حح عاسىر حالقىمىز ءۇشىن جاۋىرىندى مۇزداتار جاۋىزدىقتارىمەن عانا ەمەس، جۇرەكتى جىلىتار جاقسىلىقتارىمەن دە ەستە قالدى. مادەنيەت پەن سپورت سالاسىنداعى مارقاسقا تۇلعالارىمىز وتكەن عاسىردىڭ وزىندە-اق ەل نامىسىن تۋ ەتىپ كوتەرگەن ەدى. سولاردىڭ ءبىرى قازاق سپورتىنىڭ ساڭىلاعى تيمۋر سەگىزباەۆ بولاتىن.

قازاق فۋتبولىنىڭ قارا شاڭىراعى سانالاتىن سەمەي وڭىرىندە تۋعان تيمۋر سانجارۇلى ءبىزدىڭ دە الادوپتا الىنباعان ەنشىمىز بار ەكەنىن دالەلدەپ بەردى. ءبىز سەكىلدى فۋتبولعا كەش كەلگەن حالىق ءۇشىن تيمۋرداي ءبىر ۇلدىڭ تۋعانى دا ماقتان. تەڭبىل دوپتا وزگەمەن تەرەزەسىن تەڭەستىرۋ مىندەتى دە انە سول تيمۋرلاردىڭ مويىنىندا!

الماتىنىڭ ورتالىق ستاديونىنا «قايراتتىڭ» ويىنىن تاماشالاۋعا بارا قالساڭىز كورەرمەندەر قاتارىندا جاسى جەتپىستەن اسىپ، سەكسەنگە تاياعان تالاي كونەكوز جانكۇيەردى كورەسىز. قارتايعان جاستارىنا قاراماي «قايرات» دەپ ۇرانداعاندا جانايقايلارى جاستاردى باسىپ وزادى. ءدال وسى فۋتبول سۇيەر اعالارىمزدى بۇگىنگى يساەل نەمەسە ءارشاۆيننىڭ جانكۇيەرلەرى دەۋگە تىپتەن قيمايسىڭ. مەنشە ولار وتكەن عاسىردا ۇلت نامىسى بولعان “حالىق كومانداسى - قايراتتىڭ” قولداۋشىلارى. انىقىراق ايتقاندا، تيمۋر سەگىزباەۆتاردىڭ سيقىرلى ونەرىنە اربالعاندار ەكەنى ءسوزسىز.

وداقتاس رەسپۋبليكالار اراسىندا رەسەيدىڭ فۋتبولى باسقالارىنا قاراعاندا كوش ىلگەرى بولدى. ءتىپتى كسرو قۇراماسى الەمدەگى الپاۋىت ۇجىمداردىڭ ءبىرى بولعان. الايدا وداق قۇرامىنداعى قازاقستان سەكىلدى بودان ەلدەردىڭ سپورتى وزىق بولا قويعان جوق. دەسە دە، مىڭ جەردەن ماسكەۋگە باعىندى دەگەنىڭىزبەن، ەل نامىسى ءسوز بولعان جەردە ءار ۇلت ءوز ۇلىنىڭ شاشباۋىن كوتەرەتىن. سودان دا بولار «قايرات» كورشىلەس ەلدەردىڭ كومانداسىمەن كەزدەسۋ وتكىزگەندە بۇكىل قازاقستاندىقتار تاقىمىن قىسىپ، تىلەۋىن تىلەيتىن بولعان.

ارينە، «قايرات» تا ەل ءۇمىتىن جەرگە تاستاماعان كورىنەدى. وزبەكتىڭ «پاحتاكورىنا» تىزەسىن باتىرىپ، ماسكەۋلىك كوماندالارمەن دە كۇش سىناسىپ تۇراتىن. سونداي ساتتە كوماندا ساپىندا جاسىنداي جارقىلداعان تيمۋر سەگىزباەۆ بار قازاقتىڭ ماقتانىشى بولعان دەسەدى. قازاق ەجەلدەن ء“بىر ۇلىن ماقتاسا توبەسىن كوككە تيگىزەتىن، جامانداسا باسىن جەرگە جەتكىزەتىن” حالىق. انە سول حالىقتىڭ ماحابباتىنا بولەنگەن سەگىزباەۆ ەسىمى قازاقتىڭ سايىن دالاسىندا اڭىز بولىپ ەسكەن كورىنەدى. اقكوڭىل حالىق سۇيگەن ۇلىن ماقتاعاندا ماسكەۋلىكتەرىڭ جولدا قالىپ، تۋرا اتاقتى پەلەنىڭ وزىمەن قاتار قويعان ەكەن. “تيمۋر دوپتى قاقىراتا تەپكەندە قارسىلاس قاقپاسى قاق ايىرلادى” دەپ اڭىز ەتەتىن بولعان.

