپەن قامتاماسىز ەتتى. مۇگەدەك بالالاردىڭ ەم-دومىنا قاراجات ءبولدى. وتكەن جىلى «ەل ۇلەسى پاتەرگە» جوباسى اياسىندا باسپاناعا اسا ءزارۋ 9 وتباسىنا پاتەر بەرىلدى. 1 جىلدا قايىرىمدىلىق باعىتىندا 160 ملن. تەڭگە قاراجات جۇمسالدى.

اللا تاعالا قۇراندا: «ءبىر جاقسىلىق ىستەگەن ادام ون ەسە ساۋاپقا يە بولادى» («انعام» سۇرەسى، 160-ايات), – دەپ بايانداعان. وسى رەتتە قمدب «زەكەت» قورى جومارت، قايىرىمدى جانداردى يگى، ىزگى، ساۋاپتى ءىس-شارالارعا بەلسەندى تۇردە ۇلەس قوسۋعا ۇندەيدى.

Abai.kz