پارلامەنت سەناتىنىڭ ءبىر توپ دەپۋتاتتارى «عىلىم قورى» اكتسيونەرلىك قوعامىنىڭ گرانتىمەن قارجىلاندىرۋ اياسىندا ءوز جاڭالىقتارىن كوممەرتسيالاندىراتىن عالىمدار جانە كاسىپكەرلەرمەن كەزدەستى.

كەزدەسۋ بارىسىندا «عىلىم جانە (نەمەسە) عىلىمي-تەحنيكالىق قىزمەت ناتيجەلەرىن كوممەرتسيالاندىرۋ تۋرالى» زاڭدى ىسكە اسىرۋ ناتيجەلەرى تالقىلاندى.

كەزدەسۋگە ءبىلىم جانە عىلىم مينيسترلىگىنىڭ، «عىلىم قورى» اق وكىلدەرى جانە عىلىمي-تەحنيكالىق قىزمەت قورىتىندىلارىن گرانتتىق قارجىلاندىرۋ ارقىلى كوممەرتسيالاندىرۋ بويىنشا جوبالارىن ىسكە اسىرىپ كەلە جاتقان عالىمدار مەن كاسىپكەرلەر قاتىستى.

قازىرگى ۋاقىتتا عىلىم قورى كاسىپورىننىڭ تەحنولوگيالىق مىندەتتەرى مەن كوممەرتسيالاندىرۋ ءۇشىن الەۋەتى جوعارى عىلىمي جاڭالىقتار تۋرالى اقپاراتتى جيناقتاپ وتىر. عىلىم قورى بۇل تۇرعىدا تەحنولوگيالىق جاڭالىق تابۋشىلار مەن ولاردىڭ الەۋەتتى تۇتىنۋشىلارى اراسىندا ىنتىماقتاستىق ورناتۋعا كومەك كورسەتۋدە.

كەزدەسۋ بارىسىندا سەنات دەپۋتاتتارىنا عىلىم قورى قولداپ وتىرعان عىلىمي قىزمەت قورىتىندىلارىن كوممەرتسيالاندىرۋ جوبالارىن ىسكە اسىرۋ ناتيجەلەرى ۇسىنىلدى. بۇگىنگى كۇنى جۇزەگە اسىپ وتىرعان 153 جوبانىڭ 23-ءى ءوندىرىس كەزەڭىنە ءوتتى جانە ءونىمدى ساتۋدان تۇسكەن تابىس 852 ميلليون تەڭگەدەن استى.

سەناتور ب.ءايتىموۆا كەزدەسۋدە عىلىمي جانە عىلىمي-تەحنيكالىق قىزمەت قورىتىندىلارىن كوممەرتسيالاندىرۋ سالاسىنداعى زاڭناما بازاسىن ودان ءارى جەتىلدىرۋ قاجەتتىگى تۋرالى اتاپ ءوتتى.

دەپۋتات ا.بەيسەنباەۆ عىلىمي جاڭالىقتاردى كوممەرتسيالاندىرۋ بويىنشا جۇمىستى ودان ءارى جالعاستىرۋ جانە جاس عالىمداردىڭ جوباسىن بەلسەندى قولداۋ قاجەتتىگى تۋرالى ۇسىنىس ايتتى. ودان باسقا، قازىرگى كەزدە ەلىمىزدە وتاندىق جاڭاشىلدارعا ءوز ونىمدەرىن ەكسپورتقا شىعۋعا مۇمكىندىك بەرەتىن بيزنەس-عىلىم-مەملەكەت – تۇعىرناماسى جاسالعانى اتاپ ءوتىلدى.

كەزدەسۋ ناتيجەسى بويىنشا 2015 جىلى قابىلدانعان «عىلىم جانە (نەمەسە) عىلىمي-تەحنيكالىق قىزمەت ناتيجەلەرىن كوممەرتسيالاندىرۋ تۋرالى» زاڭ عىلىم مەن بيزنەسكە جاڭا مۇمكىندىكتەر اشاتىنى ايتىلدى. ەلىمىزدە عىلىمي قىزمەت قورىتىندىلارىن كوممەرتسيالاندىرۋ جۇيەسى قالىپتاسىپ، وڭ ناتيجە بەرىپ وتىر جانە بولاشاقتا ەكونوميكا سالاسىنداعى ءبىلىمدى قالىپتاستىرۋعا وڭ ىقپال ەتەتىن بولادى.

قازاقستان رەسپۋبليكاسى پارلامەنتى
سەناتىنىڭ ءباسپاسوز قىزمەتى

 Abai.kz