الماتى اكىمى باۋىرجان بايبەك كوپبالالى انالارمەن كەزدەستى،
ولاردىڭ بارلىق سۇراقتارى مەن ۇسىنىستارىن جەكە تىڭدادى، سونىمەن قاتار
مەگاپوليستىڭ تۇرمىسى تومەن كوپبالالى وتباسىلارىنا قولداۋ كورسەتۋ ءۇشىن
قالالىق دەڭگەيدە اتقارىلاتىن الەۋمەتتىك شارالاردى كەڭىنەن ءتۇسىندىردى.
بۇرىندارى مۇنداي كەزدەسۋلەر بارلىق اۋداندىق اكىمدىكتەردە ءوتتى،
ناتيجەسىندە ايتىلعان بارلىق ۇسىنىستار جيناقتالدى ءارى سارالاندى.

جالپى، كوپبالالى انالاردى تولعاندىراتىن باستى ماسەلەلەر – الەۋمەتتىك
جاردەماقى مولشەرىن ارتتىرۋ، تۇرعىن ءۇي مەن تۇرمىستىق جاعدايدى
جاقسارتۋ، ەڭبەكپەن قامتۋ، بالالاردى بالا باقشاعا ورنالاستىرۋ جانە
باسقالارى.
«مەملەكەت باسشىسىنىڭ تاپسىرماسى بويىنشا ۇكىمەتتىك توپ جۇمىس
ىستەۋدە، كەزدەسۋلەردە ايتىلعان بارلىق ۇسىنىستار سارالانادى جانە ەسەپكە
الىنادى. بۇلاردان وزگە، ءبىز قالالىق دەڭگەيدە كوپبالالى انالارعا قولداۋ
كورسەتۋدىڭ ناقتىلى مەحانيزمى جيناقتالعان پارمەندى شارالاردى «نۇر
وتان» پارتياسىنىڭ كەزەكتەن تىس كونفەرەنتسياسىندا اشىپ ايتتىق. مىسالى،
كامەلەتكە تولماعان 4 جانە ودان دا كوپ بالالارى بار تۇرمىسى تومەن
وتباسىلارعا تۇرعىن ءۇي الۋدىڭ العاشقى جارناسىنىڭ تولەمىن سۋبسيديالاۋ
مۇمكىندىگى قاراستىرىلاتىن بولادى»، - دەدى باۋىرجان بايبەك.

تۇرمىسى تومەن كوپبالالى وتباسىلارعا قولداۋ كورسەتۋدىڭ كەشەندى
شارالارى بويىنشا مۇگەدەك بالانى ۇيدە وقىتۋعا كەتەتىن شىعىننىڭ ورنىن
تولتىرۋ ءۇشىن بەرىلەتىن ادرەستىك كومەك پەن قيىن ومىرلىك جاعداي تۋىنداعان
كەزدە ءبىر رەت كورسەتىلەتىن الەۋمەتتىك كومەك كولەمىن ارتتىرۋ
جوسپارلانعانىن اتاپ وتۋگە بولادى.

ايتا كەتەرلىگى، باۋىرجان بايبەك بۇرىندارى تۇرمىسى تومەن
كوپبالالى وتباسىلاردىڭ ەكىنشى بالاسىنان باستاپ بالا باقشا شىعىنىنا
وتەماقى تولەۋدى قاراستىرۋدى تاپسىرعان بولاتىن. كوپبالالى وتباسىلاردىڭ
كوممۋنالدى قىزمەتكە، سۋمەن قامتۋعا قاتىستى ىستىق جانە سۋىق سۋ
ەسەپتەگىش قوندىرعىلارىن ورناتۋعا كەتكەن شىعىندارىنا جۇمسالاتىن
ادرەستىك كومەك كولەمى دە نازارعا الىنۋدا.
كوپ بالالى وتباسىلاردىڭ زاڭنامالىق جانە پسيحولوگيالىق كەڭەستەرگە
ءزارۋ ەكەنى بەلگىلى، سوندىقتان تاياۋ ارادا «باقىتتى وتباسى» قالالىق جوباسى
ىسكە اسادى جانە وسى اتتاس كوپبالالى انالار ورتالىعى قۇرىلادى. بۇل ءبىر
تەرەزە قاعيداسى بويىنشا جۇمىس ىستەيتىن سەرۆيستىك ورتالىق بولادى جانە
مۇندا كوپبالالى انالار جۇمىسقا تارتىلادى.
الماتى اكىمدىگى تۇرمىسى تومەن وتباسىلار ءۇشىن الەۋمەتتىك جۇمىس
ورىندارىن ۇلعايتۋ جانە ستيپەنديا بەرىلەتىن تەگىن قىسقا مەرزىمدى كۋرستار
ۇيىمداستىرۋ مۇمكىندىگىن قاراستىرۋدا.

بۇرىندارى باۋىرجان بايبەك الماتىدا نەگىزسىز شىعىنداردان
ارىلۋدى ۇسىنعان ەدى. قالا باسشىسى الەۋمەتتىك سيپاتى بار شەشىمدەر
قابىلداۋ ءۇشىن الماتى اكىمدىگىنىڭ «نۇر وتان» پارتياسى فراكتسياسىنىڭ
مۇشەلەرىمەن بىرگە بيۋدجەت شىعىندارىن تۇراقتى تەكسەرىپ، وڭتايلاندىرۋ
جۇرگىزگەنىن ايتتى. ناتيجەسىندە ۇنەمدەلگەن قارجى بۇرىنعىداي
ازاماتتاردىڭ ءوتىنىشى بويىنشا الەۋمەتتىك ماسەلەلەرگە جۇمسالادى. ولار –
جاڭا جۇمىس ورىندارىن قۇرۋ، تۇرمىسى تومەن جاندارعا، اسىرەسە كوپ بالالىانالارعا قولداۋ كورسەتۋ سپەكترىن ۇلعايتۋ، باسقا الەۋمەتتىك شارالاردى  جۇزەگە اسىرۋ.

Abai.kz