الماتىدا الەۋمەتتىك جاعىنان از قامتىلعان وتباسىلاردا تاربيەلەنەتىن ۇزدىك وقۋشى بالالار ستيپەنديا الاتىن بولادى. بۇل تۋرالى الماتى اكىمى باۋىرجان بايبەك تۇرعىندار الدىنداعى ەسەپتىك كەزدەسۋىندە ايتتى.

بيىل قالا بيلىگى كوپبالالى جانە مۇقتاج وتباسىلاردى قولداۋ بويىنشا كەشەندى شارالار مودەلىن قولعا الماق.

اتاپ ايتقاندا، «باقىتتى وتباسى» باعدارلاماسى اياسىندا تۇرمىسى تومەن جانۇيالاردا تاربيەلەنىپ وتىرعان وقۋشىلار مەن ستۋدەنتتەردى قولداۋ قولعا الىنعان.

«مۇقتاج وتباسىلاردىڭ جاستارىنا ستيپەنديا بەرىلەدى. بۇل، بىلىمگە دەگەن قۇشتارلىقتى ارتتىرادى. ۋنيۆەرسيتەتتەر مەن كوللەدج ستۋدەتتەرىنە اي سايىن - 10 مىڭ تەڭگەدەن، ال مەكتەپ وقۋشىلارىنا 5 تەڭگەدەن بەرىلەدى. ايتپاقشى، بيىل ەلىمىز بويىنشا بولىنگەن گرانتتاردىڭ 40% نەمەسە 27 مىڭى الماتىعا تيەسىلى. بۇل جەردە ءبىز گرانتپەن وقيتىنداردىڭ بارلىعىنا بولىنەتىن ستيپەنديانى ءسوز ەتۋدەمىز. ارينە، بۇل وتباسى ءۇشىن قوسىمشا تابىس كوزىنە اينالادى»، - دەدى باۋىرجان بايبەك.

سونداي-اق الماتىدا تۇرمىسى تومەن وتباسىلار ءۇشىن ەكىنشى بالادان باستاپ بالاباقشا تەگىن بولادى.

بۇدان بولەك، كوپبالالى وتباسىلار 2 پايىزبەن باسپانا الا الادى. مەگاپوليستە «باقىتتى وتباسى» ارنايى تۇرعىن ءۇي باعدارلاماسى قولعا الىنادى. كەزەكتە تۇرعان 1276 كوپبالالى جانە تولىق ەمەس وتباسىلاردىڭ العاشقى جارنانى تولەۋگە مۇمكىندىكتەرى جوق. سوندىقتان قالا بيۋدجەتىنەن 1 ملن تەڭگەنىڭ سەرتيفيكاتتارى تاپسىرىلادى. العاشقى جارنا پاتەر قۇنىنىڭ 10% قۇرايدى، نەسيە 2% 18 جىلعا بەرىلەدى. نەسيە جاڭا ۇيلەردەگى  قۇنى 15 ملن تەڭگە بولاتىن شاعىن پاتەرلەرگە عانا  بەرىلەدى.

تۇپنۇسقا: قازاقپارات

Abai.kz