2018 جىلدىڭ ناۋرىز ايىندا قر پرەزيدەنتى ن.نازارباەۆ “پرەزيدەنتتىڭ بەس الەۋمەتتىك باستاماسى” اتتى حالىققا ۇندەۋ جاريالاعان بولاتىن. بۇل ۇندەۋدىڭ باستى ماقساتى – حالىقتى الەۋمەتتىك جاعىنان قولداۋ، الەۋمەتتىك جاڭعىرۋ جولىندا جاڭا، اۋقىمدى قادام جاساۋ ەدى.

ماسەلەن، ءبىرىنشى باستاما – ء“اربىر وتباسىنا باسپانا الۋدىڭ جاڭا مۇمكىندىكتەرىن بەرۋ” دەپ اتالادى.

وعان سايكەس، 2017 جىلى 11,2 ملن شارشى مەتر تۇرعىن-ءۇي پايدالانۋعا بەرىلگەن. بۇل وتە ۇلكەن كورسەتكىش. الايدا، حالىق سانى ارتىپ كەلە جاتقانىن ەسكەرسەك، بۇل ءالى دە جەتكىلىكسىز. سوندىقتان، پرەزيدەنت جۇمىس ىستەيتىن ءاربىر ادام نەسيەگە پاتەر ساتىپ الىپ، ونى وتباسىلىق بيۋدجەتىنىڭ مۇمكىندىكتەرى اياسىندا تولەي الاتىنداي ارزان رەسۋرستار تەتىگىن ۇسىندى. ول – “7-20-25” باعدارلاماسى ەدى.

پرەزيدەنتتىڭ ايتۋىنشا، نەسيە ءوسىمىنىڭ مولشەرلەمەسى قازىرگىدەي 14-16 ەمەس، جىلىنا 7 پروتسەنتتەن اسپايتىن بولادى. سونداي-اق، قازىر بانكتەر باستاپقى جارنا قۇنىنىڭ 30% ، كەيدە 50 پروتسەنتىن سالۋدى تالاپ ەتەدى. ال، بۇل باعدارلاما بويىنشا العاشقى جارنا 20 پروتسەنتتەن اسپايتىن بولادى. ن.نازارباەۆ ول ءۇشىن ۇلتتىق بانكتىڭ، ەكىنشى دەڭگەيلى بانكتەر مەن قور نارىعىنىڭ مۇمكىندىكتەرىن ىسكە قوسۋ كەرەكتىگىن ايتتى.

سونىمەن قاتار، بۇل باعدارلاما ەكونوميكانىڭ، شاعىن جانە ورتا بيزنەستىڭ ورىستەۋىنە مۇمكىندىك بەرىپ، جاڭا جۇمىس ورىندارىنىڭ اشىلۋىنا ىقپال ەتەدى.

بۇل باعدارلاما بويىنشا 2018 جىلدىڭ تامىز ايىنا دەيىن مىڭنان استام ءوتىنىش قابىلدانىپ، 18,6 ميلليارد تەڭگەگە قارىز الۋ ءۇشىن 1586 ءوتىنىش كەلىپ تۇسكەن. ولاردىڭ ىشىندە 11,9 ميلليارد تەڭگە قارىز بەرۋگە 1026 ءوتىنىش ماقۇلدانعان.

ۇلتتىق بانكتىڭ حابارلاۋىنشا، «7-20-25» باعدارلاماسى اياسىندا بيىلعى جىلدىڭ 30 قاڭتارىنا دەيىن قارىز بەرۋگە 4 612 ءوتىنىش ماقۇلدانىپتى.

رەسمي دەرەككە سۇيەنسەك، «7-20-25» باعدارلاماسىن ىسكە اسىرۋ شەڭبەرىندە 2019 جىلعى 30 قاڭتارداعى جاعداي بويىنشا قارىز الۋعا 92 ملرد. تەڭگە سوماسىنا 7 949 ءوتىنىش قابىلدانعان. ونىڭ ىشىندە 55 ملرد. تەڭگە سوماسىنا قارىز بەرۋگە 4 612 ءوتىنىش ماقۇلدانعان.

Abai.kz