سولاي دەمەگەندە قايتسىن؟! بوتەنگە بودان بولىپ، وزگەگە ەسەسى كەتىپ جۇرگەن حالىق وزىنەن تۋعان ءبىر ۇلدىڭ باسقادان وزا شاپقانىن كورگەندە قالاي قۋانباسىن؟! كسرو فۋتبول الەمىندە تيمۋر سەگىزباەۆتىڭ جارق ەتىپ شىعا كەلۋى قازاق حالقىنىڭ ايبىنىن اسىرىپ، مەرەيىن ءبىر كوتەرگەنى شىندىق. ونىڭ اتاقتى «سپارتاك» سىندى كوماندالارعا گول سوعۋىن ءار قازاق ءوز جەڭىسى رەتىندە قابىلداعانى ءسوزسىز. ءدال سول ساتتەگى قۋانىش بۇگىنگى ءبىزدىڭ گەننادي گولوۆكيننىڭ جەڭىسىنە قۋانعانىمىزدان الدەقايدا اسەرلى بولسا كەرەك.

ول زاماندا فۋتبولشىلار بۇگىنگىدەي اقشا ءۇشىن، اتاق ءۇشىن وينامايتىن. جانكۇيەرلەر دە فۋتبولدى بۇگىنگىدەي قىزىق ءۇشىن، بولماسا بۋكمەكەرلىك كەڭسەلەردەن اقشا ۇتىپ الۋ ءۇشىن كورمەيتىن. ويىنشىلار ەل مەن جەردىڭ نامىسى ءۇشىن جاسىل الاڭدا جانىن سالسا; كوپ كورەرمەن سولاردىڭ ءتىلۋىن تىلەپ جاندارىن شۇپەرەككە ءتۇيىپ وتىراتىن. وسى ءسوزىمىزدىڭ دالەلى ءۇشىن ايتا كەتەيىك، «قايراتقا» قولداۋ كورسەتۋ ءۇشىن ءسابيت مۇقانوۆ، ءابدىلدا تاجىباەۆ، شاكەن ايمانوۆ، تۇمانباي مولداعاليەۆ سىندى ۇلتتىڭ ۇلى تۇلعالارى ورتالىق ستاديونعا ءجيى باراتىن بولعان. وسىنداي ادال جانكۇيەرلەرى ءۇشىن تيمۋر سەگىزباەۆ، قۇرالبەك ورداباەۆ، سەيدىلدا بايشاقوۆتار دا بار شەبەرلىكتەرىن شىعارۋعا تىرىساتىن.

سولدان وڭعا قاراي: سەرگەي ۆولگين، تيمۋر سەگىزباەۆ، ۆاحيد ماسۋدوۆ

تيمۋر سەگىزباەۆ بار بولعانى 29 جاسىندا جاسىل الاڭعا قوش ايتقان. جاراقات سەبەبىنەن. بىراق، فۋتبولداعى سول قىسقا عۇمىرىنىڭ وزىندە شەبەرلىگىنە تالايدى ءتانتى ەتىپ ۇلگىرگەن. ءتىپتى، بودان ۇلتتى وڭاي-وسپاق ماقتاي بەرمەيتىن ماسكەۋلىك مامانداردىڭ ءوزى تيمۋر اعانىڭ ونەرىنە تامسانىپ، تالاي ماقالا جازعانىن تاريح بەتتەرى راستاپ وتىر. ول كىسىنىڭ ويىن مانەرى جايلى جازعان مامانداردىڭ كوبى، “30-40 مەتر الىستان گولدىق پاستار شىعارۋدى ۇناتاتىن، كەيدە سونداي قاشىقتىقتان قاقپاعا سوققى دا باعىتتاپ تۇراتىن” دەيدى. ءارى پاستارىنىڭ وتە ءدال، سوققىلارىنىڭ سۇراپىل بولعانىن ەستەلىك ەتىپ ايتادى. وسى جەردە قازىرگى فۋتبول سۇيەر قاۋىمعا تۇسىنىكتى بولۋ ءۇشىن ايتا كەتەيىك، ءسىز ونەرىنە تامسانىپ جۇرگەن لۋكا مودريچ، كريستيان ەريكسوندارىڭىزدىڭ ويىن ءستيلى سول ءبىزدىڭ تيمۋر اعاعا ۇقسايتىن بولسا كەرەك.

سەگىزباەۆتىڭ سيقىرلى ونەرىن ەندى ساعىنا ەسكە الامىز. ول كىسىنىڭ باقيلىق بولعانىنا دا ءبىر جىلدان استام ۋاقىت ءوتتى. قايعىسى مەن قۋانىشى قاتار جۇرەتىن قازاق وسىدان ءبىر جىل بۇرىن، تاۋەلسىزدىك مەرەكەسى قارساڭىندا قازاقتان شىققان العاشقى كاسىبي فۋتبولشى تيمۋر سانجارۇلى سەگىزباەۆتى سوڭعى ساپارعا اتتاندىرعان بولاتىن. ەل ەسىندە قالعان ەسىل ەر، قازاق فۋتبولىنىڭ قارا نارىنا قانداي قۇرمەت كورسەتسە دە لايىق. وسى ورايدا، سوڭعى كەزدەرى ءجيى ايتىلىپ جۇرگەن الماتىداعى "ورتالىق ستاديونعا" تيمۋر سەگىزباەۆتىڭ ەسىمىن بەرسەك دەگەن ۇسىنىستى قولدايتىنىمىزدى ايتا كەتەيىك.

قۋانىش قاپپاس 

Abai.kz

فوتو: uefa.com, sportsffa.kz