مەملەكەت باسشىسىنىڭ جارلىعىمەن 2019 جىل جاستار جىلى بولىپ جاريالانعانى بەلگىلى. وسىعان وراي قازاقستان رەسپۋبليكاسى كاسىپوداقتار فەدەراتسياسى جاستاردىڭ ەڭبەك نارىعىنداعى مۇمكىندىكتەرىن ارتتىرىپ، ولارعا كەشەندى تۇردە قولداۋ كورسەتۋ ساياساتىن ۇستانىپ وتىر.

كاسىپوداقتار فەدەراتسياسى توراعاسىنىڭ ورىنباسارى ساتىبالدى داۋلەتالين «كەلەشەك» جاستار قوزعالىسى بەلسەندىلەرىمەن كەزدەستى. وندا اڭگىمەنىڭ باستى ارقاۋى ەلىمىزدەگى كاسىپوداق جۇيەسىندە جاستاردىڭ ءرولى مەن ولاردىڭ وسى ۇيىمعا قارىم-قاتىناسىن جاقسارتۋ جايلى بولدى.

كەزدەسۋدى اشقان س.داۋلەتالين كاسىپوداق قىزمەتىن رەفورمالاۋ مەن جاڭعىرتۋ شەڭبەرىندە جاستارمەن جۇمىستى جۇيەلى جانە بەلسەندى جۇرگىزۋگە باسا نازار اۋدارىلعانىن ايتتى.

ال قر قوعامدىق دامۋ مينيسترلىگى وتباسى جانە جاستار ءىسى جونىندەگى كوميتەت توراعاسىنىڭ مىندەتىن اتقارۋشى اسحات ورالوۆ مەملەكەتتىك جاستار ساياساتىنىڭ باسىم باعىتتارىن ايتىپ بەردى. ول جاستاردى ساپالى بىلىممەن قامتاماسىز ەتۋ، ولاردىڭ جۇمىسقا ورنالاسۋى مەن كاسىپكەرلىكپەن اينالىسۋىنا لايىقتى جاعداي جاساۋ، عىلىمي-تەحنيكالىق الەۋەتتى ارتتىرۋ ماسەلەلەرىنە توقتالدى.

بۇل ءىس-شارا ەڭبەك جاستارىن قولداۋ باعىتىنداعى جوبالاردى تالقىلاپ، كرەاتيۆتى يدەيالاردى ورتاعا سالعان ءتيىمدى ديالوگ الاڭىنا اينالدى.

جاستاردىڭ ەڭبەك نارىعىنداعى باسەكەلەستىگىن ارتتىرۋ مەن ولاردىڭ ەلىمىزدەگى ەڭبەك-الەۋمەتتىك سالاسىنا كەڭىرەك اتسالىسۋىنا مۇمكىندىك جاساۋ، جاستاردىڭ زاڭدى قۇقىقتارى مەن مۇددەلەرىن قورعاۋ ءۇشىن جاستار كەڭەستەرى جەتەكشىلەرى جانە مەملەكەتتىك-قوعامدىق ۇيىمدار اراسىنداعى  ءوزارا بايلانىستى دامىتۋ تۋرالى دا وي-پىكىر قوزعالدى.

ەلىمىزدىڭ ماڭىزدى الەۋمەتتىك-ەڭبەك ماسەلەلەرىن شەشۋ مەن وسىعان بايلانىستى مەملەكەتتىك ساياساتتى قالىپتاستىرۋ بارىسىندا جاستاردىڭ دا لايىقتى ۇلەسى بولۋى كەرەك. جاستار جەتەكشىلەرى وسىنداي پىكىردە.

جاستاردىڭ اراسىنان كاسىپوداق قوزعالىسىنىڭ جەتەكشىلەرىن دايارلاۋ مەن جاس جۇمىسشىلاردى كاسىپوداق قاتارىنا تارتۋ دا نەگىزگى اڭگىمە وزەگى بولدى.

كاسىپوداق ۇيىمدارىنداعى جاستار قوزعالىسىنىڭ بۇگىنگى تاڭداعى جۇمىسىنا تالداۋ جاساعان «كەلەشەك» جاستار كەڭەسىنىڭ توراعاسى تولەگەن كۇنادىلوۆ كاسىپوداقتىڭ دەربەس جاستار قوزعالىسىن قۇرۋ جونىندە ۇسىنىس ايتتى. بۇل قازاقستانداعى ەڭبەك جاستارىنىڭ ماسەلەلەرىمەن اينالىساتىن، ولاردى بىرىكتىرەتىن العاشقى ۇيىم بولماق.

-بۇل مەملەكەتتىك جاستار ساياساتى تۇجىرىمداماسىن جۇزەگە اسىرۋعا ەرەكشە سەرپىن بەرىپ، الەۋمەتتىك تۇعىرنامانى كەڭەيتۋگە مۇمكىندىك جاسايدى، - دەپ ەسەپتەيدى ت.كۇنادىلوۆ.

سونىمەن بىرگە ەڭبەكتى قورعاۋ مەن قاۋىپسىزدىگىن ناسيحاتتاۋدىڭ، جاس جۇمىسشىلار مەن ولاردىڭ وتباسىلارىنا ۇجىمدىق جانە ەڭبەك كەلىسىم-شارتتارى ارقىلى قولداۋ كورسەتۋدىڭ جاڭا قادامدارى جايلى دا ۇسىنىستار ايتىلدى.

-وسى كەزدەسۋ كاسىپوداقتىڭ قاتارىندا جالىندى دا كرەاتيۆتى جاستاردىڭ كوپ ەكەندىگىن كورسەتىپ بەردى. وسىنداي ادامدار ەڭبەك جاستارىنىڭ الەۋەتىن كوتەرۋگە، ەلىمىزدىڭ ءوسىپ-وركەندەۋى مەن جالپىعا ورتاق ەڭبەك قوعامى يدەياسىن تولىق جۇزەگە اسىرۋعا قابىلەتتى، - دەپ اتاپ كورسەتتى س.داۋلەتالين.

سونىمەن بىرگە ول جاستار ساياساتىنا بايلانىستى پاراديگمالاردى وزگەرتەتىن ۋاقىت جەتكەنىن، جاستار اراسىندا كاسىپوداق قوزعالىسىنىڭ برەندى مەن تانىمالدىلىعىن ارتتىرۋ، ولاردىڭ ىشىنەن كادر رەزەرۆىن قالىپتاستىرۋدىڭ قاجەتتىگى تۋرالى  دا ايتىپ ءوتتى.

سونداي-اق س.داۋلەتالين جاس كاسىپكەرلەردىڭ بيزنەس باستامالارى مەن ستارتاپ-جوبالارىنا قولداۋ كورسەتۋ، كاسىپوداق قىزمەتىندە يننوۆاتسيالىق تەحنولوگيالاردى كەڭ قولدانۋ كەرەكتىگىنە دە باسا نازار اۋداردى.

Abai.kz