قازاقستان پرەزيدەنتى پارلامەنت ءماجىلىسىنىڭ دەپۋتاتتارىنا ارنالعان سوزىندە بۇرىنعى ۇكىمەتتىڭ جاھاندىق دامۋدىڭ كۇردەلى جاعدايىنا قاراماستان ەكونوميكانىڭ ءوسىمىن ساقتاۋعا كۇش سالعانىن اتاپ ءوتىپ، ۇكىمەت مۇشەلەرىنە اتقارعان جۇمىسى ءۇشىن ريزاشىلىق ءبىلدىردى. بۇل تۋرالى اقوردانىڭ رەسمي سايتى جازدى.

– پرەمەر-مينيستر باقىتجان ساعىنتاەۆ تۋرالى ارنايى ايتقىم كەلەدى. ول بۇعان دەيىن پاۆلودار وبلىسىنىڭ اكىمى، ەكونوميكا ءمينيسترى، ۆيتسە-پرەمەر، ءبىرىنشى ۆيتسە-پرەمەر لاۋازىمدارىن لايىقتى اتقارىپ، ءوزىن جاقسى قىرىنان كورسەتتى. باقىتجان ساعىنتاەۆ – ادال ءارى تاجىريبەلى ازامات. ول باسقا دا سالالاردا قىزمەت ەتە الادى. بىراق، جەكەلەگەن مينيسترلىكتەردىڭ، اسىرەسە الەۋمەتتىك سالاداعى ۆەدومستۆولاردىڭ، جۇمىسىنداعى ولقىلىقتار بۇكىل ۇكىمەتتىڭ وتستاۆكاعا كەتۋىنە اكەپ سوقتىردى، – دەدى ەلباسى.

نۇرسۇلتان نازارباەۆ حالىقارالىق ارەناداعى تۇراقسىزدىق پەن سانكتسيالىق تەكەتىرەستەر ەلىمىزدىڭ ءال-اۋقاتىن نىعايتۋ ءۇشىن تىڭ شارالار مەن شەشىمدەر قابىلداۋدى تالاپ ەتەتىنىن ايتتى.

سونىمەن قاتار، مەملەكەت باسشىسى جۇرگىزىلگەن ساياسي جاڭعىرۋدىڭ ناتيجەلەرىنە توقتالىپ، ونىڭ اياسىندا بيلىك تارماقتارى اراسىندا وكىلەتتىكتەردىڭ قايتا بولىنگەنىن اتاپ ءوتتى.

– ۇكىمەت وزىنە قاجەتتى قۇزىرەتتىڭ ءبارىن الدى. ەندى، حالىق الدىنداعى مىندەتتەرىن ءمىنسىز اتقارىپ، ءوز قىزمەتى ءۇشىن جاۋاپتى بولۋعا ءتيىس. مۇنداي جاۋاپكەرشىلىك الەۋمەتتىك جانە ەكونوميكالىق باعدارلامالاردىڭ تيىمدىلىگىنە تىكەلەي جاۋاپ بەرەتىن ءتۇرلى دەڭگەيدەگى اكىمدەرگە دە جۇكتەلەدى. ولار تۇرعىنداردىڭ ارىز-شاعىمدارىنا جەدەل جاۋاپ بەرىپ، ەڭ باستىسى، ءتيىستى شارالار قابىلداۋى قاجەت، – دەدى قازاقستان پرەزيدەنتى.

ەلباسى پارلامەنتتىڭ الەۋمەتتىك-ەكونوميكالىق ساياساتتى جۇزەگە اسىرۋ ىسىندەگى رولىنە توقتالدى.

– اڭگىمە زاڭ جوبالارىن ساپالى ازىرلەۋ عانا ەمەس، سونداي-اق ماڭىزدى مەملەكەتتىك باعدارلامالار مەن جوبالاردى ىسكە اسىرۋ جونىندە بولىپ وتىر. بۇل پارلامەنتتىك مونيتورينگتى تۇراقتى جۇرگىزۋ، ۇكىمەتتىك ەمەس سەكتوردىڭ قاتىسۋىمەن ديالوگ الاڭدارىن قۇرۋ، حالىققا قابىلدانىپ جاتقان مەملەكەتتىك، سونىڭ ىشىندە زاڭنامالىق شارالاردىڭ ءمانىن ءتۇسىندىرۋ ماسەلەلەرىنە دە قاتىستى، – دەدى نۇرسۇلتان نازارباەۆ.

مەملەكەت باسشىسى جاڭا ۇكىمەتتىڭ مەملەكەتتىك باعدارلامالاردى ودان ءارى جۇزەگە اسىرۋعا، قۇقىق قورعاۋ جانە سوت جۇيەسىندەگى رەفورمالاردى اياعىنا دەيىن جەتكىزۋگە، تۇرعىنداردىڭ پروبلەمالارىن ناقتى شەشۋگە ءتيىس ەكەنىن اتاپ ءوتتى.

نۇرسۇلتان نازارباەۆ كونستيتۋتسيانىڭ 44-بابىنا سايكەس قازاقستان رەسپۋبليكاسى پرەمەر-ءمينيسترى لاۋازىمىنا تاعايىنداۋعا كەلىسىم بەرۋ ءۇشىن اسقار ءماميننىڭ كانديداتۋراسىن پارلامەنت ءماجىلىسىنىڭ قاراۋىنا ۇسىندى.

– ول جۇمىس ىستەگەن جىلدارى وزىنە سەنىپ تاپسىرىلعان قىزمەتتەردە ناقتى ناتيجەلەرگە قول جەتكىزدى. اسقار ۇزاقبايۇلى ءوزىن تاجىريبەلى مەنەدجەر رەتىندە كورسەتتى. جاڭا ۇكىمەتتىڭ ءتيىمدى جۇمىسىن قامتاماسىز ەتۋ ءۇشىن اسقار ۇزاقبايۇلى ءماميننىڭ كانديداتۋراسىن لايىقتى دەپ سانايمىن، – دەدى مەملەكەت باسشىسى.

پارلامەنت ءماجىلىسىنىڭ دەپۋتاتتارى پرەمەر-مينيستر لاۋازىمىنا اسقار ءماميننىڭ كانديداتۋراسىن ءبىراۋىزدان ماقۇلدادى.

پلەنارلىق وتىرىس بارىسىندا نۇرسۇلتان نازارباەۆ اسقار ءماميندى قازاقستان رەسپۋبليكاسىنىڭ پرەمەر-ءمينيسترى لاۋازىمىنا تاعايىنداۋ تۋرالى ءتيىستى جارلىققا قول قويدى.

ەلباسى الەۋمەتتىك ساياساتىمىزدىڭ نەگىزگى باسىمدىقتارى جونىندە ايتىپ، يندۋستريالىق باعدارلامانى ورىنداۋ بارىسىندا وتاندىق ءوندىرىستى دامىتۋ قاجەتتىگىنە نازار اۋداردى.

Abai.kz