مەملەكەتتىك حاتشى قازاقستان مەن ارمەنيانى تاريحي جانە مادەني قارىم-قاتىناستار بايلانىستىراتىنىن اتاپ ءوتتى. ەلدەرىمىزدىڭ ءوزارا جەمىستى ىنتىماقتاستىعى ەۋرازيا ەكونوميكالىق وداعى، ۇجىمدىق قاۋىپسىزدىك شارت ۇيىمى، تمد جانە باسقا دا ينتەگراتسيالىق بىرلەستىكتەر اياسىندا جۇزەگە اسىپ كەلەدى.

گۇلشارا ابدىقالىقوۆا گ.گالاچياندى پارلامەنتتىك سايلاۋدىڭ ءساتتى وتۋىمەن قۇتتىقتاپ، جاڭادان سايلانعان ارمەنيا پارلامەنتىنىڭ بەلسەندى قىزمەتى ەكى جاقتى سەرىكتەستىكتىڭ ودان ءارى نىعايا تۇسۋىنە وڭ ىقپال ەتەتىنىنە سەنىم ءبىلدىردى.

گ.ابدىقالىقوۆا ەكى ەلدىڭ ەۋرازيالىق ينتەگراتسيا اياسىنداعى ءوزارا ىقپالداستىعى ەكونوميكالىق بايلانىستاردى دامىتۋعا سەپتىگىن تيگىزەتىنىن ايتتى. 2018 جىلعى 10 ايدىڭ قورىتىندىسى بويىنشا، قازاقستان مەن ارمەنيا اراسىنداعى تاۋار اينالىمى 10,4 ميلليون دوللارعا جەتىپ، 19,5 پايىزعا ءوستى (ەكسپورت – 4,9 ملن دوللار، يمپورت – 5,5 ملن دوللار).

– قازاقستان مەن ارمەنيا قارىم-قاتىناستارىندا ءبىزدىڭ مادەني-گۋمانيتارلىق ىنتىماقتاستىعىمىزدىڭ ماڭىزى زور. مادەني، عىلىمي جانە سپورتتىق ءىس-شارالار تۇراقتى وتكىزىلىپ، جاستار جانە ءبىلىم مەكەمەلەرى اراسىندا تىعىز بايلانىس جولعا قويىلىپ كەلەدى. قازاقستاندا تۇرىپ جاتقان ارميان دياسپوراسى ءبىزدىڭ مادەني-گۋمانيتارلىق قاتىناسىمىزدىڭ دانەكەرى سانالادى، – دەدى مەملەكەتتىك حاتشى.

كەزدەسۋ سوڭىندا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا ارمەنيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى گ.گالاچيانعا ەكىجاقتى ءوزارا ىقپالداستىقتى ودان ءارى نىعايتۋ ىسىندە تابىس تىلەدى.

Abai.kz