كونستيتۋتسيانىڭ 42-بابى 3-تارماعىندا "پرەزيدەنت وكىلەتتىگى جاڭادان سايلانعان ەل پرەزيدەنتى قىزمەتىنە كىرىسكەن كەزدەن باستاپ، سونداي-اق پرەزيدەنت قىزمەتىنەن مەرزىمىنەن بۇرىن بوساتىلعان نەمەسە كەتىرىلگەن نە ول قايتىس بولعان جاعدايدا توقتاتىلادى. رەسپۋبليكانىڭ بۇرىنعى پرەزيدەنتتەرىنىڭ ءبارى، قىزمەتىنەن كەتىرىلگەندەردەن باسقاسى، قازاقستاننىڭ ەكس-پرەزيدەنتى دەگەن اتاعى بولادى" دەپ جازىلعان.
كونستيتۋتسيالىق كەڭەس زاڭ بويىنشا ءوتىنىشتى تۇسكەن كۇننەن باستاپ ءۇش اي ىشىندە قارايدى. ەگەر ماسەلە كەيىنگە قالدىرۋعا بولمايتىن، شۇعىل قارالۋى كەرەك بولسا كەڭەس پرەزيدەنتتىڭ تالاپ ەتۋى بويىنشا وتىنىشكە ون كۇندە جاۋاپ قايتارادى.
نۇرسۇلتان نازارباەۆ قازاقستاندى 30 جىلعا جۋىق باسقارىپ كەلەدى. ول رەسمي مالىمەت بويىنشا 2015 جىلعى پرەزيدەنت سايلاۋىندا 97 پايىز داۋىس الىپ، بەسىنشى رەت سايلانعان.
2018 جىلى ول قازاقستاندىق جۋرناليستەرگە بەرگەن سۇحباتىندا "قازاقستاندا كەزەكتەن تىس سايلاۋ جوسپارلانباعانىن" ايتقان. ال بىلتىر فينلياندياعا بارعان ساپارىندا "الداعى پرەزيدەنت سايلاۋىنا قاتىسۋ-قاتىسپايتىنى تۋرالى كەيىن جاريالايتىنىن، 2020 جىلعا دەيىن ءالى ۋاقىت بارىن" ايتقان.
كونستيتۋتسيا بويىنشا، كەزەكتى پرەزيدەنت سايلاۋى 2020 جىلى جەلتوقسان ايىنىڭ العاشقى جەكسەنبىسىندە وتەدى.
Abai.kz
