ءيا، ءبارىمىز دە جاس بولدىق. ونىڭ ۇستىنە، ءبىزدىڭ جاستىق شاعىمىز 80-جىلدارعا تاپ كەلىپ، بۇرىلىسى مەن قيىلىسى كوپ جولداردان وتۋگە ءماجبۇر بولعانىمىزدى دا جاسىرمايمىز. ويتكەنى سول جىلداردا الماتىدا جاستار اراسىندا قالىپتاسقان جاعدايدىڭ ءوزى سوعان جەتەلەيتىن. بىراق ول كەزدەگى جۇيە، يدەولوگيا، ءتىپتى سەبەپ تە باسقا بولاتىن. سونىڭ وزىندە ءدال مۇنداي سوراقىلىققا جول بەرىلمەۋشى ەدى. ءتىپتى ول كەزدە قازاقي ورتادا وسكەن بالالاردا ءبىر-بىرىنە دەگەن مەيىرىم، اياۋشىلىق دەگەن سەزىمدەردىڭ باسىم بولعانىن ەرەكشە اتاپ وتكەن ءجون.

ال قازىر تاۋەلسىز ەل اتانىپ، ءوز قولىمىز ءوز اۋزىمىزعا جەتكەندە، ءتىل، ءدىل، ءدىن سياقتى اسىل قۇندىلىقتارىمىز قايتا ۇستەمدىك قۇرعان شاقتا وسىنداي وقيعانىڭ بولۋى كوڭىلگە قاياۋ تۇسىرەدى. مۇنداي كەلەڭسىزدىكتىڭ ۇلكەنگە قۇرمەت، كىشىگە ىزەت كورسەتۋگە ۇگىتتەيتىن قازاقى تاربيەگە جات قىلىق ەكەنى بەلگىلى. سوندا ول بالالاردىڭ بەسىكتەن بەلى شىقپاي جاتىپ، ءبىر-بىرىنە وسىنشالىقتى وشىگۋلەرىنىڭ سەبەبى نە؟

مەنىڭشە، بۇل سۇراقتىڭ جاۋابى تىم تەرەڭدە جاتىر. الدىمەن، ءبىز قازىرگى تاڭدا قوعامداعى كەيبىر قۇندىلىقتاردىڭ قۇلدىراپ كەتكەنىن جانە بالا تاربيەسىندە اتا-انا مەن مەكتەپ اراسىنداعى ۇيلەسىمنىڭ ۇزىلگەنىن مويىنداۋىمىز كەرەك. وسى تۇيتكىلدەردىڭ الدىن الۋ ءۇشىن ماسەلەنىڭ سالدارىمەن عانا ەمەس، سەبەبىمەن دە كۇرەسۋدى قولعا العان ابزال. ياعني، جاسوسپىرىمدەرگە ارنالعان ءتۇرلى ۇيىرمەلەر مەن ورتالىقتار اشىپ، ولاردىڭ قولجەتىمدىلىگىن قامتاماسىز ەتۋدىڭ ماڭىزى زور. اسىرەسە، وسى ءۇردىس اۋىلدىق جەرلەردە جۇيەلى جولعا قويىلىپ، بالانىڭ مەكتەپتەن تىس ۋاقىتىن پايدالى نارسەگە جۇمساۋىنا جاعداي جاسالۋى ءتيىس.

راس، بۇل سالادا مەملەكەت تاراپىنان اۋقىمدى جۇمىستار اتقارىلىپ جاتىر. ەلباسى وسى باعىتتى ۇنەمى باستى نازاردا ۇستاپ كەلەدى. كەشەگى وتكەن «جاستار جىلىنىڭ» رەسمي اشىلۋ سالتاناتىندا دا مەملەكەت باسشىسى تاربيە ماسەلەسىنە ەرەكشە كوڭىل ءبولىپ، بالانى جوعارى سىنىپتاردان باستاپ ۇلكەن ومىرگە بەيىمدەۋدىڭ بەرەرى مول ەكەنىن ايتتى. سوندىقتان مەكتەپتەردە ءبىلىم بەرۋمەن بىرگە، وسكەلەڭ ۇرپاقتىڭ تۇلعا بولىپ قالىپتاسۋىنا، ولاردىڭ بويىنا دۇرىس قۇندىلىقتاردى سىڭىرۋگە باعىتتالعان كەشەندى جۇمىستار ىستەلۋى كەرەك.

ارينە، تاربيەنىڭ ەڭ باستى تابان تىرەيتىن جەرى وتباسى. سول سەبەپتى، بالا تاربيەسىندەگى نەگىزگى سالماق تا، جاۋاپكەرشىلىك تە اتا-اناعا جۇكتەلەدى. ءار اتا-انا وسىنى سەزىنىپ ارەكەت ەتۋى ءتيىس.

تۇيىندەپ ايتقاندا، مۇنداي جاعدايعا اتا-انا، مەكتەپ جانە تۇتاس قوعام بىردەي جاۋاپتى. سوندىقتان جاس بۋىننىڭ ومىردەن ءوز ورنىن تاۋىپ، ۇلاعاتتى ۇرپاق بولىپ قالىپتاسۋىنا اسا ءمان بەرىلىپ وتىرعان «جاستار جىلى» اياسىندا جاستاردى تاربيەلەۋگە باعىتتالعان يگى ىستەردىڭ ءساتتى جۇزەگە اسىرىلۋىنا بۇكىل قوعام بولىپ اتسالىسايىق.

ماۋلەن اشىمباەۆتىڭ facebook پاراقشاسىنان

Abai.kz