قازاقستان رەسپۋبليكاسى پرەمەر-ءمينيسترىنىڭ ورىنباسارى گۇلشارا ابدىقالىقوۆا شىمكەنتتە كوپبالالى انالارعا پاتەر كىلتىن تابىستادى.

شىمكەنت قالاسىندا پرەمەر-ءمينيستردىڭ ورىنباسارى گۇلشارا ابدىقالىقوۆا جەرگىلىكتى تۇرعىندارمەن كەزدەستى. شاراعا شىمكەنت قالاسىنىڭ اكىمى عابيدوللا ءابدىراحىموۆ، ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ، ءبىلىم جانە عىلىم ءمينيسترى كۇلاش ءشامشيدينوۆا، دەنساۋلىق ساقتاۋ ۆيتسە-ءمينيسترى ءلاززات اقتاەۆا، ينۆەستيتسيالار جانە دامۋ مينيسترلىگىنىڭ قۇرىلىس جانە تۇرعىن ءۇي كوممۋنالدىق شارۋاشىلىق كوميتەتىنىڭ توراعاسى مارحابات جايىمبەتوۆ قاتىستى.

ۇكىمەت مۇشەلەرى جۇرتشىلىققا تۇڭعىش پرەزيدەنت - ەلباسى نۇرسۇلتان نازارباەۆتىڭ «Nur Otan» پارتياسىنىڭ اقپان ايىنداعى سەزىندە اتاپ وتكەن تابىسى تومەن ازاماتتاردىڭ، كوپبالالى انالاردىڭ، مۇمكىندىگى شەكتەۋلى ازاماتتاردىڭ ءال-اۋقاتىن ارتتىرۋ، ءبىلىم بەرۋ، دەنساۋلىق ساقتاۋ سالالارىنىڭ جانە ءومىر ءسۇرۋ ساپاسىن ارتتىرۋعا باعىتتالعان الەۋمەتتىك باعدارلامالاردى ءتۇسىندىردى.

شارا بارىسىندا گۇلشارا ابدىقالىقوۆا مەملەكەتتىك باعدارلاما اياسىندا بىرقاتار كوپبالالى انالارعا پاتەر كىلتىن تابىستادى.

«شىمكەنتتە مامىر ايىندا الەۋمەتتىك جاعدايى تومەن 540 وتباسىعا پاتەر بەرىلەدى. ونىڭ ىشىندە كوپبالالى انالارعا 177 پاتەر بەرۋدى جوسپارلاپ وتىرمىز. بۇگىن سونىڭ 11-نە گۇلشارا ناۋشاقىزى پاتەر كىلتىن تابىستادى»،- دەدى قالا اكىمى عابيدوللا ءابدىراحىموۆ.

دەرەككوز: قازاقپارات

Abai.kz