مەملەكەت باسشىسىنا تاجىكستان رەسپۋبليكاسىنىڭ توتەنشە جانە وكىلەتتى ەلشىسى حايرۋللو يبودزودا، جاپونيانىڭ توتەنشە جانە وكىلەتتى ەلشىسى تاتسۋحيكو كاساي، چەح رەسپۋبليكاسىنىڭ توتەنشە جانە وكىلەتتى ەلشىسى رۋدولف گيكل، حورۆاتيا رەسپۋبليكاسىنىڭ توتەنشە جانە وكىلەتتى ەلشىسى رەفيك شابانوۆيچ جانە ۆەتنام سوتسياليستىك رەسپۋبليكاسىنىڭ توتەنشە جانە وكىلەتتى ەلشىسى نگۋەن تحي حونگ وان سەنىم گراموتالارىن تاپسىردى. بۇل تۋرالى اقوردانىڭ رەسمي سايتى جازدى.

نۇرسۇلتان نازارباەۆ ەلشىلەردى قازاقستانداعى ديپلوماتيالىق ميسسيالارىنىڭ رەسمي تۇردە باستالۋىمەن قۇتتىقتاپ، ولاردىڭ قىزمەتى ەلىمىزدەگى ماڭىزدى رەفورمالاردىڭ جۇزەگە اسىرىلۋ كەزەڭىمەن تۇسپا-تۇس كەلىپ وتىرعانىن اتاپ ءوتتى.

– ءبىزدىڭ ماقساتىمىز – الەمدەگى وزىق دامىعان 30 ەلدىڭ قاتارىنا قوسىلۋ. قازاقستاننىڭ كەلەشەگى زاماناۋي تەحنولوگيانى جەتە مەڭگەرگەن وسكەلەڭ ۇرپاقتىڭ قولىندا. سوندىقتان، وسى جىلدى «جاستار جىلى» دەپ جاريالادىم، – دەدى قازاقستان پرەزيدەنتى.

مەملەكەت باسشىسى جاستاردى ساپالى بىلىممەن، جۇمىسپەن جانە باسپانامەن قامتاماسىز ەتۋ ءۇشىن ءتيىستى شارالار قابىلدانىپ جاتقانىن اتاپ ءوتتى.

نۇرسۇلتان نازارباەۆ بيزنەس احۋالىن جاقسارتۋ، شەتەلدەن ينۆەستيتسيا تارتۋ جانە قازاقستان ەكسپورتىنىڭ باعىتتارىن كەڭەيتۋ ءۇشىن بىرقاتار باعدارلامانىڭ جۇزەگە اسىرىلىپ جاتقانى جونىندە ايتتى.

قازاقستان پرەزيدەنتى حالىقارالىق كۇن تارتىبىندە تۇرعان وزەكتى ماسەلەلەرگە دە توقتالدى.

– جەتەكشى يادرولىق دەرجاۆالار اراسىنداعى تەكەتىرەس الەم جۇرتشىلىعىن الاڭداتىپ وتىر. وسى ورايدا، ورتا جانە كىشى قاشىقتىقتاعى زىمىرانداردى جويۋ تۋرالى شارتتىڭ بۇزىلۋ قاۋپىن ەرەكشە اتاپ وتكىم كەلەدى. بەيبىتشىلىكتى قالايتىن ەلدەر جاھاندىق جاڭا اپاتتىڭ بولۋىنا جول بەرمەي، ونىڭ الدىن الۋى قاجەت، – دەدى مەملەكەت باسشىسى.

نۇرسۇلتان نازارباەۆ قازاقستاننىڭ بىتىمگەرشىلىك قىزمەتىنىڭ ناتيجەلەرىن ەرەكشە اتاپ ءوتىپ، الەمدە يادرولىق قارۋدى تاراتپاۋ ءۇشىن قابىلدانعان شارالاردىڭ ماڭىزدىلىعىنا نازار اۋداردى.

قازاقستان پرەزيدەنتى ەلشىلەرگە ارنالعان سوزىندە مەملەكەتارالىق دوستىق قاتىناستاردى نىعايتۋ جانە ىلگەرىلەتۋ قاجەتتىگىن ايتتى.

