نۇرسۇلتان نازارباەۆ كەزدەسۋدە جوبانىڭ ەكىنشى كەزەڭىنە قاتىسۋشىلاردىڭ جەتىستىكتەرىمەن تانىستى. بۇل تۋرالى اقوردانىڭ رەسمي سايتى جازدى.

مەملەكەت باسشىسى سويلەگەن سوزىندە قازاقستاننىڭ مەملەكەتتىلىگى مەن ەگەمەندىگىن نىعايتۋ جولىندا جاستارىمىزدىڭ الەۋەتىن پايدالانۋدىڭ ماڭىزدى ەكەنىن اتاپ ءوتتى.

– ءبارىڭىز دە – تاۋەلسىزدىكتىڭ پەرزەنتىسىزدەر. ءبىز – بابالارىمىزدىڭ ارمانىن جۇزەگە اسىرعان ۇرپاقپىز. ەندى سىزدەردىڭ ۋاقىتتارىڭىز كەلدى. مۇنى ۇمىتپاۋعا تيىسسىزدەر، – دەدى نۇرسۇلتان نازارباەۆ.

ەلباسى تاۋەلسىز قازاقستاننىڭ قالىپتاسۋ تاريحىنا توقتالىپ، جاستار ءۇشىن اشىلعان مۇمكىندىكتەر تۋرالى اڭگىمەلەدى.

قازاقستان پرەزيدەنتى ەلىمىزدىڭ ءبىلىم جانە عىلىم سالاسىنىڭ دامۋ قارقىنىن ساقتاۋدىڭ ءارى ونى ەسەلەي ءتۇسۋدىڭ ماڭىزدىلىعى تۋرالى ايتتى.

– جاساندى ينتەللەكت، اقپاراتتىق تەحنولوگيالار، بيوينجەنەريا، نانوتەحنولوگيا – وسى يننوۆاتسيانىڭ ءبارى ءبىزدى العا جەتەلەيدى. سوندىقتان ءبىز ستارتاپ جوبالارى ءۇشىن ەكسپو پاۆيلوندارىنىڭ بىرىندە جاڭا زەرتحانالار اشتىق، – دەدى مەملەكەت باسشىسى.

ەلباسى جوباعا قاتىسۋشىلاردىڭ جەتىستىكتەرىنە توقتالىپ، جاستاردىڭ تۇلعالىق جانە كاسىبي تۇرعىدان ءوسۋى ءۇشىن ءوز مۇمكىندىكتەرى مەن ۋاقىتىن ءتيىمدى پايدالانۋدىڭ ماڭىزدى ەكەنىن اتاپ ءوتتى.

– ءبارى دە ادام مەن ونىڭ ەرىك-جىگەرىنە بايلانىستى. ءبىز ارمانداي بىلۋگە جانە كوزدەگەن ماقساتىمىزعا جەتۋ ءۇشىن ارەكەت ەتۋگە ءتيىسپىز. بۇل بايقاۋعا قاتىسۋشىلار – وسكەلەڭ ۇرپاق ءۇشىن ۇلگى-ونەگە. سىزدەر ءوز ەڭبەكتەرىڭىزدىڭ ناتيجەلەرى ارقىلى بۇل ومىردە بارىنە دە قول جەتكىزۋگە بولاتىنىن كورسەتتىڭىزدەر، – دەدى نۇرسۇلتان نازارباەۆ.

قازاقستان پرەزيدەنتى باس قالامىز – استانانىڭ سالىنۋ تاريحى جونىندە ەگجەي-تەگجەيلى اڭگىمەلەدى.

ەلوردا – بۇل، ەڭ الدىمەن، ادامدار. مۇندا وزىق مەديتسينالىق كلاستەر قۇرىلىپ، كەرەمەت وپەرا تەاترى مەن بىرەگەي سپورت كەشەندەرى بوي كوتەردى. استانانىڭ دامۋ دەڭگەيى مەن تۇرعىندارىنىڭ تۇرمىس ساپاسى ارتىپ كەلەدى، – دەدى مەملەكەت باسشىسى.

نۇرسۇلتان نازارباەۆ ەلىمىزدى دايەكتى دامىتۋ ىسىندەگى بەلسەندى جاستاردىڭ ءرولىن اتاپ ءوتتى.

– سىزدەردىڭ ارقايسىڭىز قازاقستاننىڭ بولاشاعىنا ۇلەس قوسىپ كەلەسىزدەر. كەلەشەگىمىز ءبىلىمدى، وزىنە سەنىمدى، بىرنەشە ءتىلدى مەڭگەرگەن ازاماتتاردىڭ قولىندا. وعان سىزدەردىڭ مۇمكىندىكتەرىڭىز جەتەدى، – دەدى قازاقستان پرەزيدەنتى.

مەملەكەت باسشىسى ۇلتتىق ەكونوميكانى دامىتۋ جانە ءوسىمنىڭ جاڭا كوزدەرىن اشۋ ءۇشىن قابىلدانىپ جاتقان شارالارعا توقتالدى.

– ەگەر ءبىز پايدالى قازبالارعا ءۇمىت ارتاتىن بولساق، وندا قاراجاتسىز قالامىز. سوندىقتان، ەكونوميكانى وزگەشە قالىپتاستىرۋعا مۇمكىندىك بەرەتىن يندۋستريالاندىرۋ پروتسەسىن ىسكە اسىرۋدى باستادىق. التى جىل ىشىندە 1200 زاۋىت پەن فابريكا سالدىق. بۇل جۇمىستى جالعاستىرا بەرەمىز، – دەدى نۇرسۇلتان نازارباەۆ.

قازاقستان پرەزيدەنتى اۋىل شارۋاشىلىعىن دامىتۋدىڭ، عىلىمنىڭ الەۋەتى مەن تەحنولوگيالىق پروگرەستىڭ جەتىستىكتەرىن پايدالانۋدىڭ ماڭىزدى ەكەنىنە نازار اۋداردى.

– بارلىق نارسەنىڭ نەگىزى ەڭبەكتە. ەڭبەكتىڭ ارقاسىندا جەتكەن جەتىستىك ادامدى باقىتتى ەتەدى، – دەدى مەملەكەت باسشىسى.

سوڭىندا نۇرسۇلتان نازارباەۆ جوباعا قاتىسۋشىلاردىڭ بارىنە ريزاشىلىق ءبىلدىرىپ، قازاقستان جاستارىن ەلىمىزدى ودان ءارى دامىتۋ ىسىنە بەلسەندى اتسالىسۋعا شاقىردى.

Abai.kz