قىرعىزستان پارلامەنتى "قىرعىز رەسپۋبليكاسىنىڭ كەيبىر زاڭ اكتىلەرىنە (سۋ كودەكسى، "سۋ جونىندەگى" زاڭ) وزگەرىستەر ەنگىزۋ جونىندەگى زاڭ جوباسىن ەكىنشى وقىلىمدا قاراپ جاتىر. تالقىلاۋ بارىسىندا وزبەكستان مەن قازاقستانعا سۋدى اقىلى ەتۋ ماسەلەى تاعى كوتەرىلدى.

- قىرعىز سۋ قويماسىنان جىل سايىن 22 ملرد تەكشە مەتر سۋ وزبەكستان مەن قازاقستانعا اعادى. ياعني سۋدىڭ 80 پايىزى كورشىلەرگە كەتەدى. تاياۋدا ءبىز توقتاعۇل سۋ قويماسىن جوندەۋدەن وتكىزۋگە 450 ملن دوللار قارجى قاراستىردىق. نەگە ۇكىمەت وسى اقشانى كورشىلەردەن سۇرامايدى؟ - دەدى دەپۋتات ۇمبەتالى قىدىراليەۆ.

اۋىل شارۋاشىلىعى ءمينيسترىنىڭ ورىنباسارى جانىبەك كەريماليەۆ ەگەر پارلامەنت اتالعان زاڭ جوباسىن قابىلداسا، وندا كورشىلەردەن سۋدى پايدالانعانى ءۇشىن اقشا تالاپ ەتە الامىز دەپ جاۋاپ بەردى.

كەريماليەۆتىڭ ايتۋىنشا، قازاقستان وسىعان دەيىن سۋدى قولدانعانى ءۇشىن 75 ملن تەڭگە (197 مىڭ 474 دوللار) تولەپ كەلسە، قازىر 119 ملن تەڭگە (313 مىڭ 326 دوللار) تولەيدى.

قارجى ءمينيسترىنىڭ ورىنباسارى ۋلۋكبەك كاريمشاكوۆ كورشى ەلدەر قازىر سۋ قويماسىنىڭ جوندەۋ جۇمىستارى ءۇشىن عانا اقشا بەرەتىنىن ايتادى.

2007-2008 جىلدارى سۋدى پايدالانۋدى رەتتەۋ ماسەلەسى كوتەرىلگەن. ەندى قازىر قىرعىز پارلامەنتى قاراپ جاتقان زاڭ جوباسى قابىلدانسا، قازاقستان مەن وزبەكستان قىرعىز سۋىن پايدالانعانى ءۇشىن اقشا تولەيتىن بولادى.

Abai.kz