– ءبىز تاجىكستانمەن ءداستۇرلى ىنتىماقتاستىق پەن ستراتەگيالىق سەرىكتەستىكتى دامىتۋعا زور ءمان بەرەمىز. استانا مەن دۋشانبە اراسىنداعى تمد، ۇجىمدىق قاۋىپسىزدىك شارت ۇيىمى، شانحاي ىنتىماقتاستىق ۇيىمى جانە باسقا دا حالىقارالىق قۇرىلىمدار اياسىنداعى ىنتىماقتاستىقتى قارقىندى نىعايتۋدامىز. وسى رەتتە، تاجىكستاننىڭ ازياداعى ءوزارا ىقپالداستىق پەن سەنىم شارالارى كەڭەسىندەگى توراعالىعىنا تابىس تىلەي وتىرىپ، اتالعان باعىتتا بىرگە جۇمىس ىستەۋگە دايىن ەكەنىمىزدى ايتقىم كەلەدى، – دەدى مەملەكەت باسشىسى.

نۇرسۇلتان نازارباەۆ قازاقستان مەن جاپونيا اراسىنداعى قاتىناستاردىڭ ناتيجەلەرىنە جانە ونى دامىتۋ پەرسپەكتيۆالارىنا توقتالدى.

– بىلتىر بريۋسسەلدە وتكەن اسەم سامميتىندە پرەمەر-مينيستر سيندزو ابەمەن جۇزدەسىپ، ەكى مەملەكەت اراسىنداعى قاتىناستاردى ودان ءارى نىعايتۋعا ۋاعدالاستىق. 2018 جىلى ءوزارا ساۋدا اينالىمى 30 پروتسەنتكە ءوستى. ءبىز جاپون كومپانيالارىنىڭ قازاقستان نارىعىنا اتسالىسۋىنا مۇددەلىمىز جانە قاجەتتى جاعداي جاساۋعا دايىنبىز، – دەدى قازاقستان پرەزيدەنتى.

مەملەكەت باسشىسى چەحيا پرەزيدەنتى ميلوش زەماننىڭ «ەكسپو-2017» كورمەسىنە كەلۋى ەكى جاقتى بايلانىستىڭ دامۋىنا تىڭ سەرپىن بەرگەنىن اتاپ ءوتتى.

– ءوزارا ءتيىمدى ەكونوميكالىق بايلانىستار ورناتۋ ەكى ەل ءۇشىن دە ماڭىزدى. ۇكىمەتارالىق كوميسسيانىڭ الەۋەتىن پايدالانۋىمىز قاجەت دەپ ويلايمىن، – دەدى قازاقستان پرەزيدەنتى.

مەملەكەت باسشىسى قازاقستان مەن حورۆاتيا اراسىنداعى ىنتىماقتاستىقتىڭ ناتيجەلەرىنە دە توقتالدى.

– سوڭعى جىلدارى حورۆاتيا رەسپۋبليكاسىمەن بايلانىستارىمىز ايتارلىقتاي نىعايا ءتۇستى. مەن وسى ەلدىڭ پرەزيدەنتتەرىمەن ءاردايىم جاقسى قارىم-قاتىناستا بولدىم. بىلتىر استانادا العاش رەت حورۆاتيا ەلشىلىگى اشىلدى، – دەدى مەملەكەت باسشىسى.

ءراسىم بارىسىندا نۇرسۇلتان نازارباەۆ قازاقستان مەن ۆەتنام اراسىنداعى قاتىناستاردىڭ تيىمدىلىگىن اتاپ ءوتتى.

– بۇگىندە ۆەتنام – قازاقستاننىڭ وڭتۇستىك-شىعىس ازياداعى نەگىزگى ارىپتەستەرىنىڭ ءبىرى. ءبىز ەكونوميكالىق جانە ساياسي قاتىناستارىمىزدى جوعارى دەڭگەيدە دامىتۋ جونىندەگى جۇمىستاردى ودان ءارى جالعاستىرا بەرۋگە نيەتتىمىز، – دەدى نۇرسۇلتان نازارباەۆ.

سوڭىندا قازاقستان پرەزيدەنتى ەلشىلەردى جاۋاپتى ميسسيالارىنىڭ باستالۋىمەن تاعى دا قۇتتىقتاپ، ديپلوماتيالىق قىزمەتتەرىنە تابىس تىلەدى.

Abai.kz