مەملەكەت باسشىسىنا ازاماتتاردىڭ دەنساۋلىعىن نىعايتۋعا، قازاقستانداعى مەديتسينالىق كومەكتىڭ ساپاسىن ارتتىرۋعا جانە ونىڭ قول جەتىمدىلىگىنە قاتىستى قابىلدانعان شارالار جونىندە ەسەپ بەرىلدى. بۇل تۋرالى اقوردانىڭ رەسمي سايتى جازدى.

قاسىم-جومارت توقاەۆ ەلىمىزدىڭ دەنساۋلىق ساقتاۋ جۇيەسىنە جەتكىلىكتى قاراجات بولىنەتىنىن اتاپ ءوتتى. بۇل قارجىنى ونىڭ تيىمدىلىگىن ارتتىرۋعا، ىشكى رەسۋرستاردى جۇمىلدىرۋعا جانە مەديتسينا قىزمەتكەرلەرىنىڭ ەڭبەكاقىسىن وسىرۋگە جۇمساۋ قاجەتتىگىن ايتتى.

ەلباسى مەن قازاقستان پرەزيدەنتىنىڭ تاپسىرمالارى بويىنشا 2019 جىلعى 1 ماۋسىمنان باستاپ جالاقىسى تومەن مەديتسينا قىزمەتكەرلەرىنىڭ ەڭبەكاقىسى 30 پايىزعا ارتادى.

ەلجان ءبىرتانوۆ مەملەكەت باسشىسىنا العاشقى مەديتسينالىق-سانيتارلىق جاردەم ساپاسىن ارتتىرۋعا، دارىگەرلەردىڭ جۇمىس جۇكتەمەسىن ازايتۋعا، تۇرعىنداردىڭ سكرينينگپەن قامتىلۋىن كەڭەيتۋگە، مەديتسينالىق قىزمەت كورسەتۋ ءىسىن تسيفرلاندىرۋعا  جانە نۇر-سۇلتان قالاسىندا ۇلتتىق عىلىمي ونكولوگيالىق ورتالىق قۇرۋ تۋرالى جوبانى جۇزەگە اسىرۋعا قاتىستى جۇرگىزىلگەن جۇمىستار جونىندە باياندادى.

سوڭىندا قازاقستان پرەزيدەنتى حالىقارالىق وزىق تاجىريبەنى پايدالانا وتىرىپ، وتاندىق دەنساۋلىق ساقتاۋ سالاسىن دامىتۋ ءۇشىن الداعى ۋاقىتتا ءتيىستى شارالار قابىلداۋدى تاپسىردى.

Abai.kz