ادامدا جىن بولادى، جىنى جەتىپ كەلگەن سوڭ، جىم بولادى... اسىرەسە، شەنەۋنىكتەر تىلشىلەردىڭ سۇراقتارىنا سىلق ەتىپ، بۇيرەكتەرى بىلق ەتىپ، ءتىپتى، اشۋلانىپ كەتەدى. عارىشكەر مۇساباەۆتىڭ تىلشىگە نە دەگەنىن، سول ءتىلشىنىڭ تاس ارالاسقان «كاشا» جەگەنىن دە بىلەمىز. شەنەۋنىكتەردى قويشى، حالىقتىڭ ارقاسىندا «قوزى قارىن» بولىپ جۇرگەن تورەعالي سەكىلدى انشىلەر دە تىلشىلەردى ماڭايىنا جولاتپاعان.

ەندى مىنە، ۇلتتىق ەكونوميكا ۆيتسە-ءمينيسترى سەرىك جۇمانعاريننىڭ  تاريفكە قاتىستى سۇراق قويعان تىلشىگە بەرگەن جاۋابى جىندانىپ كەتتى... ونىڭ جىنى «جىندىحاناعا» ءتۇستى. قازىر سوندا جاتىر.

جىن دەگەن... قالاي تۇسىندىرسەم ەكەن؟ ادام بىتكەن اشۋلانعاندا، ءبىر نارسەدەن مەزى بولعاندا: «جىنىمدى كەلتىرمەشى!» دەيدى. ال ادامنىڭ جىندارى ءار قيىردان كەلەدى. ءبىرى تاكسيلەتىپ تەز كەلسە، ەكىنشىسى ۇشاقپەن ۇشىپ كەلە سالادى. ولار ءجاي كەلمەيدى، سول ادامنىڭ اۋزىنا ءبىر ءتۇرلى سوزدەر سالىپ، جۇرتتىڭ الدىندا ماسقاراسىن شىعارادى. ونى قويشى، قاراپايىم قازاق ايەلدەرىنىڭ دە، جىندارى جاستىق استىندا جاتادى.

-ءمارياش، سوتكاڭدى مەن ءۇشىن بلوكتاپ تاستاعانىڭ نە؟- -دەپ سۇرايدى قاتار جاتقان ايەلىنە.
-قويشى، ۇيىقتاپ جاتىرمىن دەيمىن!
-ينستاگرامدى مەن ءۇشىن بلوكتاپ تاستاپسىڭ...
-قويشى، ۋجە ءبىر كوزىم ۇيىقتاپ كەتتى...
-ءبىر پالەڭ بار، مەنەن جاسىراتىن...
-جىنىمدى كەلتىرمەشى!
-جىنىڭ قايدا؟
-جىنىم جاستىقتىڭ استىندا!
مىنە، ەرلى-زايىپتىلار اراسىنداعى جىن جاستىقتىڭ استىندا جاتادى ەكەن.

ال، سەرىك جۇمانعارين مىرزانىڭ جىنى مۇرنىنىڭ ۇشىندا «قىمباات تۋفلي كيىپ» وتىر. ول ءتىلشىنىڭ تاريف تۋرالى سۇراعىنا جاۋاپ بەرۋدەن باس تارتتى.
-ەلىمىزدەگى تاريفتەر نەگە قىمبات؟-دەپ سۇرادى ءتىلشى.
-قىمبات بولعان سوڭ قىمبات. «قىمبات... قىمباتتىم!» دەگەن سوزەر قانداي ادەمى، جۇمساق ەستىلەدى...-دەپ ايتقان جوق ول.
-دەگەنمەن، تاريف...
-وي اينالايىن، جىنىمدى كەلتىرمەشى!
-تاريف...
-بۇل باسقا شارا عوي؟ نە بولدى؟ كەشە پارلامەنتتە تاريفتەر تۋرالى ايتتىم. جىنىمدى كەلتىرمەڭىزشى؟-دەپ ايتتى ول.
-تاريف تۋرالى...
-سىزدەر تاريف تۋرالى سۇراۋعا كەلدىڭىزدەر مە؟ ماعان ارنايى كەلىڭىزشى، مەن سىزگە تاريف تۋرالى باسىنان اياعىنا دەيىن بارلىعىن ايتىپ بەرەيىن. جىنىمدى كەلتىرمەڭىزشى! –دەپ ايتتى ول.
-كەشىرىڭىز، باسىڭىزعا كەلە بەرەتىن جىنىڭىز تۋرالى ايتىپ بەرىڭىزشى؟
-جىن؟ ول كادىمگى جىن.. ءجۇن ەمەس!-دەپ ايتقان جوق ول. بىراق، «جىنىمدى كەلتىرمەڭىزشى!»- دەپ اشۋلانعانى راس...

ولاي بولسا، وسى جازبانى جازعان، ساتيريك مۇحشەر، ماعان دا جىنىڭىز كەلمەسىنشى!!

مۇحتار شەرىمنىڭ facebook پاراقشاسىنان

Abai.kz