جۇرەگى كەڭ مىنا كىشكەنتاي ادامنىڭ ۇلكەن ىسىنە قاراڭىزدارشى. ءسىزدىڭ قولىڭىزدان بۇلاي ىستەۋ كەلەر مە ەدى؟
⠀
باي فانگ لي قىتايداعى شاعىن قالاشىقتا ۆەلوتاكسيدىڭ جۇرگىزۋشىسى بولاتىن. ول تاڭنان كەشكە دەيىن تىنباي جۇمىس ىستەيتىن. لي قىزمەتىنە ناقتى اقى قويماسا دا، پاسساجيرلەرى ونىڭ مەيىرىمدىلىگى مەن كوتەرىڭكى كوڭىل-كۇيىنە بولا، ارتىعىراق تولەيدى ەكەن. ءبىر جاعىنان كوپشىلىگى نانىن اۋىر ەڭبەكپەن تاۋىپ جۇرگەن مەيىرىمدى اقساقالعا قولداۋ كورسەتكىسى كەلسە كەرەك. ول جۇپىنىلاۋ پاتەردە، كەدەي اۋدانداردىڭ بىرىندە تۇرىپتى.
⠀
بىردە 74 جاسار لي جالدانىپ اۋىر جۇمىس ىستەپ جاتقان 6 جاسار بالانى بايقاپ قالادى. بالا اقىسىن العاندا قاتتى قۋانادى، سونىسىنا قاراماستان ناندى قوقىستان الىپ جەيدى. تاڭعالعان اقساقال بالادان نەگە ولاي ىستەگەنىن سۇرايدى. سويتسە، كىشكەنتاي بالانىڭ اكە-شەشەسى جوعالىپ كەتكەن، ۇيىندە ەكى قارىنداسى بار ەكەن. ءوزى ناندى قوقىستان جەسە دە ءماز، تەك قارىنداستارىنىڭ قارنىن اشتىرماسا بولعانى. بالانىڭ مەيىرىمگە تولى جۇرەگى اقساقالدى تاڭعالدىرادى. سوسىن ولاردى بالالار ۇيىنە ورنالاستىرىپ، ءومىر سۇرۋلەرى ءۇشىن ءوز ايلىعىنان اقشا تولەپ تۇراتىن بولدى. لي بولمەسىنىڭ اقىسى مەن تۇسكى اسىنا عانا از-ماز قاراجات قالدىرىپ، قالعان تابىسىن بالالار ۇيىنە بەرەتىن. ال ءوزى قاراپايىم ومىرىنە ريزا بولاتىن. بالالاردىڭ اشتىقتان قۇتىلىپ، ءبىلىم الىپ جاتقانى ويىنا ورالعاندا اۋىر تۇرمىسىنىڭ ءوزى جەڭىلدەپ كەتكەندەي سەزىلەتىن. ۋاقىت وتە قاريا بالالار ۇيىنە تاپسىرعان ءۇش بالا ءوسىپ، ومىردەن ءوز ورىندارىن تاپتى. ال لي جەتىمدەر ۇيىنە اقشا بەرۋىن توقتاتپايدى. مەيىرىمدى قاريا 93 جاس عۇمىر كەشىپ، كەدەيلىك پەن كارىلىك جەڭىپ، ومىردەن ءوتىپتى...
⠀
بالالار ءۇيىنىڭ قىزمەتكەرلەرى لي قايتىس بولعاننان كەيىن ول ساداقا ەتكەن اقشانى ەسەپتەيدى. سويتسە اقساقال 53 مىڭ دوللاردى وزگە ادامداردىڭ قۋانىشىنا جۇمساعان كۇيى، بۇ دۇنيەمەن قوشتاسقان ەكەن...
⠀
مۇمكىن لي 53 مىڭ دوللارعا ءۇي الار ما ەدى... جوق، جاقسى كيىنىپ، ءدامدى تاماقتانار ما ەدى؟ بىراق ول وعان باقىت سىيلايتىن با ەدى؟ ادام وزگەلەردى قۋانتقاندا باقىتتىراق بولا تۇسەتىنىن لي مىرزا ەرتە تۇسىنگەن سەكىلدى...

مارفۋعا شاپياننىڭ facebook پاراقشاسىنان

Abai.kz