بۇگىن پرەزيدەنت نۇرسۇلتان نازارباەۆ ۇكىمەت وتستاۆكاعا كەتۋى ءتيىس دەگەن پىكىر ايتتى. پرەزيدەنتتىڭ مالىمدەمەسىن اقوردانىڭ رەسمي سايتى حابارلادى.

مەن بۇگىن ەلىمىز ءۇشىن ماڭىزدى شەشىم قابىلداعالى وتىرمىن.

وتكەن جىلدارداعى الەۋمەتتىك-ەكونوميكالىق احۋال تۇراقتى بولدى.

بۇل – ارينە، جاقسى كەزەڭ.

بىراق، بۇل قازىرگى ۋاقىت تالابى ءۇشىن جەتكىلىكسىز.

مەن ۇسىنعان ءۇشىنشى جاڭعىرۋ جانە «100 ناقتى قادام – ۇلت جوسپارى» قۇرىلىمدىق رەفورمالاردى جەدەل جۇزەگە اسىرۋعا باعىتتالدى.

بەس ينستيتۋتسيونالدىق رەفورمانىڭ تولىق ىسكە اسىرىلۋى شاعىن جانە ورتا بيزنەستىڭ ۇلەسىن تۇبەگەيلى ارتتىرۋعا جانە ەكونوميكاداعى مەملەكەتتىك سەكتوردىڭ ۇلەسىن ازايتۋعا، بانكتەردى «تازارتۋعا»، سوتتارعا جانە قۇقىق قورعاۋ جۇيەسىنە دەگەن سەنىمدى ارتتىرۋعا  ءتيىس.

قابىلدانعان زاڭدارعا، ۇكىمەت شەشىمدەرىنە قاراماستان، ەكونوميكانىڭ كوپتەگەن باعىتتارى بويىنشا وڭ وزگەرىستەرگە قول جەتكىزىلمەدى.

ىشكى جالپى ءونىم نەگىزىنەن شيكىزات رەسۋرستارى ەسەبىنەن ءوستى.

بىراق، ۇكىمەت پەن ۇلتتىق بانك ەل ەكونوميكاسىن ساپالى دامىتۋعا سەرپىن بەرەتىن ناقتى قۇرالداردى تولىققاندى جاساپ شىعارا المادى.

مەملەكەتتىك باعدارلامالاردى جۇزەگە اسىرۋ بارىسىنا جاسالعان تالداۋ قورىتىندىسى ولاردىڭ ورىندالىپ جاتقانىن كورسەتكەنىمەن، كوپتەگەن ماڭىزدى باعىتتار بويىنشا ناقتى ناتيجەلەردىڭ جوق ەكەنىن اڭعارتتى.

ءونىمدى جۇمىس ورىندارى جەتكىلىكتى تۇردە اشىلماي وتىر. بۇل اسىرەسە اۋىلدىق جەرلەرگە قاتىستى. شاعىن جانە ورتا بيزنەس ءوسىمنىڭ قوزعاۋشى كۇشىنە جانە ونى دامىتۋ ءىسى اكىمدەر مەن مينيسترلەردىڭ نەگىزگى مىندەتىنە اينالمادى.

مەن تۇرعىنداردىڭ تابىسى مەن تۇرمىس ساپاسى ءاربىر ۇكىمەت مۇشەسى مەن ءاربىر اكىمنىڭ جۇمىسىنداعى نەگىزگى باسىمدىق بولۋ كەرەك دەپ بىرنەشە رەت ايتتىم.

ەكى جىل بۇرىن ءبىز كونستيتۋتسيالىق رەفورما جۇرگىزدىك. وسىعان وراي ۇكىمەت اكىمدەرمەن بىرگە الەۋمەتتىك-ەكونوميكالىق ماسەلەلەردى شەشىپ، وعان جاۋاپ بەرۋ ءۇشىن بارلىق ءتيىستى وكىلەتتىك پەن دەربەستىككە يە بولدى.

