بۇگىن پارلامەنتتىڭ جوعارعى پالاتاسىندا مەملەكەتتىك-جەكەشەلىك ارىپتەستىك جوبالارىن ىسكە اسىرۋ ماسەلەسى بويىنشا تالقىلاۋ ءوتتى. بۇل تۋرالى "اباي-اقپارات" پورتالى حابارلايدى. 

سەناتتىڭ قارجى جانە بيۋدجەت كوميتەتىندەگى باسقوسۋدا سەناتورلار  ءمجا جوبالارىن دامىتۋ بويىنشا مەملەكەتتىك جانە جەرگىلىكتى مۇددەلى اتقارۋشى ورگاندار وكىلدەرىمەن كەزدەستى.

شارانى سەناتتاعى كوميتەت توراعاسى ولگا پەرەپەچينا حانىم اشىپ، ەلباسى نۇرسۇلتان ءابىشۇلىنىڭ "قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك" اتتى قازاقستان حالقىنا جولداۋىنان مىسال كەلتىردى.

سەناتور پەرەپەچينا حانىم  پرەزيدەنت نۇرسۇلتان ءابىشۇلىنىڭ قازاقستان حالقىنا جولداۋىندا ايىتالعانداي، مەملەكەتتىك-جەكەشەلىك ارىپتەستىكتى كەڭەيتۋ كاسىپكەرلىكتى دامىتۋعا ارنالعان اۋقىمدى الەۋەت ءارى ينفراقۇرىلىمدى دامىتۋدىڭ نەگىزگى تەتىگى بولۋى ءتيىس ەكەنىن اتاپ ءوتتى.

"سونداي-اق، مەملەكەتتىك-جەكەشەلىك ارىپتەستىك جوبالارىن ىسكە اسىرۋ بيۋدجەت اۋىرتپالىعىن تومەندەتۋى، جوبالاردىڭ ساپاسىن ارتتىرۋى، بيزنەستى دامىتۋعا جانە مەملەكەت ەكونوميكاسىنا ينۆەستيتسيا تارتۋى ءتيىس", دەدى.

سەناتتىڭ قارجى جانە بيۋدجەت كوميتەتىنىڭ توراعاسى شىن مانىندە بيۋدجەت شىعىندارى جەڭىلدەمەيتىنىن ايتا كەلىپ، جوبالاردىڭ كوپتىگى مەن ورتا مەرزىمدى بولۋىنا بايلانىستى بيۋدجەت جۇكتەمەسىنىڭ كۇرت ءوسۋى ىقتيمالدىعىن اتاپ ءوتتى.

"كەيبىر جوبالار نەعۇرلىم قىمباتقا ءتۇسىپ وتىر، بانك پايىزى، وپەراتسيالىق، ينۆەستيتسيالىق جانە بيۋدجەت ينۆەستيتسياسى بارىسىندا بولمايتىن وزگە دە شىعىستار ەسەپ-قيساپقا قوسىلادى. مەملەكەتتىك جانە جەكە ارىپتەستەر اراسىنداعى مىندەتتەمەلەردى ءوزارا ءتيىمدى بولۋدە تەڭگەرىم قاعيداسى ساقتالمايدى", دەدى سەناتور.

ال قر ۇلتتىق ەكونوميكا ءمينيسترى ءبىرىنشى ورىنباسارى رۋسلان دالەنوۆ
قازاقستانداعى مەملەكەتتىك-جەكەشەلىك ارىپتەستىكتىڭ دامۋىنداعى نەگىزگى
كورسەتكىشتەرمەن تانىستىردى.

ۆيتسە-ءمينيستردىڭ اقپاراتىنا سۇيەنسەك، 2019 جىلعى 1 اقپانداعى جاعداي بويىنشا جالپى سوماسى 1,4 تريلليون تەڭگە بولاتىن 558 مەملەكەتتىك-جەكەشەلىك ارىپتەستىك كەلىسىم-شارت جاسالعان ەكەن.

ايتا كەتەيىك، اتالعان باسقوسۋعا ايماق باسشىلارى دا قاتىسقان ەدى. اتاپ ايتساق، تۇركىستان وبلىسى اكىمىنىڭ ورىنباسارى تولەگەن سارسەمباەۆ، الماتى قالاسى اكىمىنىڭ كەڭەسشىسى رابانديار مايماقوۆ، «شىعىس قازاقستان وبلىسى مەملەكەتتىك-جەكەشەلىك ارىپتەستىك وڭىرلىك ورتالىعىنىڭ» باسقارما توراعاسى شاكارىم بۇقتىعۇتوۆ ءسوز سويلەدى.

ال قاراعاندى ​​وبلىسى اكىمىنىڭ ورىنباسارى الماس ايداروۆ ايماقتاعى
مەملەكەتتىك-جەكەشەلىك ارىپتەستىكتىڭ وزەكتى ماسەلەلەرى مەن كەلەشەگى تۋرالى
ەسەپ بەرە كەلىپ، مەملەكەتتىك-جەكەشەلىك ارىپتەستىك بارىسىندا جەرگىلىكتى
جوبالاردى جوسپارلاۋ مەن ىسكە اسىرۋدىڭ جەكەلەگەن راسىمدەرىن رەتتەۋدە
تۋىندايتىن ولقىلىقتارعا توقتالدى.

كەزدەسۋ قورىتىندىسى بويىنشا ازىرلەنگەن ۇسىنىستارعا تالداۋ
جاسالىپ، قاجەتتىلىگىنە وراي ۇكىمەتكە جىبەرىلەدى. سونداي-اق زاڭ شىعارۋ
جۇمىستارى بارىسىندا ەسكەرىلەتىن بولادى.

Abai.kz