شەكارا قىزمەتىنىڭ ءباسپاسوز حاتشىسى قاناتبەك سۇلتانوۆتىڭ 23 قاڭتاردا ازاتتىققا حابارلاۋىنشا، قايتىس بولعان ادام - جامبىل وبلىسىنىڭ تۇرعىنى، 1974 جىلى تۋعان. ول تەرگەۋ مۇددەسىنە بايلانىستى قايتىس بولعان ادامنىڭ اتى-ءجونىن ايتۋدان باس تارتتى. رەسمي مالىمەت بويىنشا، قايتىس بولعان ازامات بۇرىن "زاڭسىز قاساقانا مەملەكەتتىك شەكارانى بۇزدى" دەگەن ايىپپەن سوتتالعان.
شەكارا قىزمەتى قىرعىزستان شەكاراشىلارىنىڭ تالاس وبلىسىمەن شەكتەس "جاس وركەن" زاستاۆاسىنا جاقىن اۋماقتا "بىرنەشە جىلقىنى قىرعىزستاننان قازاقستانعا زاڭسىز ايداپ اكەتپەك بولعان بەلگىسىز ءۇش ادامعا قارۋ قولدانعانىن" حابارلاعان. قىرعىزستان جاعىنىڭ اقپاراتى بويىنشا، قىرعىز شەكاراشىلارى "جاس وركەن" زاستاۆاسىنا جاقىن اۋماقتا "شەكارا بۇزباق بولعان" بەلگىسىز ءۇش ادامدى ۇستاۋعا بارعان. بەلگىسىز ادامدار شەكاراشىلار وزدەرىن ۇستاماق بولعاندا "پىشاق شىعارىپ، قارسىلىق كورسەتكەن".
بۇدان سوڭ قىرعىز شەكاراشىلارى ەسكەرتۋ رەتىندە اۋەگە وق اتقان. بىراق ءۇش ادام شەكارا جاساعىنىڭ ەسكەرتۋىن ەلەمەي، قارسىلىق كورسەتە بەرگەن سوڭ شەكاراشىلار ولارعا وق اتىپ، بىرەۋىن جارالاعان. ەكى ادام قازاقستان اۋماعىنا قاراي ءوتىپ كەتكەن.
قاناتبەك سۇلتانوۆتىڭ سوزىنشە، قازىر قازاقستان شەكاراشىلارى "ەل اۋماعىنا بىرنەشە جىلقىنى ايداپ ءوتىپ، بوي تاسالاپ جۇرگەن" ەكى ادامدى ىزدەپ جاتىر.
Abai.kz
