قازاقستان ۇكىمەتى قىتايدان ەكى ەل شەكاراسىنداعى قازاقستاندىق وتكىزۋ پۋنكتىن جەتىلدىرۋ ءۇشىن 2 ميلليارد يۋان، ياعني، 100 ميللياردقا جۋىق تەڭگە قارىز الۋدى جوسپارلاپ وتىر، - دەپ حابارلايدى Tengrinews.kz. ايلى كۇننىڭ امانىندا شەكارانى بەكەمدەۋ ءۇشىن كورشىمىزدەن قارىز الۋ قانشالىقتى دۇرىس؟

2018 جىلعى 1 شىلدەدەگى جاعداي بويىنشا قازاقستاننىڭ سىرتقى قارىزى 164,4 ملرد اقش دوللارى بولعان ەدى. ەندى وعان 100 ميللياردقا جۋىق تەڭگە قارىز جامالماق.

بۇگىن قازاقستان مەن قىتاي اراسىنداعى كەلىسىمدى راتيفيكاتسيالاۋ تۋرالى زاڭ جوباسى ماجىلىستە قارالدى. وسى كەلىسىم بويىنشا قىتايدىڭ ەكسپورت-يمپورت بانكى قازاقستان ۇكىمەتىنە قىتاي جانە وزبەكستانمەن شەكاراداعى قازاقستاندىق وتكىزۋ پۋنكتتەرىن جەتىلدىرۋ جانە تەحنيكامەن جابدىقتاۋ ءۇشىن 2,062 ميلليارد قىتايلىق ءيۋاندى جەڭىلدەتىلگەن نەسيە تۇرىندە بەرمەك.

پرەمەر-ءمينيستردىڭ ءبىرىنشى ورىنباسارى - قارجى ءمينيسترى ءاليحان سمايىلوۆتىڭ ايتۋىنشا، قىتاي 20 جىلعا 2 پايىزبەن 100 ميللياردقا جۋىق تەڭگە قارىز بەرەدى. "ەۋرازيالىق ەكونوميكالىق وداقتاعى ىشكى شەكارالاردىڭ قازاقستاندىق ۋچاسكەلەرىندەگى وتكىزۋ پۋنكتتەرىنىڭ كەدەندىك ينفراقۇرىلىمىن دامىتۋ قاجەت. قازىرگى ينفراقۇرىلىم ءوسىپ كەلە جاتقان ادامدار لەگىن بىرقالىپتى ءارى جىلدام وتكىزۋگە مۇمكىندىك بەرمەيدى. مىسالى، قازاقستان مەن وزبەكستان شەكاراسىنداعى جاعدايدى ايتۋعا بولادى. قازاقستان جاعىنداعى وتكىزۋ پۋنكتى الدىندا كۇن سايىن 70-300 اۆتوكولىك جينالادى، ولار ءۇش كۇنگە دەيىن كەزەكتە تۇرادى", - دەيدى سمايىلوۆ ماجىلىستە.

جۋرناليستەردىڭ سۇراقتارىنا جاۋاپ بەرگەن مينيستر قارىزعا الىنعان سومانىڭ 70 پايىزى وتكىزۋ پۋنكتتەرىن تەحنيكالىق جابدىقتاۋ ءۇشىن قىتايلىق قۇرىلعىلاردى ساتىپ الۋعا كەتەتىنىن ايتتى. "نەسيەگە بايلانىستى قىتايلىق Nuctech كومپانياسىنان قۇرىلعىلار الامىز. بۇل - ءوز قۇرىلعىلارىن 122 ەلگە ۇسىنعان الەمگە تانىمال قىتايلىق كومپانيا. ولاردىڭ كەدەن سالاسىنداعى قۇرىلعىلارى امەريكالىق جانە ەۋروپالىق انالوگتاردان كەم ەمەس، ال باعاسى - ارزانداۋ. تاڭداۋىمىزدىڭ سەبەبى وسى بولدى", - دەدى ول.

ءاليحان سمايىلوۆتىڭ سوزىنە سەنسەك، قىتايدىڭ الدىندا مەملەكەتتىك قارىزىمىز جوق ەكەن-ءمىس، تەك كەپىلدەندىرىلگەن قارىز 1,2 ميلليارد دوللاردى قۇراپ وتىرسا كەرەك.

ءتۇيىن

قوش! وتكەن جىلدارداعى جەردى شەتەلدىكتەرگە جالعا بەرۋ داۋى تۇسىندا قازاق حالقىنىڭ قىتاي ەكسپانتسياسىنا دەگەن قارسىلىعى قاتتى كۇشەيىپ كەتتى. ول از بولعانداي بىلتىر قازاقستاننىڭ مەملەكەتتىك قارىزى سوڭعى ءبىر جىل ىشىندە 21,9 پايىزعا ارتىپ كەتكەنىن جازعان ەدىك. جاعداي وسىنلاي شيەلەنىسىپ تۇرعان تۇستا تاعى قىتايعا الاقان جايۋىمىز ەل اراسىن ءبۇلدىرۋى مۇمكىن ەمەس پە؟ ءبىزدى الاڭداتاتىنى وسى!

ءادىل بەرىكۇلى

Abai.kz