قازاقستان پارلامەنتى سەناتىنىڭ توراعاسى قاسىم-جومارت توقاەۆ
مەملەكەت باسشىسىنىڭ تاپسىرماسى بويىنشا 15-17 اقپاندا ميۋنحەن
قاۋىپسىزدىك كونفەرەنتسياسىنا قاتىستى.

تانىمال الەمدىك ساياساتكەرلەر، ساراپشىلار مەن قوعام قايراتكەرلەرى
باس قوساتىن بەدەلدى فورۋمدا ءداستۇر بويىنشا جاھاندىق جانە ايماقتىق
قاۋىپسىزدىكتىڭ ەڭ ماڭىزدى ماسەلەلەرى تالقىلاندى. تاياۋ شىعىس، بالكان مەن
كاۆكازدا بەيبىتشىلىكتى قامتاماسىز ەتۋدىڭ كەلەشەگى پىكىرسايىستىڭ باستى
نازارىندا بولدى. جەكەلەگەن سەسسيالار حالىقارالىق ساۋدا، قارۋ-جاراقتى
باقىلاۋ، كليمات وزگەرىستەرى مەن كيبەرتەحنولوگيانىڭ قاۋىپسىزدىك جاعدايىنا
اسەرىنە ارنالدى.

كونفەرەنتسيادا مەملەكەتتەر مەن ۇكىمەتتەردىڭ باسشىلارى،
پارلامەنتتەر توراعالارى، حالىقارالىق ۇيىمداردىڭ كوشباسشىلارى،
ىقپالدى ساراپشىلار ءسوز سويلەدى. شاراعا مەملەكەتتەر مەن ۇكىمەتتەردىڭ 35
باسشىسى، 50 سىرتقى ىستەر ءمينيسترى، 30 قورعانىس ءمينيسترىن قوسقاندا
بارلىعى 600-دەن استام دەلەگات قاتىستى.

سەنات توراعاسى بىرقاتار پانەلدىك سەسسيالارعا جانە «ترانسۇلتتىق
قاۋىپسىزدىك» تاقىرىبىنا ارنالعان دوڭگەلەك ۇستەلگە قاتىستى. مۇددەلى
پىكىرتالاستىڭ جالپى قورىتىندىسى بويىنشا قازىرگى كەزدە ورتالىعى
بىرىككەن ۇلتتار ۇيىمى بولىپ تابىلاتىن حالىقارالىق ءتارتىپ بارشا
ادامزاتتىڭ بىرلەسكەن جاۋابىن تالاپ ەتەتىن اسا ماڭىزدى قاتەرلەرمەن بەتپە-بەت كەلىپ وتىرعانى مويىندالدى.

قازاقستان رەسپۋبليكاسى پارلامەنتى
سەناتىنىڭ ءباسپاسوز قىزمەتى

Abai.kz