ايكا تۋرالى!

ايگىلى كانن كينوفەستيۆالىنىڭ ساراپشىلارىن ءتانتى ەتىپ، جيۋري ءتورايىمى كەيت بلانشەتتىڭ اكتريسا سامال ەسلياموۆانى ۇلكەن تەبىرەنىسپەن كەلىپ، قۇشاعىنا قىسۋى "ايكانىڭ" سالماعىن سول كەزدە سەزدىرگەن. بىراق فيلم الەمدىك پروكاتقا شىققانعا دەيىن ءبىز ونى وسى الەمدى مويىنداتقان داقپىرتىمەن عانا بىلدىك، قۇرمەتتەدىك، اكتريسانىڭ شىنايىلىعى مەن ىشكى ەركىندىگىنە ءتانتى بولدىق. ال، بۇگىن... سامال­­­-ايكانىڭ ءاربىر قيمىلىن اڭدىپ وتىرمىز. كورەرمەنىن اكتريساعا قوساقتاپ قويىپ، ماسكەۋدىڭ قارلى بورانىندا بۇرسەڭ قاقتىراتىن رەجيسەردىكى نە قۇدىرەت؟

"تالايبەكوۆا! بالا جىلاپ جاتىر.تۇر ەمىز!" وسى ساتتەن باستالاتىن جانتالاس كورەرمەندى كوركەم فيلمنەن جۇلىپ الىپ، بۇگىنگى قاتال قوعامنىڭ ناقتى وزىنە لاقتىرادى. قۇددى ءبىر دەرەكتى كادرلار كوز الدىڭنان ءوتىپ جاتقان سياقتى. مۇندا ءسىز كۇتەتىن ايانىش، جۇبانىش جوق. بىراق ءبارىبىر بىزگە پەرزەنتحانادان قاشىپ شىعىپ، ولەرمەن كەۋدەسىن سۇيرەپ بارىپ، تاۋىق تازالايتىن قىرعىز قىزىنىڭ باسىنان قازىر بىرەۋ سيپايتىنداي كورىنەدى.
اق قاردى ومبىلاپ ءجۇرىپ، كوك مۇزدى جيناپ اپارىپ، ىسىگەن ىشىنە باسىپ، تار توسەگىنە جاتا قالعاندا دا جانىنداعىلار شاي بەرىپ، جاۋراعان كوڭىلىن جۇباتاتىنداي كورىنەدى.

"جۇمىس ىزدەپ ءجۇرسىڭ بە؟ بىزگە ورىس ءتىلىن جاقسى بىلەتىن ادامدار كەرەك!"-دەپ ۆيزيتكاسىن ۇسىنعان بيكەشتى كورگەندە جۇرەگىڭ جارىلارداي قۋانىپ "قازىر كولىگىنە سالىپ اكەتەتىن بولدى" دەي بەرگەنىڭدە ول "ەكى ساعاتتىڭ ىشىندە سوندا كەلەتىن بول!" دەپ قۇيعىتا جونەلەدى.

قار تازالاي الماي قالشىلداپ تۇرعان قىزعا باستىق كەلىنشەكتىڭ "اۋىرساڭ ۇيىڭدە جاتۋ كەرەك؟" دەۋى دە مۇندا زاڭدى.
قارىزىن داۋلايتىن بانديتتەر دە سەنىڭ "بايقۇس قىزعا بىرەۋ مىرەۋ قازىر كومەكتەسەر" دەۋمەن كەلە جاتقان قىپىلىق ءۇمىتىڭنىڭ كۇل پارشاسىن شىعارادى. ءتىپتى ول ايكاعا كۇشىكتەرى جابىسا ەمىپ جاتقان ەنە ءيتتىڭ دە ەمىرەنۋ ءلاززاتىن ادام سياقتى بۇيىرتپايدى. بايقاساڭىز، قانشا ازاپ، قانداي تاۋقىمەتتى باستان كەشىپ جۇرسە دە جىلاماعان، تاعدىرىنا شاعىنباعان ايكانىڭ كوزىنەن وسى جەردە عانا العاش رەت جاس شىعىپ، وكسي جىلايدى. قانداي اۋىر كادر ەدى...

سەرگەي دۆورتسەۆوي ءسىزدى الدامايدى. ويتكەنى بۇل گاستاربايتەر بوپ جۇرگەن جالعىز قىرعىز قىزىنىڭ تاعدىرى ەمەس جانە ماسكەۋ الەمدەگى جالعىز تاسباۋىر، قاتتى قالا ەمەس. بۇل ءسىز بەن ءبىز بىرگە ءداۋىر كەشىپ جاتقان مىڭدار مەن ميلليونداردىڭ تاعدىرى. رەجيسسەردا وسى سەبەپتى توسىننان كەلەتىن مەيىرىم، وقىستان پايدا بولاتىن كەڭپەيىل كەيىپكەر جوق. ول ءفيلمنىڭ سوڭىن كورەرمەنىنە قالدىرادى. بالانى الىپ كەتەسىڭ بە، جوق، ەندى عانا ەمىرەنىپ، انالىق ماحابباتى ويانعان ايكامەن قالدىراسىڭ با، ول دا سەنىڭ ءوز ەركىڭ. تاعى قاتال رەاليزمگە توپ ەتەسىڭ.

"ۇزدىك ايەل ءرولىنىڭ" سامالعا ء"وز اياعىمەن" كەلۋى زاڭدى. سامال ايكانى ءوزىنىڭ تاباندىلىعىنىڭ، ونەرگە دەگەن ادالدىعىنىڭ ارقاسىندا الىپ شىقتى. كەيىپكەر بولىپ ءومىر ءسۇرۋدىڭ ەڭ ۇزدىك، ەڭ وزىق ۇلگىسىن سامال كورسەتتى. ۇزىلۋگە شاق تۇرعان ءۇمىتتى اياعىنا دەيىن وسىنداي جانكەشتىلىكپەن الىپ شىعۋ ءبىزدىڭ گلامۋر اكتريسالاردىڭ قولىنان قانشالىقتى كەلەتىنى مەن ءۇشىن كۇماندى...

ءبىز بۇعان دەيىن دۆورتسەۆويدىڭ "تيۋلپانىن" قابىلداي المادىق. "قازاقتى سورلى قىپ كورسەتۋدى قويۋ كەرەك. مالشىعا دا تسيۆيليزاتسيا كەلدى، جىرتىق ۇيدە ەشكىم تۇرمايدى" دەدىك. ونداعى قۇلاعىن قاعازبەن ارتقا جەلىمدەپ وتىراتىن شەرلى جىگىتتىڭ جانىنان، كيىز ءۇيدىڭ جاقتاۋىندا تىزەسىن قۇشاقتاپ الىپ زارلانا ءان ايتىپ وتىراتىن كىشكەنتايدىڭ قىزدىڭ ارمانىنان ءوزىمىزدىڭ "نامىسىمىزدى" ارتىق كوردىك.

بالكىم، كانن تورىنەن ەڭ ۇزدىك ايەل ءرولى بۇيىرماعاندا ايكانى دا ءبىراز جەرگە اپارىپ اكەلەر مە ەدىك، كىم بىلەدى...

شولپان راقىمقىزىنىڭ facebook پاراقشاسىنان

Abai.kz