2019 جىلى 9 ماۋسىمدا قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋى وتەتىن بولدى. 

بۇل تۋرالى بۇگىن، 9 ساۋىردە مەملەكەت باسشىسى قاسىم-جومارت توقاەۆتىڭ رەسپۋبليكالىق تەلەارنالار ارقىلى قازاقستان حالقىنا ۇندەۋىندە ايتىلدى.

«بۇگىن ەلىمىزگە جانە ارقايسىمىزعا قاتىستى اسا ماڭىزدى ۇندەۋ جاريالاعالى وتىرمىن. ەلىمىزدىڭ كونستيتۋتسياسىنا سايكەس قر پرەزيدەنتىنىڭ كەزەكتەن تىس سايلاۋىن  2019 جىلدىڭ 9 ماۋسىمىندا وتكىزۋ تۋرالى شەشىم قابىلدادىم. مەن بۇل جاۋاپتى شەشىم بويىنشا  ەلباسىمىز نۇرسۇلتان ءابىشۇلى نازارباەۆپەن اقىلداستىم. پارلامەنتتىڭ قوس پالاتاسىنىڭ سپيكەرىمەن، پرەمەر-مينيسترمەن كەڭەستىم. كونستيتۋتسيالىق كەڭەستىڭ كەلىسىمىنە جۇگىندىم. پارلامەنتتەگى پارتيا جەتەكشىلەرىمەن كەزدەستىم. كەزەكتەن تىس سايلاۋ تۋرالى شەشىم قابىلداۋ وتە ماڭىزدى ءارى قاجەتتى قادام»، - دەدى ق.توقاەۆ.

بيىل سايلاۋ وتەتىنىن بۇعان دەيىن ساراپشىلار دا ايتقان بولاتىن. توقاەۆتىڭ وتكەندە رەسەيگە بارىپ، پۋتينمەن كەزدەسۋى دە الداعى سايلاۋدىڭ بولاتىنىن بايقاتقان. دەمەك، رەسەي تاراپى توقاەۆتىڭ كانديداتۋراسىنا كەلىسىم بەرگەن بولۋى مۇمكىن.

ازىرگە سايلاۋعا قانداي كانديداتتاردىڭ تۇسەتىنى بەلگىسىز. كەشە مەملەكەت باسشىسى قاسىم-جومارت توقاەۆ «Nur Otan» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆتى، قازاقستاننىڭ «اق جول» دەموكراتيالىق پارتياسىنىڭ توراعاسى ازات پەرۋاشەۆتى، قازاقستان كوممۋنيستىك حالىق پارتياسى ورتالىق كوميتەتىنىڭ حاتشىسى ايقىن قوڭىروۆتى، «اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى ءالي بەكتاەۆتى قابىلدادى. سوعان قاراعاندا وسى پارتيالاردىڭ ارقايسىسىنان بىردەن كانديدات ۇسىنىلۋى مۇمكىن.

Abai.kz