قولدانىستاعى زاڭناماعا سايكەس پارلامەنت ءماجىلىسىنىڭ كوميتەتتەرى پرەزيدەنت دەربەس تاعايىندايتىن سىرتقى ىستەر، قورعانىس، ىشكى ىستەر مينيسترلەرىن قوسپاعاندا، ۇكىمەت مۇشەلەرىنىڭ كانديداتۋرالارىنا كەلىسىم بەرەدى. وسىعان وراي، كەشە ءبىزدىڭ الەۋمەتتىك-مادەني دامۋ كوميتەتىمىز وزىمىزگە قارايتىن سالالارعا جاۋاپ بەرەتىن بەس مينيسترلىكتىڭ ءبىرىنشى باسشىلىعىنا ۇسىنىلعان ازاماتتارعا «باتا» بەردىك.

مەن ەكى ۆەدومستۆونى بىرىكتىرۋ جولىمەن قايتادان قۇرىلعان اقپارات جانە قوعامدىق دامۋ ءمينيسترى لاۋازىمىنا ۇمىتكەر د. اباەۆ مىرزا جايلى ءوز پىكىرىمدى ءبىلدىردىم. سەبەبى داۋرەن اسكەربەكۇلىمەن ءۇش جىلعا جۋىق قاتارلاس قىزمەت ىستەپ كەلەمىز. وسى مەرزىم ىشىندە ول باسقارعان اقپارات جانە كوممۋنيكاتسيالار مينيسترلىگىنىڭ باستاماسىمەن بۇقارالىق اقپارات قۇرالدارى تۋرالى زاڭناما جەتىلدىرىلىپ، قوعامدى تولعاندىرىپ كەلگەن بىرقاتار وزەكتى ماسەلەلەر وڭ شەشىمىن تاپتى.

داۋرەن اباەۆ – جۇرتپەن، سونىڭ ىشىندە جۋرناليستەر قاۋىمىمەن ءاردايىم اشىق پىكىر الىسىپ، دۇرىس شەشىمدەر قابىلداي بىلەتىن ساياساتكەر دەپ سانايمىن. ول اقپارات جانە قوعامدىق دامۋ مينيسترلىگىن دە ابىرويمەن باسقارادى دەپ سەنەمىن.

جالپى، بۇرىنعى اقپارات جانە كوممۋنيكاتسيالار مينيسترلىگى مەن قوعامدىق دامۋ مينيسترلىگىنىڭ بىرىكتىرىلگەندىگى وتە قيسىندى شەشىم بولدى دەپ ويلايمىن. ويتكەنى مەملەكەتتىك ىشكى ساياساتتى ءھام يدەولوگيانى بۇقارالىق اقپارات قۇرالدارىنسىز ىسكە اسىرۋ مۇمكىن ەمەس. ال مۇنداي ۆەدومستۆونىڭ باسىندا ءسوز قادىرىن ءوز قادىرىندەي تۇسىنەتىن داۋرەن اباەۆ سىندى ساياساتكەر تۇرعانى ءجون.

كارىباي مۇسىرماننىڭ facebook پاراقشاسىنان

Abai.kz