القا وتىرىسىنا قازاقستان رەسپۋبليكاسى پرەزيدەنتى اكىمشىلىگىنىڭ باسشىسى ب. ساعىنتاەۆ، قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى ق. قاسىموۆ، پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا. سمايىلوۆ، پرەزيدەنت اكىمشىلىگىنىڭ جانە ىشكى ىستەر مينيسترلىگىنىڭ باسشىلىق قۇرامى قاتىستى.

مەملەكەت باسشىسى ءوز سوزىندە قازاقستاننىڭ تۇڭعىش پرەزيدەنتى – ەلباسى ىشكى ىستەر مينيسترلىگىنىڭ الدىنا قۇقىق بۇزۋشىلىقتارعا مۇلدەم توزبەۋشىلىكتى قالىپتاستىرۋ تۋرالى مىندەت قويعانىن ايتتى.

– پوليتسيانىڭ جۇمىسى قوعامنىڭ ءجىتى نازارىندا. سىزدەردىڭ قىزمەتتەرىڭىز ەل ازاماتتارىنىڭ مۇددەلەرىمەن جانە قاۋىپسىزدىگىمەن تىعىز بايلانىستى. سوندىقتان، ىشكى ىستەر مينيسترلىگىنىڭ جۇمىسى ايقىن ءارى جۇيەلى بولۋى كەرەك. پوليتسيا اشىق بولۋى ءتيىس. بۇل ءۇشىن حالىقپەن تىعىز بايلانىس قاجەت. وسى ماقساتتا ءبىز ەلباسى باستاعان قۇقىق قورعاۋ جۇيەسىندەگى رەفورمانى جالعاستىرامىز. رەفورمانىڭ نەگىزگى مىندەتى – قازاقستاندىقتاردىڭ قۇقىقتارىن قورعاۋ ءىسىن مۇلتىكسىز قامتاماسىز ەتۋ، – دەدى قاسىم-جومارت توقاەۆ.

قازاقستان پرەزيدەنتى ەلىمىز بويىنشا قىلمىستىق احۋال تۇراقتى ەكەنىن اتاپ ءوتىپ، ىشكى ىستەر ورگاندارىنىڭ جۇمىسىنداعى كۇشەيتۋدى تالاپ ەتەتىن باعىتتاردى كورسەتتى. سونىڭ ىشىندە، پوليتسيا مەن قوعامنىڭ اراسىنداعى ءوزارا ءتيىمدى ءىس-قيمىلدىڭ بولماۋى، مال ۇرلىعى، ۇيالى تەلەفوندار مەن اۆتوموبيل بولشەكتەرىنىڭ قولدى بولۋىنا بايلانىستى الدىن الۋ جۇمىستارىنىڭ قاجەتتى دەڭگەيدە بولماۋى، سونداي-اق، ەسىرتكى بيزنەسىنە قارسى كۇرەستىڭ ءالسىز بولۋى ماسەلەلەرى بار. سونىمەن قاتار، مەملەكەت باسشىسى جول اپاتىنان بولاتىن ءولىم-ءجىتىم كورسەتكىشىن ازايتۋ قاجەتتىگىنە، قۇقىق بۇزۋشىلىقتاردىڭ الدىن الۋ شارالارىنا، ازاماتتارىمىزدى تابيعات اپاتتارىنان جانە توتەنشە جاعدايلاردان قورعاۋ جۇمىسىن كۇشەيتۋگە ەرەكشە نازار اۋداردى.

– پوليتسياعا قويىلاتىن نەگىزگى تالاپ – ءتيىمدى جۇمىس. ال ونىڭ تيىمدىلىگىن باعالاۋداعى باستى شارت – حالىق سەنىمى. تۇرعىندار پوليتسەيلەردىڭ دورەكىلىگى مەن بىلىكسىزدىگىنە بايلانىستى ءجيى شاعىم ايتادى. كەيبىر جاعدايلاردا پوليتسيا قىزمەتكەرلەرىنىڭ وزدەرى زاڭدى بۇزادى، اسىرەسە جول ەرەجەلەرىن ساقتامايدى. ىشكى ىستەر مينيسترلىگى جۇرگىزىلىپ جاتقان رەفورمالار اياسىندا تاجىريبەلى ءارى ادال كاسىبي مامانداردى ساقتاپ قالۋدىڭ كەشەندى شارالارىن قاراستىرۋ قاجەت. سونداي-اق، جاس كاسىبي مامانداردى ىرىكتەۋ بارىسىندا ولاردىڭ سىبايلاس جەمقورلىققا قارسى يممۋنيتەتىنە باسا نازار اۋدارۋ كەرەك – دەپ تاپسىردى مەملەكەت باسشىسى.

قاسىم-جومارت توقاەۆ شەتەلدىك تۋريستەرمەن جۇمىس ىستەۋ ءۇشىن ارنايى مامانداندىرىلعان جەكە بولىمدەرگە بايلانىستى قابىلدانىپ جاتقان شارالاردىڭ ورىندى ەكەنىن اتاپ ءوتىپ، شەتەلدەن كەلگەن ازاماتتاردىڭ قاۋىپسىزدىگىن قامتاماسىز ەتۋ جاعىمدى ينۆەستيتسيالىق كليمات قالىپتاستىرۋدىڭ اسا ماڭىزدى شارتى ەكەنىن ايتتى.

سونىمەن قاتار، قازاقستان پرەزيدەنتى ءوز ومىرىنە قاۋىپ تونسە دە، وزگە ادامدارعا كومەك قولىن سوزاتىن قاتارداعى پوليتسەيلەرگە ريزاشىلىعىن ءبىلدىرىپ، مەملەكەت تاراپىنان ىشكى ىستەر مينيسترلىگىنىڭ قىزمەتكەرلەرىنە جانە ولاردىڭ وتباسىنا لايىقتى قولداۋ كورسەتىلەتىنىن جەتكىزدى.

مەملەكەت باسشىسى ىشكى ىستەر ءمينيسترى ە. تۇرعىمباەۆتىڭ ەسەبىن تىڭداعان سوڭ جۇكتەلگەن مىندەتتەردى ورىنداۋ ءۇشىن بۇقارالىق اقپارات قۇرالدارىنىڭ، الەۋمەتتىك جەلىلەردىڭ مۇمكىندىگىن پايدالانا وتىرىپ، جۇيەلى جۇمىستى جولعا قويۋدى، ال ۇكىمەتكە مينيسترلىكتىڭ جۇمىسىن قاجەتتى رەسۋرستارمەن قامتاماسىز ەتۋدى تاپسىردى.

سوڭىندا پرەزيدەنت قاسىم-جومارت توقاەۆ القا وتىرىسىندا بەرىلگەن تاپسىرمالار پرەزيدەنت اكىمشىلىگى مەن قاۋىپسىزدىك كەڭەس حاتشىلىعىنىڭ ۇدايى نازارىندا بولاتىنىن اتاپ ءوتتى.

Abai.kz