سەناتتا «داكتيلوسكوپيالىق جانە گەنومدىق تىركەۋ تۋرالى» زاڭدى ىسكە اسىرۋ بارىسى تالقىلاندى. شاراعا ىشكى ىستەر، قارجى، ادىلەت، ينۆەستيتسيالار جانە دامۋ، ۇلتتىق ەكونوميكا، اقپارات جانە كوممۋنيكاتسيا مينيسترلىكتەرى مەن ۇلتتىق قاۋىپسىزدىك كوميتەتىنىڭ وكىلدەرى قاتىستى.

وتىرىستى سەناتتىڭ  كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى گەورگي كيم اشىپ، اتالعان زاڭ جوباسى 2016 جىلعى 10 ماۋسىمدا قاۋىپسىزدىك كەڭەسىنىڭ وتىرىسىندا ەلباسىنىڭ بەرگەن تاپسىرماسى نەگىزىندە قابىلدانعانىن ەسكە سالدى. سەناتور اتاپ وتكەندەي، زاڭ قابىلدانعان مەرزىمنەن ءۇش جىل ءوتتى جانە تسيفرلاندىرۋ سالاسىندا ەلەۋلى وزگەرىستەر ورىن الدى. وسىعان بايلانىستى 2021 جىلى كۇشىنە ەنۋى ءتيىس زاڭدى ىسكە اسىرۋ ماسەلەسى ءجىتى قاراۋدى قاجەت ەتەدى.

ءىىم جەدەل-قىلمىستىق دەپارتامەنتىنىڭ باستىعى الىشەر مۇحامەدوۆ پەن قارجى ءمينيسترىنىڭ ورىنباسارى تاتيانا ساۆەلەۆا نەگىزگى بايانداما جاسادى.

ءا.مۇحامەدوۆتىڭ ايتۋىنشا، ءىىم «تۇلعانى بيومەتريالىق سايكەستەندىرۋ» اقپاراتتىق اۆتوماتتى جۇيەسىن قۇرۋ» مەملەكەتتىك ينۆەستيتسيالىق جوباسىن ىسكە اسىرۋعا ازىرلىك جۇمىستارى جۇرگىزىلۋدە. وسى جوبادا ءتيىستى جابدىقتى ساتىپ الۋ، ونى ورناتۋ جانە ىسكە قوسۋ، جۇيەنى قولدانىسقا ەنگىزۋ جانە اقپارات قاۋىپسىزدىگى تالاپتارىنا سايكەس ونى اتتەستاتتاۋعا بايلانىستى جۇمىستىڭ ەداۋىر بولىگى قامتىلادى.

سونىمەن قاتار، ءا.مۇحامەدوۆ اتاپ وتكەندەي، 2019-2021 جىلدارعا ارنالعان رەسپۋبليكالىق بيۋدجەتتە وسى جوبانى ىسكە اسىرۋعا قاراجات كوزدەلمەگەن. «وسى زاڭدى ۋاقتىلى ىسكە اسىرۋدى قامتاماسىز ەتۋ قاجەتتىلىگىن ەسكەرە وتىرىپ، ءىىم اعىمداعى جىلدىڭ ءبىرىنشى جارتى جىلدىعىندا قارجىلاندىرىلماسا، زاڭدى ىسكە اسىرۋدى ودان كەيىنگى مەرزىمگە شەگەرۋ قاجەت دەپ ەسەپتەيدى»، - دەدى بايانداماشى.

ت.ساۆەلەۆا قارجى مينيسترلىگى داكتيلوسكوپيالىق جانە گەنومدىق تىركەۋ تۋرالى زاڭنامانى ماتەريالدىق-تەحنيكالىق جانە قارجى-ۇيىمدىق قامتاماسىز ەتۋگە ارنالعان قاجەتتى قاراجاتتى بيۋدجەتكە ەنگىزۋگە ءازىر ەكەنىن جەتكىزدى. الايدا، ءىىم قۇزىرەتتى ورگان رەتىندە قاجەتتى تەحنيكالىق-ەكونوميكالىق نەگىزدەمە مەن ءتيىستى ساراپتامالاردىڭ قورىتىندىلارىن ۇسىنعان جوق.

ۇقك اقپاراتتىق قاۋىپسىزدىك دەپارتامەنتى باسشىسىنىڭ ورىنباسارى ۆيكتور ارسەنوۆ زاڭدى كۇشىنە ەنگىزۋ مەرزىمدەرىن 2021 جىلدان 2020 جىلعا اۋىستىرۋ قاجەت دەپ سانايدى. بۇل بيومەتريالىق مالىمەتتەر مەن تۇلعالاردى سايكەستەندىرۋ جۇيەسىن ەنگىزۋ كوزدەلىپ وتىرعان مەملەكەتتىك شەكارادان ءوتۋدى باقىلاۋ جۇيەسىن تولىق جاڭارتۋ جۇمىسىن اياقتاۋعا بايلانىستى.

سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ مۇشەلەرى تالقىلاۋعا قاتىستى.

دەپۋتات ۆلاديمير ۆولكوۆ مەملەكەتتىك ورگانداردىڭ جۇمىسىندا ۇيلەسىمدىلىكتىڭ بولماۋىنا بايلانىستى الاڭداۋشىلىق ءبىلدىردى. ونىڭ پىكىرىنشە، مۇددەلى مەكەمەلەر تالقىلانىپ وتىرعان زاڭدى ىسكە اسىرۋ مەن باسقا دا قۇقىقتىق اكتىلەرگە مونيتورينگ جاساۋدى ءتيىمدى جۇزەگە اسىرمايدى. سونداي-اق، سەناتور ومىرىنە قاۋىپ تونەتىن كاسىپ وكىلدەرىنە قاتىستى داكتيلوسكوپيالىق تىركەۋدى قولدانۋ سالاسىن كەڭەيتۋ ءىىم وكىلدەرىنىڭ نازارىن قاجەتتىگىنە اۋداردى.

سەناتور نۇرلان بەكنازاروۆ بىرقاتار ناقتى ۇسىنىستار ايتتى. اتاپ ايتقاندا، كەيىنگە قالدىرۋ شارتىمەن بيۋدجەت جوباسىنا ەنگىزۋدەن باس تارتۋ ءۇشىن نەگىزدەمەلەردىڭ ءتىزىمىن زاڭنامالىق تۇرعىدا بەكىتۋ قاجەت دەپ ەسەپتەيدى.

دەپۋتات قارجى مينيسترلىگىن پارلامەنت قابىلدايتىن زاڭداردى ىسكە اسىرۋ بويىنشا قارجى جوسپارىن بەكىتۋگە ۇندەدى. وسى جوسپار ناقتى شارالار مەن ولاردى ىسكە اسىرۋ مەرزىمدەرىن جانە بيۋدجەت قاراجاتتارىن ءبولۋدى (ساراپتاما وتكىزۋ، تەحنيكالىق-ەكونوميكالىق نەگىزدەمەنى، جوبا-سمەتالىق قۇجاتتامانى مەملەكەتتىك ورگاندارمەن كەلىسۋ مەرزىمدەرىن) قامتۋى ءتيىس.

ودان باسقا، ن.بەكنازاروۆ اكىمشىلىك بيۋدجەت باعدارلامالارى ءۇشىن ءليميتتى انىقتاعان كەزدە قارجى مينيسترلىگىنە جىل سايىنعى قاجەتتىلىكتەردەن تىس قوسىمشا قاراجات كوزدەلۋىن ۇسىندى. اتالعان بارلىق شارالار قابىلدانعان زاڭناما اكتىلەرىن ۋاقتىلى جانە اۋرە-سارساڭعا سالماي ىسكە اسىرۋعا مۇمكىندىك بەرەدى.

سەنات دەپۋتاتى ساۋلە ايتپاەۆا تالقىلانىپ وتىرعان زاڭدى قارجىلاندىرۋدىڭ سوزىلىپ كەتۋىن سىنعا الىپ، زاڭدى ىسكە اسىرۋ بارىسىن ۇكىمەت وتىرىسىندا قاراۋدى ۇسىندى.

سەنات كوميتەتىنىڭ توراعاسى گەورگي كيم وتىرىستى قورىتىندىلاي كەلە بارلىق مۇددەلى مەكەمەلەردى زاڭ ەرەجەلەرىن ۋاقتىلى جانە ساپالى ىسكە اسىرۋ بويىنشا بىرلەسە جۇمىس جۇرگىزۋگە شاقىردى. وسى قۇجات مەملەكەت قىزمەتىنىڭ ماڭىزدى سالالارىنىڭ ءبىرىن تسيفرلاندىرۋعا ارنالعان. ودان باسقا، بۇل قۇجات قاۋىپسىزدىك جاعدايىنا، ۆيزا ءتارتىبى مەن مەملەكەتتىك شەكارادان ءوتۋدى باقىلاۋعا ىقپال ەتەدى.

قازاقستان رەسپۋبليكاسى پارلامەنتى
سەناتىنىڭ ءباسپاسوز قىزمەتى

Abai.kz