مەملەكەت جەكە تۇلعالاردىڭ سالىقتاردى ۋاقىتىلى تولەۋىنە ءتۇرلى قولايلى جاعدايلار جاساپ وتىر. ماسەلەن، بۇگىنگى تاڭدا ءاربىر جەكە تۇلعا ەشقايدا بارماي-اق، ۇيىندە وتىرىپ ەلەكتروندى ۇكىمەت پورتالى مەن مەملەكەتتىك كىرىستەر كوميتەتىنىڭ سايتىندا وزدەرىنىڭ جەكە سايكەستەندىرۋ نومىرلەرى ارقىلى قانداي سالىقتارىنىڭ بار ەكەنىن، ونىڭ قاشان پايدا بولعانىن، قاشان تولەۋ كەرەكتىگى تۋرالى اقپاراتتاردى بىلە الادى. بۇدان وزگە، قارجى ۆيتسە-ءمينيسترىنىڭ ايتۋىنشا، وڭتايلاندىرۋ شارالارى وسىمەن توقتاپ قالعان جوق، قىزمەتتەر ساپاسى بىرتىندەپ جاقسارتىلىپ جاتىر.

«بيىلدان باستاپ جەكە تۇلعالار egov.kz پورتالى مەن مەملەكەتتىك كىرىستەر كوميتەتىنىڭ سايتى ارقىلى الداعى ۋاقىتتا قانداي سالىقتار تولەۋ كەرەك بولاتىنى تۋرالى اقپاراتتى كورە الادى. سونداي-اق، وسى جىلدان باستاپ SMS-حابارلامالار ارقىلى قانداي سالىق بەرەشەكتەرى بار، قانداي سالىقتار الداعى ۋاقىتتا تولەنۋى كەرەك دەگەن حابارلامالار تاراتاتىن بولامىز»، — دەدى قارجى ۆيتسە-ءمينيسترى ق. باەدىلوۆ.

بۇدان وزگە، ۆيتسە-ءمينيستردىڭ ايتۋىنشا، سينگاپۋر جانە ەۋروپا مەملەكەتتەرىنىڭ وزىق تاجىريبەلەرىن ەسكەرە وتىرىپ، 1414 بىرىڭعاي بايلانىس ورتالىعىنا قوڭىراۋ شالىپ، جەكە كاسىپكەرلەر، جەكە تۇلعالار قانداي سالىق بەرەشەگى بار ەكەنى تۋرالى اقپاراتپەن قوسا، كەدەن جانە سالىقتار تۋرالى باسقا دا سۇراقتارعا جاۋاپ الا الادى. وسىعان وراي ءتيىستى بىلىكتىلىگى بار ماماندار دايارلانىپ جاتىر. اتالعان جۇمىستى دا 2-3 ايدان كەيىن ىسكە اسىرۋ كوزدەلگەن.

قارجى ۆيتسە-ءمينيسترى سالىق تولەۋشىلەردىڭ سالىق مادەنيەتىن دە ارتتىرۋ قاجەتتىگىن، سالىق تولەۋشىلەرمەن اراداعى كەرى بايلانىستى قامتاماسىز ەتۋ ءۇشىن مەملەكەتتىك ورگاندار تاراپىنان ءتيىستى جۇمىستار جۇرگىزىلىپ جاتقانىن اتاپ كورسەتتى.

سونىمەن قاتار، ق. باەدىلوۆتىڭ ايتۋىنشا، 2018 جىلدىڭ ەكىنشى جارتى جىلدىعىنان باستاپ قارجى مينيسترلىگىندە اپپەلياتسيالىق كوميسسيا جۇمىس ىستەپ جاتىر. ونىڭ قۇرامىنا تەك قارجى مينيسترلىگىنىڭ قىزمەتكەرلەرى ەمەس، سونداي-اق قر ۇلتتىق ەكونوميكا مينيسترلىگى مەن «اتامەكەن» ۇكپ وكىلدەرى كىرەدى.

«اپپەلياتسيالىق كوميسسيا وتىرىستارىندا سالىق جانە كەدەن داۋلارى قاراستىرىلىپ، ءادىل شەشىمدەر قابىلدانادى»، — دەدى قارجى ۆيتسە-ءمينيسترى.

ءوز سۇحباتىندا قارجى ۆيتسە-ءمينيسترى ق. باەدىلوۆ، اتالعان شەشىمدەر قارجى مينيسترلىگىنىڭ سايتىندا جاريالاناتىنىن ايتتى جانە وسى شەشىمدەر سالىق تولەۋشىلەر ءوز قىزمەتتەرىن جۇزەگە اسىرۋ بارىسىندا جىبەرەتىن قاتەلىكتەردى بولدىرماۋدىڭ الدىن الۋعا ۇلكەن كومەگىن تيگىزەدى دەپ كەڭەس بەردى.

Abai.kz