سونىمەن، ۇكىمەت وتستاۆكاعا كەتتى. بۇل قازاقستاننىڭ، ەگەر قاتەلەسپەسەم، 10-ۇكىمەتى.

شىنى كەرەك، ۇكىمەتتىڭ جۇمىسى كەرەمەت بولدى دەپ ايتۋعا اۋىز بارمايدى. وسى ۇكىمەتتىڭ تۇسىندا، ەلىمىزدە قانشاما باعدارلاما قابىلداندى، قانشاما ستراتەگيالىق شەشىمدەر ىسكە اسىرىلدى. بىراق، وسىناۋ شەشىمدەر حالىقتىڭ ءال-اۋقاتىنا وڭ اسەر ەتە المادى.

انا مەن بالانىڭ ماسەلەسى مۇلدەمگە ۋشىعىپ كەتكەندىگىن، كوپتەگەن مينيسترلەر بىلمەگەن دە. ياعني، قوعامنان الشاقتاپ كەتكەن مينيسترلەر... مينيسترلەر كابينەتىنىڭ ادامي، رۋحاني-الەۋمەتتىك كەلبەتى حالىق الدىندا كومەسكىلەنە بەردى. ەلدەن الشاق، حالىقتان بولەك توپ ءتارىزدى بولىپ كەتتى. ينستيتۋتسيونالدىق رەفورما، كونستيتۋتسيالىق رەفورمالار ءىس جۇزىنە اسىرىلىپ، ۇكىمەتتىڭ قۇزىرى كەڭەيتىلسە دە، سول قۇزىردى پايدالانۋعا قورقاتىن كورىنەدى، بۇل ۇكىمەت.

جاۋاپكەرشىلىكتى وزىنە جۇكتەۋ، كۇرمەلەنگەن ماسەلەلەردى تۆورچەستۆولىق ادىسپەن شەشۋ جاعىنان مۇلدەمگە قادام جوق. حالىق اراسىنا بارىپ، ەلمەن سويلەسىپ، اۋىل-ايماقتاردىڭ تىنىس-تىرشىلىگىن ساراپتاۋ ءوڭىمىز تۇرماق، تۇسىمىزدە دە جوق. سوندىقتان، ۇكىمەتتىڭ كەتۋى لوگيكالىق تۇرعىدان دۇرىس شەشىم. بۇل ۇكىمەت تاريحتا "انا مەن بالا داعدارىسى", ايەلدەر كەتىرگەن ۇكىمەتى دەپ قالاتىن بولار...

ەرلان سايروۆ

Abai.kz