پرەمەر-ءمينيستردىڭ ورىنباسارى گۇلشارا ابدىقالىقوۆا ەلباسىنىڭ «الەۋمەتتىك قامقورلىق» جاڭا الەۋمەتتىك شارالارىن ءتۇسىندىرۋ ماقساتىمەن وڭىرلەرگە جۇمىس ساپارلارى اياسىندا ماڭعىستاۋ وبلىسىنا باردى، وندا حالىقپەن كەزدەسۋ وتكىزىپ، جاڭاوزەن قالاسىنداعى تىگىن زاۋىتىنىڭ جۇمىسىن تەكسەردى، سونداي-اق كوپ بالالى جانە از قامتىلعان وتباسىلارعا باردى.

جاڭاوزەن قالاسىنىڭ حالقىمەن كەزدەسۋدى اشا وتىرىپ، پرەمەر-ءمينيستردىڭ ورىنباسارى گ. ابدىقالىقوۆا مەملەكەت باسشىسى ن. نازارباەۆ «نۇر وتان» پارتياسىنىڭ XVIII سەزىندە حالىقتىڭ الەۋمەتتىك وسال توپتارىنا جان-جاقتى قولداۋ كورسەتۋگە باعىتتالعان شارالار كەشەنىن قابىلداۋدى تاپسىرعانىن اتاپ ءوتتى.

«بۇگىندە ەلباسىنىڭ "الەۋمەتتىك قامقورلىق" جاڭا الەۋمەتتىك شارالارى ىسكە اسىرىلىپ جاتىر. ولار حالىقتىڭ از قامتىلعان توپتارىن بارىنشا قولداۋدى جانە تابىستى ارتتىرۋدى، كىرىستەرى تومەن ازاماتتاردى باسپانامەن قامتاماسىز ەتۋدى، ءبىلىم بەرۋ مەن دەنساۋلىق ساقتاۋدىڭ ساپاسى مەن قولجەتىمدىلىگىن ارتتىرۋدى، وڭىرلەردى دامىتۋدى جانە ت.ب. كوزدەيدى»، — دەدى پرەمەر-ءمينيستردىڭ ورىنباسارى.

گ. ابدىقالىقوۆا حالىقپەن كەزدەسۋدەن كەيىن جاڭاوزەن قالاسىنداعى تىگىن زاۋىتىنا باردى، وندا 340-تان استام ادام جۇمىس ىستەيدى (جۇمىسشىلاردىڭ 95%-ى — قالانىڭ جانە جاقىن ماڭدا ورنالاسقان راحات، تەڭگە، قىزىلساي اۋىلدارىنىڭ ايەل ادامدارى). كاسىپورىن جۇمىسشىلارى مۇناي سالاسىنىڭ ماماندارىنا زاماناۋي، ىڭعايلى جانە ساپالى ارنايى كيىمدەر تىگەدى. كاسىپورىنداعى ورتاشا ەڭبەكاقى 136 مىڭ تەڭگەدەن اسادى.

بۇدان وزگە، گ. ابدىقالىقوۆا مەن ەڭبەك جانە حالىقتى الەۋمەتتىك قورعاۋ ءمينيسترى ب. ساپارباەۆ جاڭاوزەن قالاسىندا تۇراتىن كوپ بالالى جانە از قامتىلعان وتباسىلارعا باردى. اڭگىمەلەسۋ بارىسىندا جاڭا الەۋمەتتىك قولداۋ شارالارى، ولاردى ىسكە اسىرۋدىڭ ماقساتتارى مەن تەتىكتەرى ەگجەي-تەگجەيلى ءتۇسىندىرىلدى.

سونىمەن قاتار، جۇمىس ساپارى اياسىندا جاڭاوزەن قالاسىنداعى حالىقتى جۇمىسپەن قامتۋ جانە حقكو جۇمىسى تەكسەرىلدى.

ءوز كەزەگىندە ءبىلىم جانە عىلىم ءمينيسترى ك. ءشامشيدينوۆا، دەنساۋلىق ساقتاۋ ءمينيسترى ە. ءبىرتانوۆ، قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى م. جايىمبەتوۆ، ورمان شارۋاشىلىعى جانە جانۋارلار دۇنيەسى كوميتەتىنىڭ توراعاسى ق. رىسكەلدينوۆ جاڭاوزەن جانە اقتاۋ قالالارىنداعى دەنساۋلىق ساقتاۋ، ءبىلىم بەرۋ، قۇرىلىس سالالارىنىڭ نىساندارىن ارالاپ، اۋىلدا بولىپ قايتتى.

ەسكە سالا كەتەيىك، بۇعان دەيىن ۇكىمەتتىك جۇمىس توبى اقتوبە وبلىسىندا بولدى، وندا ءوڭىر حالقىمەن اقپاراتتىق-ءتۇسىندىرۋ جۇمىستارى جۇرگىزىلدى. جۇمىس توبىنىڭ قۇرامىنا ەڭبەك جانە حالىقتى الەۋمەتتىك قورعاۋ ءمينيسترى ب. ساپارباەۆ، ءبىلىم جانە عىلىم ءمينيسترى ك. ءشامشيدينوۆا، دەنساۋلىق ساقتاۋ ءمينيسترى ە. ءبىرتانوۆ، قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى م. جايىمبەتوۆ، ورمان شارۋاشىلىعى جانە جانۋارلار دۇنيەسى كوميتەتىنىڭ توراعاسى ق. رىسكەلدينوۆ، باق وكىلدەرى مەن بلوگەرلەر كىردى.

Abai.kz