ءبىز ەلباسىنىڭ قامقورلىعىمەن ءوسىپ كەلە جاتقان جاستارمىز. ونىڭ قولداۋىن ۇنەمى كورىپ كەلەمىز. مىسالى، ءوز باسىم وسى باعدارلاما ارقىلى شۆەيتساريادا ءبىلىم الدىم. وتكەن جىلى قالا اكىمى باۋىرجان بايبەكتىڭ قولداۋىمەن كوپتەگەن ستارتاپتار مەن بيزنەستەردى جۇزەگە اسىردىق. ءبىلىم سالاسى، قايىرىمدىلىق بولسىن جۇزەگە اسىرعان جوبالارىمىز جەتىپ ارتىلادى. ەلباسى ءوز سوزىندە جاس وتباسىن قولداۋ جايلى ايتتى. بۇل وتە وتكىر تۇرعان ماسەلە. ويتكەنى، ەلىمىزدەگى ءاربىر ءۇشىنشى وتباسىنىڭ شاڭىراعى شايقالۋدا. ەلباسى وسى ماسەلەنى سوڭعى كەزدەرى ءجيى كوتەرۋدە. بۇگىنگى جاستار وتباسىن قۇرۋعا اسىقپايدى. ەگەر وتاۋ كوتەرىپ جاتسا دا، ول ورتاسىنا ويراندالىپ تۇسۋدە. بۇل – الاڭداتارلىق ماسەلە. سول ءۇشىن جوعارى سىنىپ وقۋشىلارىنا ەلباسىنىڭ وسى تاقىرىپتا كۋرس ەنگىزۋدى ۇسىنعانىن قۇپ كورەمىن. بۇل ماسەلە توڭىرەگىندە ءبىز دە جوبا دايىنداعانبىز. جاستاردىڭ جاڭا ءومىر، جانۇيا قۇرۋىنا دايىندىقتى سانالى تۇردە جاساۋعا كومەكتەسۋىمىز كەرەك. ەر ادام مەن ايەل ادامنىڭ قارىم-قاتىناسى ىسكەرلىك قارىم-قاتىناس سياقتى ەمەس. وتە نازىك نيۋانستاردان تۇرادى. ول ءوز الدىنا ۇلكەن مەكتەپ. ءسال كەلىسپەۋشىلىك بولا قالسا، «مەن سەنسىز دە ءومىر سۇرە الامىن» دەگەندى ايتىپ، ەسىكتى تارس جابادى. ءبىز قازىر كوپشىلىگىمىز ماتەريالدىق يگىلىكتىڭ قۇلىنا اينالىپ بارا جاتىرمىز. اجىراسۋدىڭ تاعى ءبىر سەبەبى وسىندا جاتىر. جانۇيالىق ءومىردىڭ قۇندىلىقتارى – ماحاببات، سىيلاستىق سياقتى ىزگى قاسيەتتەردى الدىعا شىعارىپ، سولاردى كوبىرەك ناسيحاتتاۋىمىز قاجەت. بۇل ورايدا ءبىز باتىسقا ەلىكتەپ، ول جاقتان ۇلگى الا المايمىز. ولاردا ەر مەن ايەل تەڭ دەگەن ۇعىممەن ءومىر سۇرەتىندىكتەن، شىعىس ەلدەرىنە ءتان ايەل ادامنىڭ نازىك تابيعاتى ولارعا مۇلدە جات. سول ءۇشىن ءبىز وتكەن تاريحىمىزعا، اتا-بابامىزدىڭ سالت-داستۇرىنە جۇگىنەمىز. ەر ادامنىڭ جەكە باسىن قادىرلەپ، سىيلاۋ، ونى ۇنەمى تورگە شىعارۋ دەگەن قازاقتىڭ سالت-ءداستۇرىن ءبىز ۇمىتىپ بارامىز. مىنە، ءبىزدىڭ جاڭا جوبا ۇلتتىق قۇندىلىقتارعا باسا كوڭىل بولەدى.

بالا تاربيەسىنە كەلگەندە «بالاڭدى تاربيەلەيمىن دەسەڭ، الدىمەن ءوزىڭدى تاربيەلە» دەگەن ءسوز بار. بۇل بۇگىنگى كۇنى ترەندكە اينالعان ءوزىن دامىتۋ، ءوز-وزىمەن جۇمىس جاساۋ دەگەنگە كەلىپ تىرەلەدى. بيىل ءبىز وسىعان دەيىن جاساپ كەلگەن بيزنەس، جاس كاسىپكەرلىكتى دامىتۋ، ستارتاپتار بويىنشا جوبالارىمىزدى جالعاستىرامىز. بۇگىن ەلباسىنىڭ ءسوزىن مۇقيات تىڭداعان ادام بولسا، سول جەردە كوتەرىلگەن كوپتەگەن ماسەلەلەرمەن ءبىز جۇمىس جاساپ كەلەمىز. «بولاشاقتا» ءوزىمىزدىڭ سونداي بازامىز بار.

قىمبات ابدىكەرىموۆا

«بولاشاق» قاۋىمداستىعىنىڭ الماتى قالاسى بويىنشا ديرەكتورى

Abai.kz