ۋا، قازاقتىڭ بالاسى! سەنىڭ كۇشىڭ – بىرلىكتە! باسىڭدى قوس! بولىنگەندى ءبورى جەيدى! وسى وتىرعان قاي-قايسىمىز ولەر ولگەنشە بار قازاقتىڭ باسى قوسىلىپ، ازاتتىعىن الاتىن ۇلى كۇن ءۇشىن قىزمەت ەتەيىك! انت ەتتىك سوعان!

سەنىڭ كۇشىڭ – تىلىڭدە! اتالى سوزگە توقتاعان، انانىڭ ءتىلىن قۇرمەت تۇتقان حالىقپىز! قازاق بولىپ تۋىلدىق، قازاق بولىپ جان بەرەيىك! تىلىنەن ايىرىلعان ۇلت، دىلىنەن ايىرىلادى! ءدىلى جوق ۇلت - قۇلمەن تەڭ! قۇل عانا قوجايىنىنىڭ تىلىندە سويلەيدى! ويتكەنى ول – قۇل! قۇل بولمايىق، الاشقا ادال ۇل بولايىق! انت ەتتىك سوعان!

سەنىڭ كۇشىڭ – دىنىڭدە! دىنىڭە ادال كەزدە سەن اللانىڭ قۇزىرىنداسىڭ. قۇدايدان باسقاعا باس يمەيسىڭ! تىزەڭ تەك نامازدا عانا بۇگىلسىن! ال دىنىڭنەن ايىرىلساڭ – يمانىڭنان ايىرىلعانىڭ. يمانسىز ادام باسقىنشىنىڭ ارام اسىن ءىشىپ اۋىزىن ارامدار، سول ارام اۋىزبەن ۇلتىنا قارسى ءسوز ايتار. جاۋىنىڭ كۇناھتى ارام عادەتتەرىن ۇيرەنىپ، ۇلتتىڭ ابىرويىن لاستار! لۇت پايعامبار تۇسىنداعىداي ەركەك پەن ەركەك، ايەل مەن ايەل اۋەيى بولادى! ۇرپاعىڭ ازعىندايدى! قىزىڭ اركىمنىڭ مازاعىنا اينالىپ، وڭ جاقتا وتىرىپ بالا تاباتىن بولادى. ۇلدارىڭ اراق پەن كۇناعا باتقان نامىسسىز، يمانسىز ەزگە اينالادى. جانىمىز كەۋدەمىزدە تۇرعاندا دىنىمىزگە ادال بولامىز! انت ەتتىك سوعان!

سەنىڭ كۇشىڭ – جەرىڭدە! ءار سۇيەمىن قورعا جاۋىڭنان! ول جەردە سەنىڭ اتا-باباڭنىڭ سۇيەگى جاتىر! ول جەرگە سولاردىڭ قانى توگىلگەن! جاۋدىڭ ارام تابانىنا تاپتاتپا! ءوز باسىڭدى اجالعا تىك! بىراق جەرىڭدى جاۋعا بەرمە! جەرسىز سەن وتانسىزسىڭ! قايدا بارىپ كۇن كورەسىڭ؟ ول سەنىڭ –مەككەڭ! ول سەنىڭ – جانىڭ! جانىمىزدى بەرەمىز، بىراق جەرىمىزدى ەشكىمگە بەرمەيمىزى انت ەتتىك سوعان!

سەنىڭ كۇشىڭ – سالت-داستۇرىڭدە! ودان ايىرىلساڭ ۇلت بولۋدان قالاسىڭ! جەرىڭدى يەلەنگەن، ەلىڭدى قۇلدانعان ەلدىڭ ءداستۇرىن سىڭىرەسىڭ بويىڭا. ۇلتتىق تەكتىلىگىڭنەن ايىرىلاسىڭ! تەكسىزگە اينالاسىڭ! قازاقتىڭ سالتى - ۇلكەندى قۇرمەت تۇتادى. اناسىن ارداق تۇتادى! ۇلكەننىڭ الدىنان قيا وتپەيدى. جەتىمىن جىلاتپايدى! جەسىرىن قاڭعىتپايدى! قانىن بۇزبايدى! قازاقتىڭ سالتىن ساقتاساق قانا ماڭگىلىك ۇلت بولامىز! انت ەتتىك سوعان!

سەنىڭ كۇشىڭ – دومبىراڭدا! سەنىڭ كۇشىڭ – كۇيلەرىڭدە! سەنىڭ كۇشىڭ - جىر، تەرمەلەرىڭدە! سەنىڭ كۇشىڭ – حيسسا، داستاندارىڭدا! سەنىڭ كۇشىڭ - دالانى تەربەتكەن ءداستۇرلى اندەرىڭدە! سول رۋحانياتتى، دومبىرانى ەشقاشان ولتىرمەيمىز! جانىمىز – ارىمىزدىڭ ساداقاسى! قازاقتىڭ جەرىن، ەلىن، رۋحىن، دومبىراسىن ماڭگى ساقتايمىز! انت ەتتىك سوعان!

...كەشە عانا جازىپ بىتىرگەن قۇرمانعازى كۇيشى تۋرالى اڭىز بەن اقيقاتقا قۇرىلعان "قابىر قازعان" اتتى اڭگىمەم كەيىپكەرىمنىڭ وسىنداي سوزدەرمەن اياقتالادى. وسىدان ەكى عاسىرعا جۋىق بۇرىن بولعان وقيعا جەلىسىمەن جازىلعان بۇل اڭگىمەدە اۋىزبىرلىكتىڭ بولماۋىنان قالاي تاۋەلسىزدىگىمىزدەن ايىرىلىپ بودان ەلگە اينالعانىمىز تۋرالى دا ءسوز بولادى.

ايتايىن دەگەنىم، وسى ايتىلعانداردى بۇگىن دە ءبىز ۇستانىم ەتۋىمىز كەرەك. جەكە باس، ءجۇز، رۋ، كلاندىق مۇددەدەن ۇلتتىق، مەملەكەتتىك مۇددەنى جوعارى قويايىق. قوعامدى وسىعان تاربيەلەيىك. اقيقاتتى ايتۋ كەرەك، ارينە. دەسەك تە، ارقايسىڭىزدىڭ پىكىرىڭىز جينالا كەلە قوعامدىق پىكىردى قۇرايتىنىن ەسكەرسەك، ءبىر اۋىز ءسوز جازساق تا ۇلتقا بىرلىك، ىنتىماق اكەلەتىن دۇنيەلەر جازايىق.

ادىلبەك قابانىڭ facebook پاراقشاسىنان

Abai.kz