اقپارات ءمينيسترى داۋرەن اباەۆ جۋرناليستەرگە اككرەديتاتسيالاۋ ەرەجەسىن قازاقستاندىق باق-تىڭ باس رەداكتورلارىنىڭ وزدەرى سۇراعانىن ايتادى. بىراق ول ەشبىر رەداكتوردىڭ اتى-جوندەرىن ايتپادى.

ءمينيستردىڭ سوزىنشە، باس رەداكتورلار باسىلىمدا بۇرىن جۇمىس ىستەپ كەتكەن جۋرناليستەر اككرەديتاتسيانى پايدالانىپ كەلگەن. سول سەبەپتەن تىركەلۋ كەزىندە بەلگىلى ءبىر باق-تى جۇمىس ىستەيتىنىن راستايتىن قۇجاتتىڭ كوشىرمەسىن قوسا وتكىزۋ كەرەك.

قۇجات سىنعا الىنعاننان كەيىن، داۋرەن اباەۆ اككرەديتاتسيادان ايىرۋ تۋرالى تارماق الىنىپ تاستالۋى مۇمكىن ەكەنىن ايتتى.

«قازىر كوپتەگەن شاعىمدار ءتۇسىپ جاتىر. جۋرناليستەر مەملەكەتتىك ورگاندارعا ءبىر شاراعا بارعان كەزدە، ولار باسقا بولمەلەردى دە ارالاپ كەتەدى. ىشكى رەگلامەنت بولعان كەزدە، مۇندايعا جول بەرمەۋ كەرەك. جۇمىس ەتيكاسى دەگەن بولادى، الدىن الا سۇراۋ جولداۋ كەرەك. ءبىز جاۋاپ بەرۋگە مىندەتتىمىز. ەگەر ءسىز شەنەۋنىكتى دالىزدە كەزدەستىرىپ قالساڭىز، ساۋالدار قويۋعا بولادى، ال جۇمىس كابينەتىنە كىرىپ بارۋعا جول بەرىلمەيدى، ول دۇرىس ەمەس»، - دەدى اباەۆ.

اباەۆ جۋرناليستەردى اككرەديتاتسيالاۋ ەرەجەسى تۋرالى بۇيرىق جوباسى تالقىلانۋ ءۇشىن جاريالانعانىن ايتتى. «سىزدەردە قازىر ەموتسيونالدىق اقۋال، مەن تۇسىنەمىن... ارگۋمەنت كەلتىرىڭىز دە، بىزگە جاۋاپ بەرىڭىز. مەن جۋرناليستەردىڭ جارتىسى بۇل ەرەجەنى وقىماعانىنا سەنىمدىمىن»، - دەدى مينيستر.

جۋرناليستەردى اككرەديتاتسيالاۋ ەرەجەسىنە وزگەرىستەر ەنگىزۋ قوعام الاڭداۋشىلىعىن تۋعىزعان. ءنورماتيۆتى-زاڭ اكتىلەرى پورتالىندا جاريالانعان بۇل جوبانى وقىعاندار ازاماتتاردىڭ اقپاراتقا قول جەتكىزۋ ەركىندىگىن شەكتەيدى دەگەن پىكىرلەر قالدىرعان.

Abai.kz