قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ توراعالىعىمەن قاۋىپسىزدىك كەڭەسىنىڭ وتىرىسى ءوتتى، - دەپ حابارلايدى اباي-اقپارات قر تۇڭعىش پرەزيدەنتى – ەلباسىنىڭ ءباسپاسوز قىزمەتىنە سىلتەمە جاساپ.

جيىندا ەلىمىزدىڭ الەۋمەتتىك-ەكونوميكالىق دامۋىنا جانە ەكولوگيالىق قاۋىپسىزدىكتى قامتاماسىز ەتۋگە قاتىستى ماسەلەلەر قارالدى.

نۇرسۇلتان نازارباەۆ الەمدىك قوعامداستىقتىڭ ەلىمىزدەگى ساياسي وقيعالارعا زور قىزىعۋشىلىق بىلدىرگەنىن ايتتى.

– مەن تاريحىمىزدىڭ وسى ءبىر بەتبۇرىستى كەزەڭىندە قازاقستاندىقتاردىڭ پاراساتتىلىق جانە بەرەكە-بىرلىك تانىتقانىنا شىنايى ريزاشىلىعىمدى بىلدىرەمىن. وسى كۇندەرى مەنىڭ اتىما مەملەكەت جانە قوعام قايراتكەرلەرىنەن، ەلىمىزدىڭ ەڭبەك ۇجىمدارىنان كوپتەگەن حاتتار مەن جەدەلحاتتار كەلىپ تۇسۋدە. شەت مەملەكەتتەردىڭ جانە حالىقارالىق ۇيىمداردىڭ باسشىلارى تەلەفون ارقىلى حابارلاسىپ، قولداۋ ءبىلدىرىپ جاتىر، – دەدى ەلباسى.

قازاقستاننىڭ تۇڭعىش پرەزيدەنتى ەلىمىزدىڭ ءوسىپ-وركەندەۋىنە جانە ورنىقتى دامۋىنا باعىتتالعان باعداردان مەملەكەتىمىز اينىمايتىنىنا سەنىم ءبىلدىردى.

– ءبىز بارلىق سىناقتان ابىرويمەن ءوتىپ، تابىستى مەملەكەت قۇرا بىلدىك. ونى بۇكىل الەم بىلەدى ءارى قۇرمەتتەيدى. مەن قازىرگى قازاقستاننىڭ نەگىزىن قالاعاندىقتان مەملەكەتىمىزدىڭ بولاشاعىنا جانە ازاماتتارىمىزدىڭ ءال-اۋقاتىنا باسا ءمان بەرەمىن. مەنىڭ بارلىق ءىس-ارەكەتىم جانە قادامىم وسىعان ارنالعان، – دەدى نۇرسۇلتان نازارباەۆ.

قاۋىپسىزدىك كەڭەسىنىڭ توراعاسى قازاقستان حالقىنىڭ مۇددەسى ءۇشىن ستراتەگيالىق باعدارلامالاردى ودان ءارى جۇزەگە اسىرۋدىڭ ماڭىزدىلىعىن اتاپ ءوتتى.

– باعدارلامالاردى جۇيەلى ىسكە اسىرۋ – دامۋىمىزدىڭ باستى تالابى. ءبىز ازاماتتاردى تۇرعىن ۇيمەن، جۇمىسپەن، ساپالى مەديتسينالىق كومەكپەن جانە بىلىممەن قامتاماسىز ەتىپ، مۇقتاج ادامدارعا قولداۋ كورسەتۋ ءۇشىن ءتيىستى جۇمىستاردى جالعاستىرا بەرەمىز. مۇنىڭ ءبارى – جارقىن بولاشاققا دەگەن ينۆەستيتسيا، – دەدى ەلباسى.

قازاقستاننىڭ تۇڭعىش پرەزيدەنتى ەل ەكونوميكاسىن ودان ءارى دامىتۋ جانە جاھاندىق سىن-قاتەرلەردى ەڭسەرۋ ءۇشىن جاقسى مۇمكىندىكتەر بار ەكەنىن ايتتى.

باسقوسۋدا، سونداي-اق، پرەمەر-ءمينيستردىڭ ءبىرىنشى ورىنباسارى ءا.سمايىلوۆ جانە ەنەرگەتيكا ءمينيسترى ق.بوزىمباەۆ بايانداما جاسادى.

ەلباسى وڭىرلەردەگى ەكولوگيالىق جاعدايدى ءتيىستى باقىلاۋدا ۇستاۋ جانە وسى سالاداعى زاڭنامانىڭ بۇزىلۋىنا جول بەرمەۋ قاجەتتىگىنە نازار اۋداردى. نۇرسۇلتان نازارباەۆ بۇل شارالار، ەڭ الدىمەن، حالىقتىڭ تۇرمىس ساپاسىن جاقسارتۋعا باعىتتالعانىن اتاپ ءوتتى.

وتىرىس قورىتىندىسى بويىنشا ۇكىمەتكە، وبلىستاردىڭ، نۇر-سۇلتان، الماتى، شىمكەنت قالالارىنىڭ اكىمدەرىنە ناقتى تاپسىرمالار بەرىلدى.

Abai.kz