سپارتاك قۇلداردى كوتەرۋ ءۇشىن: - سەندەر ازات بولاسىڭدار. سول كەزدە سەندەردىڭ دە قۇلدارىڭ بولادى،-دەپ، ۇران تاستايتىنى بار...

سپارتاكتىڭ - قۇلدارعا قۇلدارىڭ بولادى،-دەپ قىزىقتىرۋىن تۇسىنە الماپ ەم. قۇلداردىڭ دا، ونى ەلىرە قولپاشتاعانى تۇسىنىكسىز بولاتىن. - كەشە عانا قۇل بولعان ادام، قالايشا ەرتەڭ بىرەۋدى قۇل قىلعاندى قالايدى؟ ونىڭ ازابىن ءوزى كوردى، بىلەدى ەمەس پە،-دەپ باسىم جەتپەيتىن...

قاراپ وتىرسام، ءبىز سول سپارتاكتىڭ قۇلدارىنان ارى كەتپەپپىز عوي.
قاراڭىزشى: كەشە عانا كۆارتيرانت بولۋدىڭ قورلىعىن كورگەن قازاق، ەكى ءۇي الا قالسا، بىرەۋىنە كۆارتيرانت كىرگىزىپ قويادى. بار تاپقانىن قوجايىنعا بەرىپ جۇرگەن كۆارتيرانتتىڭ دا ارمانى وسىنداي! پاتەرىم بولسا، جالعا بەرىپ قويسام،-دەيدى. قۇلىم بولسا،-دەپ ارماندايتىن قۇلدان نە ايىرما بار؟

قالا سىرتىنداعى رايونعا بارىڭىزشى. ءۇيى بارلار - اۋلاسىنا ءجامان-ءجامان ۆاگون، كونتەينەرلەر قويىپ تاستاعان. سولارعا 30 مىڭ تەڭگەگە ادام تۇرعىزادى. مۇنداي قازاقتان "اينالاسىڭ" عوي. كەيبىر پىسىقتار بار: كرەديتكە پاتەر الىپ، ونى جالداۋعا بەرىپ، اي سايىنعى تولەمىن كۆارتيرانتقا تولەتىپ وتىر! كۆارتيرانتتاردىڭ ارقاسىندا كۆارتيراسىنىڭ كرەديتىن تولەپ قۇتىلعاندار، وسى ارامىزدا دا بار شىعار؟! كىم ولار؟! اناۋ دا، مىناۋ دا قازاق! ءوز ۇلتىڭنىڭ ازىرگە كەدەيلەۋ ءبىر وكىلىنەن، جەلكەسىنە وتىرىپ اپ، پايدا تابۋ - ارامدىقتىڭ شەگى شىعار؟!

P/S: ءبىر باۋىرىم بار. اقشاسىن پرينتسيپيالدى تۇردە دەپوزيتكە سالمايدى. نەگە؟! دەپوزيتتەگى اقشام ءوز-وزىنەن وسپەيدى. بانكتەگىلەر دە ءوز قالتاسىنان تولەمەيدى. مەنىڭ دەپوزيتىمدى تۋرا مەن سياقتى ءبىر بايعۇس كۇن-ءتۇن پاحات ەتىپ وسىرەدى. بىرەۋدىڭ زارى، تەرىمەن اقشامدى ءوسىرىپ نە ىستەيمىن،-دەپ ەدى...

نۇربەك بەكباۋدىڭ facebook پاراقشاسىنان

Abai.kz