ەلوردادا «استانافيلم» قۇرىلادى. بۇل تۋرالى قر مادەنيەت جانە سپورت ءمينيسترى ارىستانبەك مۇحامەديۇلى مالىمدەدى.

ەلباسى «كينەماتوگرافيا تۋرالى» قازاقستان رەسپۋبليكاسى زاڭىنا قول قويدى. ن.نازارباەۆتىڭ تاپسىرماسى بويىنشا «استانافيلم» جانە «قازاقفيلم» تەرريتورياسىندا ەركىن ەكونوميكالىق ايماق قۇرۋ قاراستىرىلعان. قر مادەنيەت جانە سپورت ءمينيسترى كينەماتوگرافيا سالاسىندا قانداي وزگەرىستەر بولاتىنىن ءتۇسىندىردى.

«بۇل اۋقىمدى قۇجات كينەماتوگرافيا سالاسىندا قۇقىقتىق نەگىز ورناتۋعا باعىتتالعان. زاڭ جوباسى ءۇش جىل بويى دايىندالىپ، جاسالىپ، ەندى بەكىتىلدى. بۇل كينو سالاسى ءۇشىن ماڭىزدى، نەگىزگى ءۇش مىندەت - ۇلتتىق كينو ءوندىرۋشىنى قولداۋ، ۇلتتىق كينونى پروكاتتا جىلجىتۋ، قازاقستاندىق كينونى الەمدىك كينو نارىعىنا بەلسەندى تۇردە شىعارۋعا باعىتتالعان وسى سالا ءۇشىن وتە ماڭىزدى زاڭ»، - دەدى ارىستانبەك مۇحامەديۇلى Facebook پاراقشاسىندا.

ەلىمىزدىڭ كينوكورسەتىلىمىندەگى بارلىق فيلمدەردى قازاق تىلىنە دۋبلياج جاساۋ، نە سۋبتيتر بەرۋ، نەمەسە كادردان تىس اۋدارمانى قامتاماسىز ەتۋ - قازاقستاندىقتاردىڭ ەڭ كۇتكەن نورماسى. اۋدارما كورسەتىلىم يەلەنۋشى ديستريبيۋتور ەسەسىنەن جاسالاتىن بولادى جانە تۇساۋكەسەر مەرزىمىنە اسەر ەتپەۋى كەرەك. اۋدارما تۇپنۇسقادان نەمەسە رەسەيلىك نارىق ءۇشىن ورىس تىلىنە تارجىمەلەنگەن نۇسقادان جاسالاتىن بولادى، مۇنى كورسەتىلىم يەلەنۋشى ءوزى شەشەتىن بولادى. كورسەتىلىمى شەكتەۋلى فيلمدەر عانا بۇل ەرەجەدەن تىسقارى بولادى. ۇلتتىق فيلمدەردىڭ كورسەتىلىمىنە كەلسەك، ولار قازاق تىلىندە بولادى، باسقا تىلدە قاجەتتىلىك تۋىنداعان جاعدايدا عانا كورسەتىلەدى.

«قىتاي مەن اقش-تا كورسەتىلىمدەگى فيلمدەردىڭ ءبارى اۋديتوريا تىلىندەگى سۋبتيترلەرمەن قامتاماسىز ەتۋ مىندەتتى ەكەنىن بۇرىن دا ۇلگى رەتىندە كەلتىرىپ ەدىم. بۇل - ەڭ وڭتايلى جانە پارمەندى مەحانيزمدەردىڭ ءبىرى. قازاقستانعا جىلىنا 300-دەن استام فيلم اكەلىنەدى جانە ولار قازاق تىلىندەگى نۇسقاسىز كورسەتىلەتىن. مۇنىڭ ءارتۇرلى سەبەپتەرى بار، سونىڭ ءبىرى - قۇقىق يەلەنۋشى ءۇشىن كاسىبي دۋبلياج جاساۋعا جۇمسالعان قارجى ەلىمىزدەگى كورسەتىلىمنەن تۇسكەن پايدادان اسىپ كەتۋى مۇمكىن»، - دەدى مينيستر.

سونىمەن قاتار، زاڭدا فيلمدەردى جاسقا قاراي جىكتەپ، سوعان سايكەس كاتەگوريا بەرىلۋىن، فيلمدەردى جۇيەلەپ، ەسەپكە الىپ، مونيتورينگ جۇرگىزەتىن بىرىڭعاي اۆتوماتتىق اقپاراتتىق جۇيە قۇرۋ قاراستىرىلعان. قابىلدانعان نورمالارعا سايكەس، قازاقستان جەرىندە فيلمدەردىڭ كورسەتىلىمى فەستيۆالدەردە، سەمينارلاردا، رەتروسپەكتيۆادان تىس جاعدايدا، فيلمدەردىڭ مەملەكەتتىك رەەسترىنە تىركەپ، كورسەتىلىم كۋالىگى نەگىزىندە رۇقسات ەتىلەدى.

«كينو وندىرىسىمەن اينالىساتىن ەلدەردىڭ وزات تاجىريبەسىنە سۇيەنە وتىرىپ، ۇلتتىق كينونى قولداۋ مەملەكەتتىك ورتالىعىن قۇرۋ قاراستىرىلدى. زاڭ كينەماتوگرافيانى مەملەكەت تاراپىنان قارجىلاي قولدايتىن وپەراتور بولىپ تابىلاتىن ۇلتتىق كينونى قولداۋ مەملەكەتتىك ورتالىعى جۇمىسىنىڭ قۇقىقتىق نەگىزىن ايقىندايدى»، - دەپ اتاپ ءوتتى ارىستانبەك مۇحامەديۇلى.

ۇلتتىق كينونى قارجىلاندىرۋدىڭ جاڭا مودەلى ىسكە اسادى. ءىرى كينووندىرۋشىلەردى قولداۋ جانە ينۆەستورلاردى تارتۋ ماقساتىندا سۋبسيديا تولەۋ، كينەماتوگرافيا سالاسىندا سالىق جەڭىلدىكتەرى، كينو قىزمەتىن ەسەپكە الۋ جانە مونيتورينگ جاساۋ اۆتوماتتىق اقپاراتتىق بىرىڭعاي جۇيە قۇرۋ، كينوكوللەكتسيالاردى تسيفرلاندىرۋ شارالارى قاراستىرىلعان. قازاقستان ۇكىمەتى جانىنان ۇلتتىق فيلمدەردى مەملەكەت تاراپىنان قارجىلاي قولداۋ تۋرالى ۇسىنىستار مەن ۇسىنىمدار ماسەلەسىمەن اينالىساتىن كونسۋلتاتيۆتىك-كەڭەسشى ورگان - ۇلتتىق فيلمدەردى مەملەكەت تاراپىنان قارجىلاي قولداۋ ماسەلەلەرى بويىنشا مەكەمەارالىق كوميسسيا قۇرىلادى.

دەرەككوز: turkystan.kz

Abai.kz