قر پرەمەر-ءمينيسترى ۇكىمەتتىڭ جاڭا قۇرامى مەملەكەت ءباسشىسىنىڭ جوعارى سەنىمىن اقتاۋى كەرەكتىگىن ايتتى.

«ۇكىمەتتىڭ جاڭا قۇرامى ايقىن ناتيجەلەرگە باعدار العان ناقتى ىستەر ۇكىمەتىنە اينالۋى ءتيىس»، — دەدى اسقار مامين.

پرەزيدەنت ۇكىمەت الدىنا حالىقتىڭ تابىسى مەن تۇرمىس دەڭگەيىن ارتتىرۋ، ەكونوميكانى ودان ءارى ءارتاراپتاندىرۋ، ءتيىمدى جاڭا جۇمىس ورىندارىن قۇرۋ، شاعىن جانە ورتا بيزنەستى دامىتۋ بويىنشا ءبىرىنشى كەزەكتەگى مىندەتتەردى قويىپ وتىر.

«حالىقتىڭ تۇرمىس ساپاسىن جاقسارتۋعا ىقپال ەتەتىن ناقتى ناتيجەلەر الۋىمىز كەرەك»، — دەدى قر پرەمەر-ءمينيسترى.

ەرتەڭ «نۇر وتان» پارتياسىنىڭ سەزىندە حالىقتى الەۋمەتتىك قولداۋدى كۇشەيتۋ جانە ولاردىڭ تۇرمىس ساپاسىن ارتتىرۋ بويىنشا بىرقاتار جاڭا شارالار جاريالاناتىنى اتالىپ ءوتتى. كەلەسى ۇكىمەت وتىرىسىندا قر پرەزيدەنتىنىڭ سەزدە بەرگەن جاڭا تاپسىرمالارى قارالادى.

وتىرىستىڭ سوڭىندا «قازاقستان رەسپۋبليكاسىنىڭ ۇكىمەتى تۋرالى» كونستيتۋتسيالىق زاڭدى ورىنداۋ ءۇشىن ۇكىمەت قۇرامىنا العاش كىرگەندەردىڭ: ءبىلىم جانە عىلىم ءمينيسترى ك. ءشامشيدينوۆانىڭ، يندۋستريا جانە ينفراقۇرىلىمدىق دامۋ ءمينيسترى ر. سكلياردىڭ، ۇلتتىق ەكونوميكا ءمينيسترى ر. دالەنوۆتىڭ انت بەرۋ ءراسىمى ءوتتى.

بۇدان وزگە، قازاقستان رەسپۋبليكاسى پرەزيدەنتىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى جارلىعىنا سايكەس كەيبىر مەملەكەتتىك ورگاندار قايتا قۇرىلدى. قازاقستاننىڭ قورعانىس جانە اەروعارىش ونەركاسىبى مينيسترلىگى تسيفرلىق دامۋ، قورعانىس جانە اەروعارىش ونەركاسىبى مينيسترلىگى بولىپ قايتا قۇرىلدى. جاڭا مينيسترلىك، اقپارات جانە كوممۋنيكاتسيالار مينيسترلىگىنىڭ بايلانىس، اقپاراتتاندىرۋ، «ەلەكتروندىق ۇكىمەت»، مەملەكەتتىك قىزمەتتەر كورسەتۋ سالاسىنداعى مەملەكەتتىك ساياساتتى دامىتۋعا جاۋاپتى بولادى. جاڭا مينيسترلىككە اسقار قۋانىشۇلى جۇماعاليەۆ باسشىلىق ەتەدى.

Abai.kz