قازاقستان رەسپۋبليكاسى

                                                  ەڭبەك جانە حالىقتى الەۋمەتتىك

                                                  قورعاۋ ءمينيسترى ب.ساپارباەۆ مىرزاعا

اشىق حات

 قۇرمەتتى، بەردىبەك ماشبەكۇلى!  

ءسىزدى حالىق يگىلىگى ءۇشىن تاعايىندالعان جاڭا قىزمەتىڭىزبەن قۇتتىقتاي وتىرىپ،  جەمىستى دە، جەڭىستى تابىستار تىلەيمىز!

موڭعوليا ەلىندەگى قانداستارىمىز  اتا-جۇرتىمىزعا العاشقى ۇلى كوشتى 1991 جىلى باستاپ كەلگەن ەدى. ول قانداستارىمىزدىڭ بارلىعى ەڭبەك كەلىسىم شارتى بويىنشا جۇمىس كۇشى رەتىندە ەلگە ورالدى. ولاردىڭ اراسىنان زەينەتكەرلىك جاسقا تولعاندارىنا 2014 جىلدان 2018 جىل ارالىعىندا الەۋمەتتىك زەينەتاقى (17000-18000 تەڭگە)  تاعايىندالعان-دى. ال، 1991 جىلدان 2014 جىلعا دەيىن وتانىنا كەلگەن قانداستار ۇلت وكىلى رەتىندە جەرگىلىكتى حالىقپەن  بىردەي زەينەتاقى الىپ تۇردى. بۇل ماسەلە ءتورت جىل بويى كۇن تارتىبىنەن تۇسپەدى، قانشاما جەكە ادامدار، قوعامدىق ۇيىمدار، قوعام قايراتكەرلەرى، ۇلت جاندى ازاماتتار، ءماجىلىس دەپۋتاتتارى، پرەزيدەنت اكىمشىلىگىنىڭ قىزمەتكەرلەرى اتسالىسىپ وڭتايلى شەشىم شىعارۋعا ىقپال جاسادى. ناتيجەسىندە 2018 جىلدىڭ 26 جەلتوقسانىندا تۇڭعىش ەلباسىمىز  ن.ءا.نازارباەۆ  «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» 2013 جىلعى 21 ماۋسىمداعى زاڭىنا وزگەرىس ەنگىزىپ، 13-باپقا 18-تارماقشا قوسىپ، "قازاقستان رەسپۋبليكاسىنا تاريحي وتانىندا تۇراقتى تۇرۋ ماقساتىندا كەلگەن ەتنوستىق قازاقتاردىڭ كوشىپ كەتكەن ەلىندەگى ەڭبەك قىزمەتى جاسىنا بايلانىستى زەينەتاقى تولەمدەرىن تاعايىنداۋ ءۇشىن ەڭبەك وتىلىنە ەسەپكە الىنسىن" دەپ قول قويىپ بەردى.

مىنە، سودان بەرى وبلىستارداعى زەينەتاقى تاعايىنداۋ ورتالىقتارى  ەڭبەك جانە حالىقتى الەۋمەتتىك قورعاۋ مينيسترلىگىنەن بۇل ءىستى قالاي جۇزەگە اسىراتىن، قالاي ەسەپتەپ بەرەتىنىمىز تۋرالى ەرەجە، قاعيدا ءالى كەلگەن جوق دەپ قۇجات قابىلداماي وتىر. بىرنەشە وبلىس قابىلداپ السا دا، "مينيسترلىك رۇقسات ەتكەن جوق" دەپ قۇجاتتارىن قايتارىپ بەرىپ، حالىقتى  اۋرە - سارساڭعا سالىپ، ولاردىڭ نارازىلىعىن ۇدەدىپ جاتىر.

2014 جىلدان 2018 جىل ارالىعىندا زەينەتكەرلىككە شىققان از عانا ادامدار كەلگەن ەلىندەگى ەڭبەك وتىلدەرى جازىلعان كىتاپشالارىنىڭ، سول ەلدە ءبىلىم العان ديپلومدارىنىڭ، اسكەري بيلەتتەرىنىڭ نوتاريالدى بەكىتىلگەن اۋدارمالارىن دايىنداپ، ەلباسىنىڭ جاساعان جاقسىلىعىن تاعاتسىزدانا كۇتۋمەن ءجۇر.

ءسىز مينيسترلىككە كەلگەنگە دەيىن ورىن العان جاعداي بولسا دا، ءتورت جىل ىشىندە ازاماتتىق قۇقىقتارى تاپتالعان ازعانتاي زەينەتكەرلەردىڭ قۇقىعىن قورعاۋىڭىزدى ءوتىنىپ سۇرايمىز. وسى ماسەلەنىڭ جەدەل شەشىم تابۋىنا كومەكتەسسەڭىز ەكەن. پرەزيدەنتىمىز قاسىم-جومارت توقاەۆ تۇركىستان جۇرتشىلىعىمەن كەزدەسكەندە «... مەنىڭ باستى ۇستانىمىم انىق، ايقىن. بۇل-زاڭنىڭ ۇستەمدىگى. زاڭنان جوعارى ەشنارسە بولماۋى كەرەك. قوعامداعى ادىلەتتىلىك، ەڭ الدىمەن، اتقارۋشى بيلىككە بايلانىستى. ۇكىمەتتىڭ، مينيسترلەردىڭ، بارلىق دەڭگەيدەگى اكىمدەردىڭ، پوليتسيانىڭ، پروكۋراتۋرانىڭ، سوتتاردىڭ باستى ماقساتى - ازاماتتاردىڭ قۇقىعىن قورعاۋ» دەگەن بولاتىن.

سونىمەن قاتار، توقاەۆ: "ورتالىق جانە جەرگىلىكتى ورگانداردىڭ باسشىلارىنا قاتىستى ورىندى شاعىم تۇسكەن جاعدايدا ولاردىڭ ءبارى جازالاناتىن بولادى. سوندىقتان باسشىلار حالىقپەن تىعىز قارىم-قاتىناستا جۇمىس ىستەۋى قاجەت. حالىقپەن كۇن سايىن بىرگە بولىپ، قويان-قولتىق جۇمىس ىستەۋى كەرەك. مينيسترلەر مەن اكىمدەردىڭ جۇمىسىن ناقتى پروبلەمالاردى شەشۋ ناتيجەلەرى بويىنشا باعالايتىن بولامىن" دەدى.

ءبىز سىزدەن بىرەۋلەردى جازالاپ، شارا قولدانىپ بەر دەمەيمىز! تەك ۋاقىت مەرزىمى سوزىلىپ بارا جاتقانىنا الاڭداپ، ناتيجەلى شەشىم قابىلداۋعا ىقپال ەتسەڭىز ەكەن.

قۇرمەتبەك سانسىزبايۇلى

Abai.kz