قازاقتا ءبارى بار. بىراق ءبىر نارسە جەتىسپەيدى. ەرلەر. قازاق قوعامى ءوز باسىن كۇيتتەيتىن قاتىنداردان شارشادى.

قازاق وتباسى - ەرلەردى تۋدىرىپ، ولاردى ەر رەتىندە تاربيەلەي الماي جاتىر. قازاق وتباسىندا ءۇش-اق اڭگىمە ايتىلادى: جاقسى وقى، جاقسى قىزمەتكە تۇراسىڭ، جاقسى جالاقى الاسىڭ. بۇل قانداي اڭگىمە؟ بۇل - قاتىندىق اڭگىمە.

قاتىن دەپ كىمدى ايتامىز؟ قاتىن دەپ ءوزىنىڭ ءناپسىسىن تىيا الماعان ادامدى ايتامىز. قاتىن - نە ەركەك، نە ۇرعاشى بولۋى مۇمكىن. قاتىن بۇل جەردە جىنىستىق اتاۋ ەمەس، رۋحاني اتاۋ. شاتاستىرماڭىزدار. قاتىندىق اڭگىمە - ەشقاشان تويمايتىن، تولمايتىن، اشكوز - دەنە(تان)- ءناپسى- قاتىن- دۇشپاننىڭ توڭىرەگىندەگى اڭگىمە. "قاتىن- دۇشپان جىگىتتەر، نە دەمەس دەيسىڭ سىرتىمنان" (ماحامبەت).

ال، ەر دەپ كىمدى ايتامىز؟ ءوزىنىڭ ءتان قۇمارلىقتارىن ء(ناپسىسىن) جەڭە بىلگەن ادامدى ايتامىز. قازاق قوعامى قازىر قاي كەزەڭدە دە ەل تاريحىندا شەشۋشى ءرول اتقارعان ەرلەرگە - تۇلعالارعا ءزارۋ. ەرلەردىڭ جوقتىعىنان قازاق اناسى جىلاپ كوشەگە شىقتى! ءوز قامىن عانا ويلايتىن قاتىندار - قازاقتىڭ وسكەنىن، ونگەنىن قالامايدى! ولاردىڭ ويىندا ءبىر-اق شارۋاسى- ىشسەم، جەسەم، ۇيىقتاسام.

ال ەل ءۇشىن تۋىپ، ەل ءۇشىن ولەتىن ەرلەر قايدا؟ "قاتىن باستاعان كوش قاراڭ قالادى" دەيدى دانا قازاق. قازاقتىڭ ۇلى كوشى قاراڭ قالىپ جاتىر. قاراڭ قالماعاندا نەسى قالدى؟! قازاق كوشىنىڭ باستاۋ بۇلاعى، ەلدى وسىرەتىن، الىپتى دا، پرەزيدەنتتى دە، ءمينيستردى دە، ەلدىڭ ۇستىنەن كۇن كورگەن دەپۋتات-شەنەۋنىكتى دە تار قۇرساعىن كەڭىتىپ، تاس ەمشەگىن ءجىبىتىپ ومىرگە اكەلگەن، ۇلى ءومىر سىيلاعان قازاق اناسى جىلاپ كوشەگە شىقتى.

قازاق قوعامى ءوزى تۋدىرعان قاتىندار وسى قوعامنىڭ تۇبىنە جەتپەك! رۋحسىزدىقتىڭ، 27 جىل بويى قارىن ماسەلەسىن(ەكونوميكا) ءبىرىنشى ورىنعا قويعان قاتە ساياساتتىڭ ۋلى، اششى جەمىسى!

ومار جالەلۇلىنىڭ facebook پاراقشاسىنان

Abai.kz