قازاقستاندا تەگىن ءدارى-دارمەك پەن مەديتسينالىق ماقساتتاعى بۇيىمداردى بەرۋ پروتسەسى قاتاڭ باقىلاۋعا الىنادى. وتكەن جىلدىڭ سوڭىندا دەنساۋلىق ساقتاۋ مينيسترلىگى، «الەۋمەتتىك مەديتسينالىق ساقتاندىرۋ قورى» كەاق مەن «سق-فارماتسيا» جشس بىرلەسىپ SMS-حابارلاما جۇيەسىن ىسكە قوسقان بولاتىن. نوبايلى جوبانى ىسە اسىرۋ بارىسىندا 191 603 SMS-حابارلاما جىبەرىلدى. سونىمەن قاتار، ابونەنتتەردەن 8123 جاۋاپ كەلىپ، ماماندار 1218 قوڭىراۋعا جاۋاپ بەردى.

ەستەرىڭىزگە سالا كەتسەك، مەديتسينالىق ساقتاندىرۋ قورى وتكەن جىلدىڭ باسىندا كەپىلدەندىرىلگەن تەگىن كومەك پاكەتى شەڭبەرىندە بەرىلگەن ءدارى-دارمەك پەن مەديتسينا بۇيىمدارىنا اقى تولەۋ ءتارتىبىن وزگەرتكەن بولاتىن.  ياعني، قور بىلتىر ءدارى قولما-قول بەرىلگەن جانە «ءدارى-دارمەكپەن قامتاماسىز ەتۋ» اقپاراتتىق جۇيەسىنە ەنگىزىلگەن رەتسەپتىلەرگە عانا اقى تولەيدى.

ماۋسىم ايىنىڭ سوڭىنا دەيىن پاتسيەنتتەرگە SMS-حابارلاما جولدانادى. حابارلاما جۇيەگە 2019 جىلى 1 قاڭتاردان 30 ماۋسىمعا دەيىن تەگىن-ءدارى دارمەك العاندار رەتىندە ەنگەن تۇرعىندارعا جىبەرىلەدى. جالپى العاندا، اقپاراتتىق جۇيەدە كورسەتىلگەن 5,7 ملن تەلەفون نومىرىنە حابارلاما جىبەرۋ جوسپارلانىپ وتىر.

حابارلامادا رەتسەپتىنىڭ ءنومىرى مەن ءدارىنىڭ بەرىلگەن كۇنى كورسەتىلەدى. پرەپاراتتار شىن مانىندە قولىنا تيمەگەن پاتسيەنتتەر SMS-حابارلاماعا جاۋاپ رەتىندە «0» تسيفرىن جولداي الادى نەمەسە «سق-فارماتسيا» جشس-ءنىڭ 1439 بايلانىس نومىرىنە قوڭىراۋ شالسا بولادى. قوڭىراۋ شالۋ دا، SMS تە – تەگىن.

«حابارلامانى تەگىن ءدارى العان پاتسيەنتتەردىڭ ءبارى بىردەي الادى دەۋ قيىن. سەبەبى، ولاردىڭ اراسىندا تەلەفون نومىرلەرىن قاتە كورسەتكەندەر دە بولۋى مۇمكىن. سوندىقتان تۇرعىندارعا حابارلاما كەلمەگەن جاعدايدا «سق-فارماتسيا» كومپانياسىنىڭ بايلانىس ورتالىعىنا حابارلاسۋعا بولاتىنىن ەسكەرتەمىز»، - دەدى «الەۋمەتتىك مەديتسينالىق ساقتاندىرۋ قورى» كەاق نۇر-سۇلتان ق.بويىنشا فيليال ديرەكتورى نۋرلىبەك كابدىكاپاروۆ.

ءدارى-دارمەك پەن مەديتسينالىق بۇيىمداردى ساتىپ الۋمەن «سق-فارماتسيا» جشس اينالىسادى. «سق-فارماتسيا» پرەپاراتتار مەن مەديتسينالىق بۇيىمداردى كەلىسىمشارت بەكىتكەن مەديتسينا ۇيىمدارىنىڭ ءوتىنىمى نەگىزىندە ساتىپ الادى.

اعىمداعى جىلدىڭ 15 ساۋىرىندەگى جاعداي بويىنشا ەلوردالىق مەديتسينا ۇيىمدارى 138 446 رەتسەپت بويىنشا تەگىن ءدارى-دارمەكپەن 48 مىڭعا جۋىق پاتسيەنتى قامتاماسىز ەتكەن. قامتاماسىز ەتىلگەن ءدارى-دارمەك سومماسى 1 ملرد استام تەڭگەنى قۇراعان.

Abai.kz