استانادا اقىن ءابدىلدا تاجىباەۆتىڭ 110 جىلدىق مەرەيتويىنا وراي «سەمسەر جىردىڭ قورعانى» اتتى پوەزيا كەشى ءوتتى.

اتالمىش ءىس-شارا ەلباسىنىڭ «ۇلى دالانىڭ جەتى قىرى» باعدارلامالىق ماقالاسىندا كوتەرىلگەن «ۇلى دالانىڭ ۇلى ەسىمدەرىنە» بايلانىستى ءابدىلدا تاجىباەۆتىڭ ەسىمىن دارىپتەۋ بولىپ تابىلادى. سونداي-اق، بيىل 2019 جىلى «ءبىر ەل - ءبىر كىتاپ» رەسپۋبليكالىق اكتسياسى اياسىندا اقىننىڭ ولەڭدەرىن وقۋ ءۇشىن تاڭداپ الىنعان بولاتىن.

ءىس-شارا قاتىسقان زيالى قاۋىم وكىلدەرى اقىننىڭ ءومىرى مەن شىعارماشىلىعى جايىندا اڭگىمەلەر قوزعاپ، قالامگەر جايلى ەستەلىكتەرىمەن ءبولىستى.  قازاقستاننىڭ حالىق جازۋشىسى ساكەن ءجۇنىسوۆتىڭ قارىنداسى روزا ءجۇنىسوۆا اقىن ءابدىلدا تاجىباەۆتىڭ كوزىن كورىپ، سىرلاس بولعانىن ايتسا، اقىن باقىتجان توباياقوۆ ءا.تاجىباەۆتى بالا كەزىنەن بەرى تانيتىنىنى، اقىل-كەڭەستەرىن تىڭداعانى جونىندە ايتىپ ءوتتى. مەكتەپ وقۋشىلارى اقىنىڭ ولەڭدەرىنەن ءۇزىندى وقىدى.

ءابدىلدا تاجىباەۆ - قازاق اقىنى، دراماتۋرگ، فيلولوگيا عىلىمدارىنىڭ دوكتورى، پروفەسسور، قازاقستاننىڭ حالىق جازۋشىسى، «جاڭا ىرعاق»، «ارالدار»، «كەشەدەن بۇگىنگە»، «جارتاس»، «جاڭا ورىمدەر»، «قۇرداستار»، «تولاعاي»، «جارتاس»، «جالعىز اعاش ورمان ەمەس» اتتى كوپتەگەن ەڭبەكتەردىڭ اۆتورى.

ءا.تاجىباەۆ «ولەڭ جانە پوەزيا»، «قازاق دراماسىنىڭ تۋىلۋى جانە قالىپتاسۋى» تاقىرىبىنداعى مونوگرافيالارىندا قازاق پوەزياسىنىڭ جانە دراماسىنىڭ وزەكتى ماسەلەلەرىن كەڭىنەن جاريالادى.

ونىڭ ادەبي-تانىمدىق ماقالالارى، «جىلدار مەن ويلار»، «حاتتار ءسوزى»، «ءومىر مەن ەرلىك» اتتى ەسسەلەرى جارىق كوردى.

ءىس شارا قر ۇلتتىق اكادەميالىق كىتاپحاناسى جانە قازاقستان جازۋشىلار وداعى استانا فيليالىمەن بىرلەسىپ ۇيىمداستىرىلدى.

Abai.kz