يندۋستريالدى، الەۋمەتتىك، ينفراقۇرىلىمدىق دامۋ، دەنساۋلىق ساقتاۋ جانە ءبىلىم بەرۋ سالالارىن دامىتۋعا قاتىستى بارلىق قاجەتتى مەملەكەتتىك باعدارلامالار قابىلداندى. ولاردى جۇزەگە اسىرۋ ءۇشىن قاجەتتى قارجى ءبولىندى.

دەگەنمەن، جۇيەلى جۇمىس جۇرگىزىلمەدى. تۇرعىنداردىڭ ناقتى تابىسى وسپەدى. وتباسىلاردىڭ بيۋدجەتىندە ازىق-تۇلىككە دەگەن شىعىن كولەمى ارتا ءتۇستى.

اتقارۋشى ورگانداردىڭ سالعىرتتىعىنان الەۋمەتتىك تۇرعىدان از قامتىلعان تۇرعىنداردىڭ ءبىر بولىگى اتاۋلى الەۋمەتتىك كومەكپەن قامتىلماعان.

ونىڭ ۇستىنە ۇكىمەت مۇشەلەرى، مينيسترلەر، اكىمدەر حالىقپەن جۇمىس ىستەي المادى، سونداي-اق جۇرتشىلىقتىڭ پروبلەمالارىنا قۇلاق اسىپ، اتقارىلىپ جاتقان ىستەر مەن ساياساتتى ءتۇسىندىرۋ جۇمىستارىن جۇرگىزۋگە شاماسى كەلمەدى.

بۇل رەتتە، مەن ەل پرەزيدەنتى ءارى كونستيتۋتسيانىڭ كەپىلى رەتىندە حالىقتىڭ مۇددەسىن ەسكەرە وتىرىپ، مىناداي شەشىم قابىلدادىم.

ۇكىمەت وتستاۆكاعا كەتۋگە ءتيىس دەپ سانايمىن.

ۇكىمەتتىڭ جاڭا باسشىلىعى ءومىر ءسۇرۋ دەڭگەيىن ارتتىرۋ، ەكونوميكانى ىنتالاندىرۋ، ستراتەگيالىق مىندەتتەردى جۇزەگە اسىرۋ جونىندە ناقتى شارالار ازىرلەۋگە ءتيىس.

مەن «نۇر وتان» پارتياسىنىڭ جاقىندا وتەتىن سەزىندە الەۋمەتتىك قولداۋدى كۇشەيتۋگە جانە ازاماتتاردىڭ تۇرمىس ساپاسىن ارتتىرۋعا ارنالعان بىرقاتار شارالار ۇسىنامىن. بۇعان بيۋدجەتتەن جانە ۇلتتىق قوردان قوماقتى قارجى بولىنەتىن بولادى.

بۇل قاراجات مىناداي مىندەتتەردى شەشۋگە باعىتتالادى:

1. از قامتىلعان ازاماتتارعا الەۋمەتتىك قولداۋ كورسەتۋ ءىسىن كۇشەيتۋ.

2. حالىقتىڭ الەۋمەتتىك تۇرعىدان ءالسىز توپتارىنىڭ باسپانا جاعدايىن جاقسارتۋ مۇمكىندىكتەرىن ارتتىرۋ.

3. وڭىرلەردى دامىتۋ ساياساتىن تۇبەگەيلى وزگەرتۋ.

ۇكىمەت پەن بارلىق دەڭگەيدەگى اكىمدەردىڭ جۇمىسى وسى مىندەتتەردى جۇزەگە اسىرۋعا باعىتتالۋى ءتيىس.

ۇكىمەت پەن وڭىرلەردىڭ يەلىگىندەگى قاراجات كوزدەلگەن ماقساتقا ساي جۇمسالماي وتىر. مۇنىڭ بارىنە باقىلاۋ ورناتىلادى. وسى باعىتتار جونىندە «نۇر وتان» پارتياسىنىڭ سەزىندە تولىعىراق ايتىلاتىن بولادى.

Abai.kz