«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ حالىقتىڭ تۇرمىس ساپاسى مەن تابىسىن ارتتىرۋ بويىنشا ۇسىنىستاردى تالداپ جاتقان جۇمىس توبىن ەكى ماسەلەگە نازار اۋدارۋعا شاقىردى.

«سوڭعى ۋاقىتتا انا مەن بالا قۇقىعىن قورعاۋ، قازاقستاندىق وتباسىلاردى الەۋمەتتىك قورعاۋ ماسەلەسى ءجيى كوتەرىلىپ ءجۇر. وسىعان بايلانىستى مەملەكەت تاراپىنان الەۋمەتتىك ماسەلەلەردى شەشۋ باعىتىندا اۋقىمدى جۇمىس اتقارىلعانىن ايتا كەتۋ كەرەك. مەملەكەت باسشىسىنىڭ بەس الەۋمەتتىك باستاماسى مەن قازاقستان حالقىنا جولداۋى، ەلدىڭ وزگە دە ستراتەگيالىق قۇجاتتارى قازاقستاندىقتاردىڭ تۇرمىس ساپاسىن ارتتىرۋعا باعىتتالعان. ناقتىراق ايتقاندا، مەملەكەت باسشىسىنىڭ وتكەن جىلدىڭ قازان ايىنداعى جولداۋىندا باسپاناعا قولجەتىمدىلىكتى قامتاماسىز ەتۋ، مونوپوليستەردىڭ تاريفتەردى ءتۇسىرۋى، مەديتسينا قىزمەتىنىڭ ساپاسىن ارتتىرۋ جانە وزگە دە ناقتى ۇسىنىستار ايتىلىپ، ول ۇسىنىستاردى قازىرگى تاڭدا مەملەكەتتىك ورگاندار ورىنداپ جاتىر»، - دەدى ماۋلەن اشىمباەۆ وكق-دا وتكەن ءباسپاسوز ءماسليحاتىندا.

ونىڭ ايتۋىنشا، كوپبالالى وتباسىلاردى قولداۋ باعىتىندا دا بىرقاتار شارۋالار اتقارىلۋدا.

«رەسپۋبليكالىق بيۋدجەت پەن الەۋمەتتىك ساقتاندىرۋ قورىنان بالالى وتباسىلاردى قولداۋعا وتكەن جىلى 311 ملرد تەڭگە جۇمىلدىرىلعان بولاتىن. ونىڭ ۇستىنە مەملەكەتتىڭ كومەگى تەك الەۋمەتتىك تولەمدەرمەن شەكتەلىپ وتىرعان جوق. كىرىسى تومەن وتباسىلار ءۇشىن مەكەنجاي بويىنشا الەۋمەتتىك كومەكتىڭ بار ەكەنىن بىلەسىزدەر. سونداي-اق، جەرگىلىكتى اتقارۋشى بيلىكتەن دە ۇلكەن كومەك بار»، - دەدى «نۇر وتان» پارتياسى توراعاسىنىڭ ءبىرىنشى ورىنباسارى.

ماۋلەن اشىمباەۆ ءوز سوزىندە مەملەكەت باسشىسى اتقارىلعان جۇمىستان بولەك از قامتىلعان جانە كوپبالالى وتباسىلارعا قوسىمشا قانداي كومەك كورسەتۋگە بولاتىنى تۋرالى مۇمكىندىكتەردى قاراستىرۋدى تاپسىرعانىن تىلگە تيەك ەتتى.

«سول سەبەپتى، پرەمەر-ءمينيستردىڭ ورىنباسارى ەربولات دوساەۆ جەتەكشىلىك ەتىپ وتىرعان جۇمىس توبى بەلسەندى تۇردە جۇمىسىن جۇرگىزىپ جاتىر. ۋاقىت وتە جۇمىس توبى ءوزىنىڭ ناقتى ۇسىنىستارىن جاريالايدى. بۇل رەتتە ءبىزدىڭ ويىمىزشا، ەكى ماڭىزدى ماسەلەگە نازار اۋدارۋ كەرەك: ەڭ الدىمەن، ءبىزدىڭ مەملەكەتتىڭ شىنايى مۇمكىندىگىنە قاراۋ كەرەك. جالپى، جۇمىس توبىنىڭ جۇمىسى تۋرالى ايتار بولساق، ءبىزدىڭ بيۋدجەتتىڭ مۇمكىندىگى شەكسىز ەمەس ەكەنىن ەسكەرگەن ءجون. كوپبالالى وتباسىلاردان بولەك، مەملەكەت تاراپىنان قولداۋعا مۇقتاج ازاماتتاردىڭ ساناتى كوپ. ولاردىڭ قاتارىنا قارت ادامداردى، مۇمكىندىگى شەكتەۋلى جانداردى، تولىق ەمەس وتباسىلاردى، جۇمىسسىز جانە ءبىلىمسىز قالعان جاستاردى جاتقىزۋعا بولادى. ولاردىڭ ءبارى دە مەملەكەت تاراپىنان كومەككە ءزارۋ. سول سەبەپتى، مەملەكەت قازىرگى تاڭدا نە ۇسىنا الاتىنىن كورۋ كەرەك. بۇل باعىتتا پرەمەر-ءمينيستردىڭ ورىنباسارى ەربولات دوساەۆ جەتەكشىلىك ەتىپ وتىرعان جۇمىس توبى بەلسەندى تۇردە جۇمىس جۇرگىزۋدە»، - دەدى ماۋلەن اشىمباەۆ.

«نۇر وتان» پارتياسى توراعاسىنىڭ ءبىرىنشى ورىنباسارى ەكىنشىدەن كوپبالالى وتباسىلاردى قولداۋدىڭ ءتۇرلى جولدارىن ىزدەۋ كەرەكتىگىن اتاپ ءوتتى.

«بۇل جەردە تەك الەۋمەتتىك جاردەماقى تۋرالى عانا ءسوز بولماۋى كەرەك. ورتالىق مەملەكەتتىك جانە جەرگىلىكتى اتقارۋشى ورگاندار جۇزەگە اسىراتىن كومەكتىڭ وزگە دە فورمالارى بار. ەڭ الدىمەن، باسپانا ماسەلەسى، كوممۋنالدىق تولەمنىڭ بەلگىلى ءبىر بولىگىن جابۋ، قوعامدىق كولىكپەن تەگىن ءجۇرۋ، ءدارى-دارمەكپەن قامتۋ سەكىلدى قولداۋدىڭ ءارتۇرلى جولدارى بار. كوپبالالى وتباسىلارعا قولداۋ كورسەتۋ تۋرالى ءسوز قوزعاعاندا الەۋمەتتىك كومەكتەن بولەك، قولداۋدىڭ ءتۇرلى جولدارى بارىن ەسكەرۋىمىز كەرەك. ماسەلەگە كەشەندى تۇردە جاقىنداۋىمىز قاجەت»، - دەدى ماۋلەن اشىمباەۆ.

ەسكە سالا كەتسەك، كەشە ازاماتتاردىڭ تۇرمىس ساپاسى مەن تابىسىن ارتتىرۋ، سونىمەن بىرگە كوپبالالى وتباسىلاردى قولداۋ شارالارىن كۇشەيتۋ بويىنشا جۇمىس توبىنىڭ وتىرىسىندا قر پرەمەر-ءمينيسترىنىڭ ورىنباسارى ەربولات دوساەۆ ءوز ۇسىنىستارىن ايتقان بولاتىن.

Abai.kz