باۋىرجان بايبەك مۇگەدەك بالالارى بار وتباسىلارعا بەرىلەتىن ادرەستىك كومەكتى ۇلعايتۋ جانە تۇرمىسى تومەن وتباسىلاردىڭ ەكىنشى بالاسىنان باستاپ بالا باقشا شىعىنىنىڭ وتەماقىسىن تولەۋ شارالارىن قاراستىرۋدى تاپسىردى

نۇر وتان» پارتياسى قالالىق فيليالىنىڭ كەزەكتەن تىس كونفەرەنتسياسىندا الماتى اكىمى باۋىرجان بايبەك قۇرامىنا مەملەكەتتىك جاردەماقى، ادرەستىك كومەك، الەۋمەتتىك تولەم، دەمەۋشىلىك كومەك، ەڭبەكپەن قامتۋ جانە باسقالارى ەنگەن قولداۋدىڭ كەشەندى شارالارىن اتاپ ءوتتى.

«ۇيدە مۇگەدەك بالالاردى وقىتۋعا كەتەتىن شىعىندى وتەۋ ءۇشىن بەرىلەتىن وتەماقى مەن ومىرلىك قيىن جاعدايعا تاپ بولعان كەزدە بەرىلەتىن ءبىر رەتتىك ادرەستىك كومەك كولەمىن ۇلعايتۋدى قاراستىرعان ءجون. ەگەر وتباسى كوپبالالى بولسا، وندا بالدىرعاندى بالا باقشاعا ورنالاستىرۋ دا قيىن. تۇرمىسى تومەن كوپبالالى وتباسىلاردىڭ ەكىنشى بالاسىنان باستاپ بالا باقشاعا كەتەتىن شىعىننىڭ وتەماقىسىن تولەۋ ماسەلەسىن  زەرتتەۋ قاجەت»، - دەدى باۋىرجان بايبەك.

ايتا كەتەرلىگى، الماتى اكىمى كوپبالالى وتباسىلارعا زاڭنامالىق جانە پسيحولوگيالىق كەڭەستەر، رەابيليتاتسيالىق كومەك كورسەتەتىن «باقىتتى وتباسى» ورتالىعىن قۇرۋدى تاپسىردى. بۇل ءبىر تەرەزە قاعيداسى بويىنشا جۇمىس جاسايتىن سەرۆيستىك ورتالىق بولىپ تابىلادى، وسى ارقىلى كوپبالالى انالاردى جۇمىسقا ورنالاسا الادى. بۇدان وزگە، مەگاپوليس باسشىسى 4 جانە ودان كوپ بالالارى بار وتباسىلاردىڭ تۇرعىن ءۇي الۋ ءۇشىن تولەنەتىن العاشقى جارناسىنىڭ تولەمىن سۋبسيديالاۋ مۇمكىندىكتەرىن قاراستىرۋدى تاپسىردى.

الماتى قالاسى اكىمىنىڭ تاپسىرماسى بويىنشا كوپبالالى وتباسىلارعا بەرىلەتىن ادرەستىك كومەكتىڭ كولەمىن ۇلعايتۋ، ىستىق جانە سۋىق سۋ ەسەپتەگىش قوندىرعىلارىن ورناتۋعا كەتەتىن شىعىندارعا وتەماقى بەرۋ ماسەلەسى قاراستىرىلادى.

الەۋمەتتىك ءال-اۋقات، ستراتەگيا جانە بيۋدجەت باسقارمالارىنا جانە باسقا دا قۇزىرلى ورگاندارعا ءبىر اپتا ىشىندە وسى ماسەلەلەر بويىنشا جۇمىس جاساۋ جانە ناقتىلى ۇسىنىستار ايتۋ تاپسىرىلدى.

Abai.kz